Awe oḍighi Ẹnaan
3
Bụo asiya, mị ụ́kaaph mụdi nyina elegheri ni rạraar uwaloor phọ, mị ụghaaph mụdi nyina aweye dị ẹphamanam rụuphua iphulupul phọ, mụdi nyina ạnmuny ịbaam-ọman aKraist. 2 *Mị iikonomom inyina mạmaam. Nyina kẹ̋manam olhe eḍien, ghạlamo kꞌarodon phọ ni, 3 ịdi eḍighi bọ nyina ẹpamanam ni rụuphua iphulupul phọ. Ịdipho ẹḍim mọ rꞌịgbaragbara phọ edi bọ ni sịphe ogbo phọ anyina, pọ nyina edi ni dọl oopho awe phọ, ẹḅile ni ẹpamanam rụuphua iphulupul phọ. 4 *Mesi bọ dị oniin rạḅem ghan mọ, “Mị rạdaph Pọl,” oniin mọ, “Mị rạdaph Ạpolos,” pọ nyina ẹpamanam ni dọl awe aḅirini phọ.5 Nyina ịmiin eeghe loor Ạpolos? Nyina ịmiin eeghe loor ạPol? Yoor phọ ạbudi Ọmoogh-we phọ ạḅogh bin oḍighi phọ ạlogh rạghaagh kụ nyina ẹtuan bọ ẹmoogh omeeraam mọ. 6 *Mị kụ ụzuph bọ ịizupha phọ, Ạpolos aaḍuom ghan mụum, kụ Ẹnaan kụ iphophe bọ. 7 Ọpo ạzuph bọ rꞌọpo aaḍuom ghan bọ mụum mọ ụ́man ịyaar. Ẹnaan phọ ephophe bọ bịn kụ ịman ịyaar. 8 Ọpo ạzuph bọ rꞌọpo aaḍuom ghan bọ mụum mọ ooleeny ni, kụ oye ye kạmoogh ni ịikpia phọ ịpe oḍighi phọ ọdi ạman bọ. 9 Yoor ọḅoph oḍighi rokumu kọngo Ẹnaan. Nyina kụ ịizupha ozo phọ Ẹnaan.
Nyina kẹn kụ otu dị Ẹnaan rẹlogh. 10 Mị ụsighe ịikpo phọ Ẹnaan ịngo bọ ịmi kụ aphighiom bọ otu phọ ịdipho ọloghom ruutu dị ạmaar oḍighi, kụ ọnon oye mamiigh sịphe phọ kụ ạlogh rạkiom. Kụ tọrobo oye amiigha ni loor esi ạraraar phọ dị rạloghom bọ otu phọ, 11 ịdi eḍighi bọ ẹnon ephighiom dị oye katue apighi ílho mun dị epel Jịzos Kraist! Ọdi kụ ephighiom mọ mophighi bọ. 12 Buniin rọsighe ghan rạraar dị rẹkpo ghan ịdipho agol mꞌasilva mꞌọgiata kụ omiighom sịphe ephighiom mọ ọlogh rọkiom. Buniin romiighom ghan ireeny rꞌạroogho rꞌịipeeph. 13 Kụ ḍio phọ aKraist katu bọ ịiḅeghion phọ, kọmiin ni ịlo oḍighi ạtorobo oye ạman. Ọdi kạsighe nịan kụ ạaḅeghionom ạmiin ịdi oḍighi phọ ạtorobo oye ạman. 14 Kụ oye lọ ạnian phọ íle aani oḍighi ọdi kạmoogh ni ruunmo. 15 Kụ oye lọ ạnian phọ ele oḍighi phọ ọdi kạmoogh ni muphe, kụ ọlo ẹmhu phọ ọdi bịn kụ kesoor, ẹnon ịyaar késughanaan nyọdi.
16 *Nyina ke̋lhoghoma mọ Uwaloor Ẹnaan phọ atugh loor anyina ḍụghum? Ḅịle kẹn mọ nyina kụ otu ịiḅereghi phọ ọdi? 17 Ẹnaan kepiemi ni oye lọ aphiemi otu ịiḅereghi phọ ọdi ịdi eḍighi bọ otu ịiḅereghi phọ ọdi esi iigbia ni, kụ nyina kụ otu phọ ọpo phọ.
18 Kébia loor anyina. Ọnyo anyina lọ ạsighe dọl aḅirini phọ ọphon kụ agbiighiom mọ ọno uwo ologhi ni, pọ aghola ḍien elegheri ịyaar, ọbo ọdi ạsu aani ologhi! 19 *Ịpe awe aḅirini phọ ogbiighiom bọ mọ olegheri ịyaar phọ, pọ elologhi esi Ẹnaan. Ịdipho ạḍinya iigbia phọ ẹḅem bọ, “Ẹnaan rẹsighe ghan olegheri ịyaar ạbuo igbogh iloghi phọ kụ kẹḍaaghiom bịdi.” 20 *Kụ ẹnon esi ẹḅile kẹn ni ẹḅem mọ, “Ọmoogh-we phọ alegheri ni mọ ịitughian ạbuo igbogh iloghi phọ ị́moogh ịyaar oḍighinom.” 21 Oye kúbaga ghan ịlo awe kotue oḍighi. Ọkaraghi igey, oomo ạraraar ịlo anyina ni. 22 ẠPol rꞌẠpolos rꞌaPita; aḅirini phọ ọphon rꞌaḍuugh rꞌaghuḍum; ịphen ạnyiidipho rꞌịlo edi risigh — oomo phọ ịphen phọ ịlo anyina ni, 23 kụ nyina phọ ạbuo aKraist, ḅịle kẹn aKraist phọ ọlo Ẹnaan.