Okel Jịzos ẹpe Nạzeret
6
Kụ ạJizos ạḍua ẹpe phọ arigheel ẹmha ọdi, kụ ạbumatuan phọ ọdi ụdaph aani ni nyọdi. 2 Kụ rẹteeny ḍio ophooghian phọ, kụ ọdi amiigh ọtughemi ịsiphe obughotu phọ, kụ aḍita ạbuphe ọnaghan bọ ịtughemi phọ ọdi usinighian ni kụ ọḅem mọ, “Oye phọ ọphon ạghi ẹghen kụ alegheri bọ ịphen phọ? Ọphon ọngo bọ nyọdi ọghen ọdo olegheri ịyaar? Esi ịghen ịikpo kụ ẹdi ọdi raḍighinom ghan bọ ọdo phọ ịiḍaany phọ ịphen? 3 Ọphon phọ ḍịen kọ́kaam-ạmaka phọ, ọony phọ aMeri, umor phọ aJems rꞌạJosef rꞌaJudas rꞌaSaimon? Bụen rꞌayira odi bọ sịen, kábumarani phọ ọdi?” Kụ bịdi ughel li Jịzos.4 *Kụ ọdi ạḅeni bịdi mọ, “Oyil ólho ghan dị eghuan ụ́moogh, emuton ẹmha phọ ọdi rꞌeghunotu phọ ọdi rꞌọto ọdi.”
5 Kụ ọdi ọ́kar oḍighi ịiḍaany ẹpe phọ, emuton ọozuogh ịyal-ikpo ạbudi úmoonogh bịn oḍume. 6 Kụ ẹmoogh omeeraam mọ ạbidi ịngo ni nyọdi iikia.
ẠJizos ạmagh ḍioph rꞌịyal ạbumatuan phọ aaromogh sidom
Kụ ạJizos ạḍua arelhe yogh rạmha phọ kụ ạtughemi ghan. 7 Kụ ọdi ạmagh ḍioph rꞌịyal ạbumatuan phọ aakpomoghi kụ ạlogh ịyal yạl ekpisi, kụ ạngo bịdi ịikpo ophoroghom ịkaraph aruwaloor. 8 Kụ ạphur bịdi rụru mọ, “Omuton ịkpara bịn ẹnon ịyaar kẹ́pam, mꞌeḍien, mꞌokuru, mꞌoḍigh ikpoki. 9 Ịloghoḍian rokoro, kụ ịyal ạrusuoma kẹ́kpologhian.” 10 Kụ ọdi ạḅeni bịdi mọ, “Otu lọ nyina eḍigh ịtol li, tụtu ẹteeny mem lọ nyina kẹḍua ẹmha phọ ẹpe. 11 **Kụ ẹmha lọ nyina ẹghi esi kụ inyina ị́sighe ịnaghanan, pọ rẹḍua ịikpa ịisaar aruwol phọ anyina eseere, ẹsighenaan ḍiigira ọnhu anyina.”
12 Kụ bịdi ọghi ọghaaph ghan mọ awe okiton esi ịkaraph phọ ạbidi. 13 *Kụ bịdi ophorogh yogh ịminighan aruru, kụ ọsighe ghan elo ogbulogh ịminighan ạbudi asiloor ímoonogh oḍume yogh.
Ịdi oghiigh Jọn, oburogh mụum mọ
14 *Kụ ạHerod ọdaam ẹmha phọ ạnaghan ni ịlo ịphen phọ, ịdi eḍighi bọ aḍien phọ ạJizos meeleghaan. Buniin ụḅem ghan mọ, “Ọdi ạJon oburogh mụum mọ, kụ maḅetenu sịphe aḍuugh phọ. Ịduon kụ iḍighi kụ ịikpo phọ ịphen reḍighi bọ oḍighi phọ ọphon loor ọdi.” 15 Buniin ọḅem ghan mọ, “Ilaija”, bụeri mọ, “Oyil, ịdipho oniin ọnyo ariil aḍiodiidi phọ.”
16 Kụ mem dị ạHerod ạnaghan bọ ịphen phọ kụ ạḅem mọ, “Oye phọ ọphon ạJon oburogh mụum mọ mị asoph bọ ẹmhu phọ kụ maḅetenu sịphe aḍuugh phọ.” 17-19 *Ọdi ạghaaph ịduon esi okaphian oomiigh ịpe ọdi aḍighi bọ. Mem dị meten ọdi ạar Hẹrodias, ạnir aFilip umor ọdi, aphin. ẠJon ạḅeni ghan Hẹrod mọ ị́kpe ịduon ọdi ạsighe bọ ạnir umor phọ ọdi aphin. Esi ọḅaalami ologhi ạHerodias, ạHerod arom ni osiph Jọn ọlogh ikoli. ẠHerodias ạlogh Jọn ḍien, kụ ạwaaghi ghan ịlo oghiigh ọdi, kụ órue, 20 ịdi eḍighi bọ ạHerod aghueni ghan ni Jọn, mọ ọdi ogey oye rꞌoye aruukuan, kụ ạphel nyọdi ạsighe. Tọrobo amem dị ạHerod ạnaghan ọghaaph phọ ọdi, ịiḅaghami ghan ni ịitughian ọdi, kụ ọlo ísophoghom ghan nyọdi ọnaghanam rꞌọphalaḅaal ologhi.
