Yira mọḍua kꞌaḍuugh otigheel kꞌaghuḍum esi aKraist
6
Yira kọkaaph bọ eeghe nụun? Ọrol dọl ịkaraph phọ ayira ọghiom ghisigh, ọbo ọnma ighirigiir phọ Ẹnaan ạbalabala ḍụghum? 2 Kị́dipho. Ịkaraph iyira ị́moogh mun. Esi ịkaraph phọ yira momugh. Ịlo ayira ríḍigh mun ọtomaam ịkaraph. 3 Nyina ílegheri ḍụghum, mọ oomo phọ ayira owurogh bọ mụum mọ ọḅophoghan Jịzos Kraist, ọḅaram aani ni ọḅophoghan omugh aḍuugh phọ ọdi? 4 *Mem mọ uwurogh bọ iyira mụum mọ, yira uphin aani ni bin aḍuugh phọ aKraist kụ orelhian nyọdi oḍigh aani oḍi phọ ọdi, ọbo yira ọtuan ịdipho ịikpo eghuan Ọde phọ eḅeton bọ Kraist sịphe aḍuugh phọ ọmoogh aani kumoom aghuḍum.5 Kụ ịdipho yira mọḅophoghan bọ nyọdi omugh aani ḍuugh dị ẹghigh ḍịphe ọdi, yira kọḅophoghan kẹn ni rꞌọdi oḅerenu aani eḅetenuom dị ẹghigh nyẹpe ọdi. 6 Yira olegheri ni mọ ụḅaram aani ni igbaany ạroozo phọ yira ọrolom ghan bọ rꞌạJizos kụ oghiigh bọ sịphe oreeny phọ, ọbo ophiemi ịikpo phọ ịpe ịkaraph ẹsighe bọ ikpobiom iyira eḍighi rẹbene phọ ọdi. 7 Oye phọ romugh bịn makpetenaan ịikpo phọ ịkaraph ẹmoogh bọ. 8 Ịdipho yira mọḅophoghan bọ Kraist omugh, yira omeeraam ni mọ yira kọtolan ni nyọdi. 9 Yira olegheri ni mọ ịdipho moḅeton bọ Kraist sịphe aḍuugh phọ, ọdi kámugh mun. Aḍuugh ị́moogh mun ịikpo okpobiom ọdi. 10 Aḍuugh phọ ọdi amugh bọ ạḍio ophiemiom ịikpo ịkaraph mem bịn ḅeer ọmadan. Ḅịle, aghuḍum mọ ọdi odimom bọ nyịidipho ạkuo oghueniom Ẹnaan. 11 Igina phọ kẹn kụ ịdi nyina kẹetughian ghan mọ aḍuugh phọ nyina emugh bọ ạḍio ophiemiom ịikpo ịkaraph, kụ nyina mẹḅophoghan Jịzos Kraist edimom ghuḍum oghueniom Ẹnaan.
12 Loor ịphen phọ, ịkaraph ruzu-ạnyu phọ anyina kị́moogh mun, ọbo nyina kẹḅile ghan kẹn ẹnaghanan ịkaraph ạruuphua phọ ạbidi. 13 Kémeera mun ẹḅogh rꞌeniin esi aloor anyina ẹngo mọ ịkaraph ẹsighe eḍighinom ịlo ị́nighe. Ịḅogh ghụn loor phọ anyina ẹngo Ẹnaan, ịdipho awe dị mosi ni kụ origheel. Rꞌesi aloor anyina kísugha ọngo Ẹnaan, ọbo ọdi ạsighe aḍighinom ịpe ẹnighe bọ! 14 Ịkaraph inyina kíkpobiom mun, ịdi eḍighi bọ iilogh phọ inyina íkpophonom mun, ọnma ighirigiir Ẹnaan phọ kụ riphogh inyina.
Ạrebene aruukuan
15 Koḍighi bọ ika nụun? Yira kọtuan ịdipho iilogh phọ iyira íkpophonom mun bọ, ọnma ighirigiir phọ Ẹnaan kụ ruphogh bọ iyira bịn oḍighi yogh ghan ịkaraph ḍụghum? Tạa, ịlo ayira ríḍigh. 16 Nyina ílegheri mọ oye lọ nyina esooromi loor anyina ẹngo rẹnaghanan ghan, pọ nyina meḍighi rẹbene oye phọ ọpo phọ, ḍụghum? Iikia ílho ịphen phọ, mọ nyina rẹnaghanan ghan ịkaraph phọ kirorori bọ inyina esiemi kꞌaḍuugh, mọ nyina ekumu rẹngo ọnaghanan ạḍughum mọ kirorori bọ inyina esiemi kꞌaruukuan. 17 Kụ ạḍiseph ẹrolonaan ni Ẹnaan, ịdipho mem dị meten nyina eḍighi bọ ni rẹbene ẹngo ịkaraph kụ eru ẹteeny mem dị nyina ẹsighe ni oomo iloghi anyina ẹnaghanan igey phọ ịpe ịtughemi bọ inyina. 18 Ịtagharan ni inyina ọsighe ḍịghaagh ịkaraph kụ nyina eḍighi rẹbene ẹngo ruukuan. 19 Mị ụtuan dị ọnaghanan ạḍughum mọ anyina aghom bọ kụ mị ạkaaph ghan bọ ịphen ịsien ade awe phọ kụ rạmaaghiom. Amem ịrol li dị nyina elegheri bịn ẹḅogh loor anyina eḍighi rẹbene ẹngo ipesi rꞌạsipioghom dị epu sịpioghom. Igina phọ kẹn kụ ịdi nyina kelegheri ẹḅogh loor anyina nyịidipho eḍighi rẹbene ẹngo ruukuan ewopha yogh ẹḅaal aani.
20 Mem mọ nyina eḍighi bọ rẹbene phọ ẹngo ịkaraph, ologh aruukuan inyina ípuru. 21 Nyina eḍighi yogh ghan bọ rạraar phọ nyina rekiilom bọ umugholoor phọ nyịidipho, nyina ịmooghom eeghe ạsuo? Aḍuugh kụ ạsuo ạraraar phọ ịpe phọ. 22 Kụ nyịidipho mịtagharan bọ inyina ọsighe ḍịghaagh ịkaraph, nyina meḍighi rẹbene ẹngo Ẹnaan. Owopha yogh ghan ọḅaal phọ kụ ạsuo phọ anyina, kụ aruukuna phọ aghuḍum kꞌagee-pọ. 23 Ịikpia phọ ịkaraph, aḍuugh; kụ aruunmo phọ kꞌẸnaan, aghuḍum kꞌagee-pọ, dị rạtuan ghan Jịzos Kraist Ọmoogh-we phọ ayira kụ karu.