Oniin arool ghan ni ịiḅaghami oniin!
6
Bụo asiya, eḍighi ịyaar dị nyina ẹmiinom ọnyo anyina dị rạpioman, bụphe odimom bọ Uwaloor Iigbia phọ ọphoomi ni loor ọmagh nyọdi oḅulemi! Imiigha loor ọbo nyina kemeel aani ghan bọ eḍighanaan ọdegh ophogh. 2 Oniin arool ghan ni ịiḅaghami oniin, pịdi nyina emuneni iilogh phọ aKraist! 3 Oye dị ịyaar ụ́man kụ agbiighiom ologhi mọ ọno ạman ni mạar, pọ ọdi rabia ni loor. 4 Tọrobo oye ạmaar ạaḅeghion ẹzo phọ ọdi aphogh! Kụ kpạripe rꞌọsighe aloor phọ ọdi ọmaaniom ọnon oye, ọdi ạsighe ghan ghụn ologhi ọdi kụ amitenom ezue! 5 Uwo ịiḅaghami ọdi kụ katool li ịiḅaghami ọdi.6 Oye phọ ọpo rọtughemi bọ ọghaaph phọ Ẹnaan adi ghan ni bin igey ạraraar phọ ạngaani ọtughemia phọ ọdi!
7 Kébia loor. Ẹnaan rọ́nmoghoghoom ghan. Tọrobo ịlo oye phọ aḅeph kụ ịdi ọdi kạtuugh ni abugha. 8 Oye lọ aḅephenaan iphulupul phọ ọdi, kabugha ibugha aḍuugh. Oye lọ aḅephenaan Uwaloor phọ, kabugha ibugha aghuḍum kꞌagee-pọ. 9 Kụ oḍighi ghan iiḅi iyira kị́pher! Eḍighi ịyaar dị yira ọman úpogh, pọ emunughan mem mọ yira kobugha ni ibugha phọ. 10 Loor ịphen phọ, ọony eepoogh lọ yira ọmoogh, oḍighi ghan ni iiḅi tọrobo oye, kụ ẹkaraghi ẹkpaariom esi ạbuo asiya phọ momeeraam aani bọ!
Oroma ogonaam aloor rꞌiipuruan
11 Ịmiin ịdi ikpo ạraraar phọ mị rạgeom bọ ḍịghaagh phọ ạmi kiruom inyina ebagana yogh. 12 Bụphe ẹḅeeraan bọ ọloghoḍian arelegh dị awe kọmiin ghan ọseph bịdi kụ rịkpaariom ghan bọ inyina mọ iḍuna yogh phọ. Ẹmhu phọ ịduon. Bịdi rokiilaan ghan mọ kọtuan ḍuugh egbo phọ aKraist sịphe oreeny phọ ọgbiphoghom bụno. 13 Ghạlamo rꞌạbuphe roḍuna yogh ghan bọ kẹn ni róoko ghan Ologh phọ. Bịdi rọwa ghan mọ iḍunogh inyina, ọbo bịdi ootuma ghan mọ nyina memeeraam aani ọlogha elegh phọ ẹphen. 14 Kụ ạmi ạmi, mị kaboom ghan ịminimiin phọ ịpe ạJizos Kraist Ọmoogh-we phọ ayira ụtuan bọ ịmi ạmiinom sịphe oreeny phọ bịn, ịdi eḍighi bọ ọtuan esi ịminimiin phọ ọdi aḅirini phọ ịmi ụ́moogh mun, mị kẹn ụ́moogh mun rụuphua aḅirini phọ. 15 Oḍuna rꞌọrolom oodu ị́moogh ịyaar oḍighinom. Akumoom aghuḍum mọ kꞌẸnaan kụ aḍighi ghụn ni ephigh. 16 Ẹepho rꞌọnma ighirigiir kụ ẹrolonaan ọkaraghi aweye Ịzirel phọ Ẹnaan, rọdaph bọ eḍighinom ịyaar phọ ẹphen.
17 Emiigh kꞌạnyiidipho ẹghiom ghisigh, oye ịmi kụ́uḅaghami mun, ịdi eḍighi bọ aruuḅulha phọ edi bọ loor phọ ạmi reḍeenaan ghan rukumuan phọ mị akumuan bọ rạngo Jịzos.
18 Bụo asiya, ooḅi ọghor phọ kꞌạJizos Kraist Ọmoogh-we phọ ayira, ạrolonaan oomo phọ anyina! Ẹrol li ịdipho!