21 Eepoogh ịrolonaan ni Hẹrodias, ḍio dị ạHerod aagbologh rạalha rꞌạbuo ạrumhu awe ẹgham rꞌikpolom awe ạbuo aGalili, kụ ạko bịdi igoni ọotughianam aḍio phọ ọmar bọ nyọdi. 22 Ọnyani ạHerodias aru ni aḍigh kụ ạgher ịḅa, kụ ạḅeeraan Hẹrod rꞌaruuruen phọ ọdi iboom. Pọ kụ amem dị ọdaam ẹmha phọ ạḅeni ọnyani phọ mọ, “Zụa tọrobo ịyaar lọ ẹḅeeraan nyịna, mị ạkuom nyịna.” 23 Kụ ọdi aghunya mọ, “Ịyaar lọ nạ ạzua kụ ẹdi mị kạkuom ni nyịna, ghạlamo rꞌạpakiri eelhe phọ mị ạda bọ.”
24 Kụ ọnyani phọ ạghi apuru onhiin phọ ọdi mọ, “Mị ụzua eeghe?”
Kụ ọdi mọ, “Zụa ẹmhu ạJon oburogh mụum mọ.” 25 Kụ ọnyani phọ aagborion aḅula egina amem, kụ ạḅeni ọdaam ẹmha phọ mọ, “Mị rạwa mọ nụun ạsighe ẹmhu ạJon oburogh mụum mọ, ạlogh ẹteleleeny ụngo ịmi.”
26 Kụ ẹngo ọdaam ẹmha phọ oboom ọto, kụ ọdi ọ́wa ọka ọnhu phọ ọdi, loor iikunya phọ dị maghunyian bọ pạ arisigh aruuruen phọ. 27 Ọdaam ẹmha phọ arom oye ẹgham, mọ ạghi asoph ẹmhu phọ ạJon ạsighe aru. Kụ oye ẹgham mọ ạghi ẹpe otu ikoli phọ asoph ẹmhu phọ ọdi, 28 ạlogh ẹteleleeny aruom ọnyani phọ. Kụ ọnyani phọ ạsighe ạghiomonaan onhiin phọ. 29 Kụ mem dị ạbumatuan phọ ạJon ọnaghan bọ ịphen phọ, bịdi ụghi ni ọsighe ḍizu phọ ọdi, ọghi oḍi.
ẠJizos ạperemi eḍien oogh ọonir awe
30 Kụ abutelhedom mọ ookpomoghan esi ạJizos, kụ ọghaaph oomo phọ ạraraar phọ bịdi oḍighi bọ, ọḅile bọ ọtughemi, ọḅeni nyọdi. 31 Kụ ọdi ạḅeni bịdi mọ, “Itu ọwile we phọ ọghi ekpisi dị enamian ophooghian ẹnum amem!” Ịyaar phọ eḍighi bọ bịdi ụ́moogh rꞌeepoogh olhe eḍien, loor esi dị buniin rotu, buniin rokeel. 32 Kụ bịdi oḍigh oghuugh, kụ ọghi ekpisi dị enamian kụ bịdi bịn ọrol.
33 Kụ ịbadi awe ụmiin ni bịdi mem mọ bịdi rọḍua bọ, kụ ọlogh bịdi elegh, kụ awe ọḍua ẹpe oomo ạramha phọ oogborion okiton owol ade, osoph bịdi osoor. 34 *Ọdi rasul, bịn ạmiin ḍiboom aḍita awe, kụ ọdi ạmoogh igbiririph ạbidi, loor esi dị ọkighogh ịdipho iyool-ịga dị opoghom úlho, kụ ọdi amiigh ọtughemi ạbidi ịminighan ạraraar. 35 Kụ mem dị adulhe retu, kụ ạbumatuan phọ ọdi ọghi ọḅeni nyọdi mọ, “Ẹphen kẹ́mha, kụ adulhe retu. 36 Ḅẹni we phọ mọ bịdi ọghi ẹpe ạsiraaghana phọ rꞌạramha phọ etuman bọ sịen, ogho ịyaar olhe.” 37 Kụ ọdi ạphagharanaan mọ, “Nyina kụ ịngo bịdi ịyaar olhe!”
