ẠJizos kụ ọkar oozin avain phọ
15
“Mị kụ ọkar oozin avain phọ. Ọde phọ ạmi kụ rạkoy ghan bọ ịla avain phọ kaselemi. 2 Sịphe aloor phọ ạmi, ọla lọ úmuum iimuma, ọdi kasoph ni atoph, kụ ọla lọ amuum iimuma kaselemi ni, ọbo ạḅile ghan amuum apu pạ. 3 Ọghaaph phọ mị mịḅeni bọ inyina mịḅaalami ni inyina etu eten. 4 Ịrolan ịmi mị kịrolan ni inyina. Ịdipho ọla phọ bịn kátue bọ amuum iimuma, emuton lọ odi aani sịphe aloor avain phọ; ịduon phọ kẹn kụ ịdi nyina kémuum iimuma, emuton lọ nyina ịrolan ịmi. 5 “Mị kụ oozin avain phọ, kụ nyina kụ ịla phọ. Oye lọ ụrolan ịmi kụ mị ạrolan nyọdi, ọdi kụ kamuum onugu iimuma. Nyina ịmi ị́rolan, nyina kétue eḍighi ịyaar. 6 Tọrobo oye lọ ịmi ụ́rolan, kosoph ni nyọdi ịdipho ọla oreeny otoph; kụ rẹgharaghar kụ ookpomoghi ọdo phọ ịla phọ ịphen phọ oguom nịan. 7 Nyina ịrolan ni ịmi, ḅịle ọghaaph phọ ạmi ạrol sịphe iloghi phọ anyina, pụruku ịyaar lọ nyina ẹlom, nyina kẹmoogh ghan. 8 Nyina emuum onugu iimuma, kẹngo ni eghuan Ọde phọ ạmi, kụ nyina ẹtuan ịduon phọ ẹtol dọl phọ ạḍiphe ẹkpe bọ bụmatuan phọ ạmi. 9 Ịdipho Ọde phọ ạmi ụphomoghian bọ ịmi kụ ịdi mị ạtuugh ni ịphomoghian aani inyina. Ịtolom ẹphomoghian phọ ạmi. 10 Nyina eeko iilogh phọ ạmi, nyina kẹtolom ni ẹphomoghian phọ ạmi, ịdipho mị maako bọ ni iilogh Ọde phọ ạmi kụ odimom bọ ẹphomoghian phọ ọdi.
11 “Mị mạghaaph ịphen phọ ịḅeni inyina, ọbo iboh phọ ạmi ịrolan inyina, ḅịle kẹn iboh phọ anyina emunughan. 12 *Ọphon kụ ologh phọ ạmi mọ oniin ạphomoghian nyoniin, ịdipho mị ịphomoghian bọ inyina. 13 Ẹphomoghian ílho ghan dị ẹbugh epu nyẹpe oye dị aghol rịghiri ọdi bịn aphiemi ghuḍum ọdi. 14 Nyina kụ ạrighiri phọ ạmi, eḍighi ịyaar dị nyina eḍighi ghan ịlo mị ạto ịḅeni inyina. 15 Mị inyina kíghol mọ ạrebene, ịdi eḍighi bọ ẹbene rálegheri ghan ịpe Ọde-otu phọ ọdi raḍighi bọ. Mị kighol ghụn inyina mọ ạrighiri ạmi loor esi dị oomo phọ ịpe mị ạnaghan bọ esi Ọde phọ mị mịḅeni ni inyina. 16 Nyina kụ ịmi ị́saḅar, mị kụ ịsaḅar ri inyina, ạḅile ịma inyina, mọ ịki emuum ọdo iimuma dị kẹkpooghi ni, ọbo Ọde phọ ịngo ghan inyina tọrobo ịyaar lọ nyina eghol ḍien phọ ạmi kụ epuru nyọdi. 17 Mị rịkpaariom ni inyina mọ iḍighi ịphen phọ, pịdi oniin ạphomoghian nyoniin.”
Aḅirini phọ ịlogh ni inyina ḍien
18 “Eḍighi ịyaar dị aḅirini phọ ịlogh inyina ḍien, ilegheri ni mọ mị kụ ọḅel ọdi ọlogh ḍien. 19 Mọ nyina ạbuo aḅirini phọ, ọbo aḅirini phọ mịphomoghian ni inyina mụdi awe ọdi. Kụ mị mịsaḅar inyina bịn nyina kạ́buo aḅirini phọ mun. Ịduon kụ iḍighi kụ aḅirini phọ ịlogh bọ inyina ḍien phọ. 20 *Ịkiom ologhi ịpe mị ịḅeni bọ inyina mọ ẹbene rápu ghan ọde-otu phọ ọdi. Bịdi ụgbiphoghom ịmi, pọ bịdi kịgbiphoghom aani ni inyina. Bịdi ọnaghanan ọghaaph phọ ạmi, pọ bịdi kọnaghanan aani ni nyọpo anyina. 21 Kụ bịdi kiḍighi ni inyina oomo phọ ịphen loor ẹmhu aḍien phọ ạmi, ịdi eḍighi bọ bịdi úlegheri nyọpo urom bọ ịmi. 22 Mọ mị mútu bọ ụkaaph ụḅeni bịdi, ọbo ologh ịkaraph músiph bịdi, kụ nyịidipho ẹmhu oghol kụ ọwilenaan ạbidi ílho mun. 23 Oye lọ ụlogh ịmi ḍien mạlhogh aani Ọde phọ ạmi ḍien. 24 Mọ mị mụ́tol bọ igbo phọ ạbidi oḍighi yogh iiḍighi phọ ịpe ọnon oye kꞌekulha úḍighi bọ, ọbo ologh ịkaraph músiph bịdi, kụ nyịidipho bịdi mọmiin ịpe mị aḍighi bọ kụ mụḅar ịmi rꞌỌde phọ ạmi ọlogh ḍien. 25 *Kụ ịphen phọ kemiteghu ni, ọbo ịpe ọge bọ sịphe iilogh phọ ạbidi emunughan mọ, ‘Bịdi opu ni bịn ụlogh ịmi ḍien dị mị ịyaar ụ́piom.’