3 Ịduon nyina meḍighi bọ weye phọ Ẹnaan, kẹ́kaaph ghan rọghaaph ekol olhe ẹmha rꞌipesi rꞌọseph ọsighenom, sịphe ogbo phọ anyina. 4 Ọghaaph isa rꞌelologhi ọ́kpianaan ọghaaph ghan. Kẹ́maarom ghan ịnhu ịlo eḍighi ni ephigh. Ịmaar ịnhu ịlo ẹngo Ẹnaan ḍịseph. 5 Ịmaar elegheri ịphen, mọ esi ạbuphe kopin aani bọ bin ẹpe ọmar phọ kꞌẸnaan rꞌaKraist, oliom ẹmha, opesiom ipesi, ọlo rạseph ghan ẹlo ọnon kạsighenom kạ́tol. Ọlo rạseph ghan ẹlo ọnon kạsighenom mạsighe eghuan phọ Ẹnaan rạngo ịkaaghineen ạrumugh.

6 Kémeera oye ạgba iphirigba iikeleghiom inyina. Ịphen kụ ạraraar phọ ạghelhe phọ Ẹnaan kạtuan bọ ameelom bụphe rọ́naghanan ghan bọ nyọdi. 7 Esi ịphen phọ, kẹ́moogh ịyaar oḍighinom ọdo phọ awe phọ ạbuphe. 8 Nyina ịrol ghan ẹku ufiri, kụ sịen nyina meḍighi bọ weye Ọmoogh-we phọ, nyina memite ẹphalaḅaal. Ịtuugh dọl aweye ẹphalaḅaal phọ kụ ẹrol, 9 ịdi eḍighi bọ ẹphalaḅaal phọ kụ remuum ghan iimuma iiḅi rꞌaruukuan rꞌigey kịrokiro. 10 Aghuḍum mọ anyina aḍeenaan ghan rọozo phọ ẹḅeeraan bọ Ọmoogh-we phọ! 11 Kéḍighan aani oḍighi yogh ạraraar ufiri phọ igey iimuma rémuum bọ. Ịsighe ghan ghụn ịphen phọ emitiom obalelhe. 12 Rꞌọghaaph ghan oghol ạraraar dị bịdi roḍighi ghan esi ịbooghian bịn eḍighi ni umugholoor iboom. 13 Kụ amem lọ ọsighe oomo ạraraar omitiom ạḍiḅaal phọ kụ ẹdi rọmiin ghan ọkaraghi ạroozo phọ ạbidi, 14 ịdi eḍighi bọ tọrobo ịyaar lọ ọkuami ogananami reḍighi ghan ḍịḅaal. Ụtuan ịduon kụ ọḅem bọ sịphe ạḍinya iigbia phọ mọ,

15 Imiigha loor dọl phọ anyina. Kẹ́tol dọl arolologhi, ịtol dọl olegheri ịyaar. 16 ^*Ípeghom ghan ephegh mọony eepoogh lọ nyina ẹmoogh, ịdi eḍighi bọ ịphen ịkaraph ariiḍio. 17 Kéyeela. Ịkparami ghan ghụn ẹwa elegheri ịpe Ọmoogh-we phọ rạwa bọ mọ iḍighi ghan phọ.

18 Kéḍighi rọoko amiim, ọbo kiphiemi ghan bọ inyina. Uwaloor Iigbia phọ ghụn kụ amuza ghan loor phọ anyina! 19 ^*Oniin ạghaaphan ghan nyoniin ọnhu ạsuor aruukuan rꞌọḍe rꞌoboom Ẹnaan! Ịmoor ghan sụor aruukuan rꞌọḍe kụ eboomiom Ọmoogh-we phọ sịphe iloghi phọ anyina. 20 Ikol ghan oomo ạraraar ẹngo ḍịseph Ẹnaan Ọde phọ esi aḍien phọ ạJizos Kraist Ọmoogh-we phọ ayira.

21 Ịdipho nyina ẹlogh bọ eghuan Kraist, oniin asooromi ghan loor ạngo nyoniin!

22 ^*Nmạriir ilom, isooromi ghan loor ẹngo burulhom mọ anyina, ịdipho nyina esooromi bọ rẹngo ghan Ọmoogh-we phọ, 23 ịdi eḍighi bọ olhom mọ kụ ạmoogh ạnir phọ, ịdipho aKraist ạmoogh bọ bụo ạsiosi phọ, kụ aKraist rꞌaloor ọdi kụ Ọpelia ạbuo ạsiosi phọ oḍighi bọ loor phọ ọdi. 24 Ịdipho ạbuo ạsiosi phọ osooromi bọ loor ọngo Kraist kụ ịdi ạnmariir ilom kọtuugh osooromi loor esi oomo ạraraar ọngo ghan burulhom mọ ạbidi.

25 ^*Burulhom, ịpomoghian nmạriir phọ anyina, ịdipho aKraist ạphomoghian bọ bụo ạsiosi phọ kụ ạtuan bọ amughanaan. 26 Ọdi aḍighi ịphen phọ ọbo ọdi ạsighe ikpo ọnhu phọ ọdi awurom bụo ạsiosi phọ mụum awoph ạḅaalami ạḅogh ạlogh ḍịghaagh Ẹnaan, 27 ọbo ọdi ạsighe sịosi dị ạmaar ạnighe, aakuan aseleman, dị rꞌịyaar ị́biph, esi ị́ikpurughan, rꞌịnon ịiḅughuḍian ílho, ạmeremian egbodo phọ ọdi. 28 Ịduon kụ iḍighi kụ ẹkpe ni dị aburulhom kọphomoghian nmạriir ạbidi ịdipho aloor phọ ạbidi. Oye dị ạphomoghian ạnir ọdi mạphomoghian loor phọ ọdi. 29 Oye ólho dị mạlhogh ghan ḍien loor ọdi. Ọdi rạngo ghan ghụn ni eḍien kạmaar ghan aphogh, ịdipho aKraist rapogh ghan bọ bụo ạsiosi phọ, 30 ịdi eḍighi bọ yira kụ ariisi aloor phọ ọdi. 31 ^*Ịdipho ạḍinya iigbia phọ rẹḅem ghan bọ mọ, “Loor ịduon phọ kụ ẹdi oye kạtuan ạgbatanaan ọde rꞌonhiin ọdi kụ ạḅophan rꞌạnir ọdi, kụ ịyal phọ ạbidi koḍighi iniin iphulupul.” 32 Ọghaaph phọ ọphon ạgba ni iboom igey agananami, kụ mị alegheri ni bin mụo ạmi mọ ḍịen kụ ạdol phọ aKraist odimom bọ bụo ạsiosi phọ. 33 Ịduon phọ ịkpulughiom aani ni inyina. Tọrobo ọnyo anyina ạphomoghian ghan ạnir phọ ọdi, ḅịle kẹn tọrobo ạnir ạlogh ghan ni eghuan olhom mọ ọdi!