Kụ bịdi opuru nyọdi mọ, “Yoor ọsighe ịyal okuron ipoḍi asilva oghoom eḍien ọngo bịdi olhe ḍụghum?”
38 Kụ ọdi apuru bịdi mọ, “Nyina ẹmoogh bọ ika iiḅoghoḍi ạbred? Ịki ephogh!”
Kụ bịdi ọki opogh oḅula, kụ ọḅeni nyọdi mọ, “Oogh, rꞌịyal ina.”
39 Kụ ạJizos ạḅeni bụmatuan phọ ọdi mọ ọḅeni oomo awe phọ mọ ọrologhu ude rụuku, sịphe ạtugbiir ạroogho phọ. 40 Kụ bịdi ọrologhu ude rụuku, oniin okuron ẹku, ooghdi ẹku. 41 Kụ ạJizos ạsighe oogh phọ iiḅoghoḍi ạbred phọ rꞌịyal phọ ina phọ, kụ aphogh ạnyu ạke, kụ ạngo ḍịseph Ẹnaan, kụ ạparion, kụ ạsighe ạngo bụmatuan phọ mọ odiemi ḍita awe phọ, kụ adiemi kẹn oomo phọ ạbidi ịyal phọ ina phọ, 42 kụ oomo phọ ạbidi olhe ẹpherogh. 43 Kụ ọson ipoḍi phọ esugha bọ, kụ emuza ḍioph rꞌịyal ạrigiel. 44 Kụ bụphe olhe bọ iiḅoghoḍi ạbred phọ ọman bọ oogh ọonir alephiri.
ẠJizos atelhe ạnyu ạmuum
45 Kụ ạJizos ạkpaariom bụmatuan phọ, mọ oḍigh oghuugh ọḅeeny ophun ḍịeri phọ ạḍighaagh phọ, oḍiemi ghan ẹpe Betsaida, mọ ọno kạḅeni we phọ mọ ogheleghu. 46 Kụ rọḅeni bọ we phọ mọ ọmaar ọrol, kụ ạghi ẹpe ẹeḅaraph phọ ọoḅereghi. 47 Meghul li, kụ oghuugh phọ asi ẹpe ogbo ọphiiny phọ, kụ ọdi bịn kụ asugha ẹpe ạnyu ade phọ. 48 Kụ ọdi ạmiin dị bịdi rọmiinom ịzoghi, ịdi eḍighi bọ oghim ạda bịdi. Kụ rẹteeny eḅon ạḍiroor, kụ ọdi arelhe ạnyu ạmuum mọ, ịlo ọghuuraam ạbidi kụ oten. 49 Kụ mem dị bịdi ọmiin bọ nyọdi dị ratelhe bọ ạnyu ạmuum mọ, bịdi ugbi mọ oḍim, kụ ọlooghi, 50 ịdi eḍighi bọ oomo phọ ạbidi kụ ụmiin ni nyọdi, kụ asiloor ạbidi eḍighi nyạam nyạam.
Egina amem ạJizos ạḅeni bịdi mọ, “Iḅio anyina kíkaph. Mị ni. Kékiilaan!” 51 Kụ ọdi ạada aḍigh aani ologhi oghuugh phọ, kụ oghim mọ ạpho. Ịphughanam ni kụ eḍigh ḍiigu esi ạbidi, 52 ịdi eḍighi bọ ụ́naghan ịpe iiḅoghoḍi ạbred phọ, kụ iloghi phọ ạbidi eḍuughi.
ẠJizos aakonom bụdi úmoonogh ẹpe Gẹnesaret
53 Kụ bịdi ụḅeeny ni osul Gẹnesaret, kụ osumughi ịluma oghuugh phọ. 54 Kụ bịdi ropun bọ bịn awe ụlogh ni Jịzos elegh, 55 kụ oghilighuan oomo phọ eelhe phọ; kụ ọsighe yogh we dị úmoonogh ọmuneen yogh rịmina, kụ orool ghan ọwaam tọrobo ekpisi lọ ọnaghan mọ ạJizos odi. 56 Tọrobo ekpisi lọ ọdi ạghi, mꞌạramha, mꞌịphalagbal, mꞌạsiraaghana, bịdi ụsighe yogh ghan bụphe asiloor phọ ị́nighe bọ osereghi igbogh arurugh, kụ ọoḅereghian ghan nyọdi mọ bịdi ọḅogh ghạlamo rꞌạḍimaam ạsuoma phọ ọdi. Kụ oomo ạbudi ọoḅoghogh bọ uḍumogh ni.