Aḍidogh dị ọsighe oḅephom iizo kụ odoghom
4
*ẠJizos amiigh ạḅile rạtughemi pạ oogbom ọphiiny phọ, kụ aḍita dị ookpomoghan esi ọdi ụphughan ni, tụtu eḍighi ịdi ọdi aḍigh ologhi oghuugh, kụ ạrol ude; kụ oomo aweye phọ ọrologhu pạ ọgbal ọphiiny phọ, ẹpe ạnyu ade phọ. 2 Kụ ọdi ạsighe sidogh kụ ạtughemiom bịdi ịminighan ạraraar. Kụ ọdi ạtughemi kụ ạḅem mọ:3 “Ịnaghan! Oḅephom iizo ạghi ooduḍi ịizupha. 4 Kụ sịphe ọdi raaduḍi bọ, iniin imeleghu ọḅuzo, bịn ịnun eru eekpophi ẹminogh. 5 Iniin imeleghu de asighiigh dị ịisaar ị́bugh, kụ íbia bịn ẹraarogh, loor esi dị ọninom ụ́tol. 6 Kụ ogogo rolhom, kụ ạsel ịizupha phọ, kụ loor esi dị sịni ị́moogh bọ bịn ẹnuughi. 7 Iniin imeleghu ogbo iitoor, kụ iitoor phọ esiighi egimi, kụ ịizupha phọ eghurughan yogh bịn iimuma ímuum. 8 Kụ ịpheri phọ imeleghu ḍiiḅi ade, kụ esiighi kụ ephoph kụ emuum iimuma, iniin ịraardi, iniin odiinydi, iniin oniin okuron.”
9 Kụ ọdi ạḅile ạlho ạḅaram mọ, “Ọlo ạmoogh rụru ọnaghanam ạḍughum ạnaghan!”
Ịpe ọtuan bọ kụ odoghogh sidogh phọ
10 Kụ esi dị bịdi bịn odi, kụ bụdi ọrol sịphe rꞌọdi rꞌaḍioph rꞌịyal ạbumatuan phọ upuru ni nyọdi ẹmhu asidogh phọ. 11 Kụ ọdi ạḅeni bịdi mọ, “Mịngo ni inyina olegheri ạraraar ịbooghian ọmar phọ kꞌẸnaan, kụ bụeri phọ oomo ạraraar kọtughemiom ghan sidogh, 12 *ọbo
“‘Ophogh okananaam kọmiin ghan bọ,
ọnaghan ọnaghan kọkpaph ghan bọ ọpam,
ọbo bịdi kokiton ghan bọ esi ịkaraph bịn ọsar ọbilenaan bịdi.’”
ẠJizos ạgba ẹmhu aḍidogh oḅephom iizo phọ
13 Kụ ạJizos apuru bịdi mọ, “Nyina ị́naghan ḍidogh phọ ạḍien? Keḍighi bọ ika kụ nyina ẹnaghan ịpheri phọ asidogh phọ? 14 Oḅephom iizo phọ raaduḍi ghan ọghaaph phọ Ẹnaan. 15 Bụphe ọghigh bọ ịizupha ịpa ọḅuzo phọ, pọ ạbudi ọnaghan ọghaaph phọ, egina amem bịn aSetan atu ạsighe ọghaaph phọ ọzuph bọ sịphe iloghi phọ ạbidi. 16 Bụphe ọghigh bọ ịizupha ịpa ade asighiigh phọ, pọ ạbudi ọnaghanam ọghaaph phọ rꞌọḅaal ologhi, 17 kụ ụ́moogh sịni pạ iloghi phọ ạbidi, kụ omeeraam mọony amem bịn. Mem lọ ịminimiin, mụghumo ịgbiphoghom, ẹtuan ọghaaph phọ eru, bịn bịdi ọkanyanu. 18 Bụphe ọghigh bọ ịizupha ịpa ogbo iitoor phọ, pọ ạbudi ọnaghan ọghaaph phọ, 19 kụ ogbiriḅa ịlo aḅirini phọ, rꞌạḍidugh ẹelha, rꞌạruuphua ịnon ạraraar eḍiku iloghi phọ ạbidi, kụ ọghaaph phọ akurughan bịn iimuma ómuum. 20 Bụeri phọ ọghigh bọ ịizupha ịpa aḍiiḅi ade phọ, pọ ạbudi ọnaghan ọghaaph phọ, kụ ọsighe ọmagh ịyaar kụ omuum iimuma, iniin ịraardi, iniin odiinydi, iniin oniin okuron.”
Aḍidogh ịlo ọtozi
21 *Kụ ạJizos ạḅeni bịdi mọ, “Ọsu ọtozi, kọlogh eeḍian ịdaabili, mꞌọdurukpata ḍụghum? Tọ ọsu ọtozi, kọḅam ạnyu igbogh ịkasi. 22 *Ịyaar dị ookpereghi dị kéganana ílho, ịyaar dị ạaghian dị kólegheri ílho. 23 Ọlo ạmoogh rụru ọnaghanam ạḍughum ạnaghan!”
24 *Kụ ọdi ạḅeni bịdi mọ, “Ịpamanam ịphen nyina rẹnaghan bọ. Nyina ẹlogh ịbam, nyina kẹmoogh ịbam. Nyina ẹlogh iboom, nyina kẹmoogh iboom, kụ Ẹnaan kẹloghonaan ni ọḅar. 25 *Nyọpo ạmoogh bọ Ẹnaan kẹloghonaan ni ọḅar, kụ ọpo ụ́moogh bọ ghạlamo rꞌịyal-ikpo ịlo ạmoogh aani Ẹnaan kẹbonyi ni.”
Aḍidogh ịdi ịizupha resi ghan
26 Kụ ạJizos ạḅem mọ, “Ọmar phọ kꞌẸnaan ạkigh ịduon. Oniin oye ạghi ozo aaduḍi ịizupha pạ ade phọ. 27 Kụ ạnaani ghan ạsuma, bịn ạmiin dị ịizupha phọ mesiighi repophogh, kụ ọdi ólhegheri ịpe eḍighi bọ. 28 Ade phọ kụ iḍighi bọ ịdi ịizupha phọ ẹphur esi ịmiigh, kụ emitiom ipoola, kụ egbi omuum arughuuny. 29 *Kụ iimuma phọ rẹḅaal, kụ akoph elhool ạghi agboom, ịdi eḍighi bọ ibugha phọ mẹteeny.”
Aḍidogh dị ọsighe ekpo ịizupha dị eghom ịikia kụ odoghom
30 Kụ ạJizos ạḅem mọ, “Mị kạmaam ọmar phọ kꞌẸnaan eeghe nụun? Mị ụsighe ḍighen aḍidogh kụ ạghaaphom ịlo aḍiphoph phọ ọdi? 31 Ạkigh ekpo ạmustad, dị ekom epu ịpheri phọ ịizupha ịsien aḅirini phọ, kụ mem dị ọzuph, 32 remite ghan kephoph epu ịpheri phọ ịbam ireeny phọ, kụ kamiteghom ịla rꞌuba dị kạmanam ịnun ọloghoḍi aruutu.”
33 Ịbadi ọdo asidogh phọ ịphen kụ ịdi ạJizos ạsighe ghan kụ ạghaaphom ọghaaph phọ Ẹnaan ạḅeni bịdi, ịpe bịdi kotue bọ ọnaghan. 34 Ọghaaph dị ụ́ḅaram ḍidogh, ọdi ọ́ghaaph ghan ọḅeni bịdi, kụ esi lọ ạbumatuan phọ ọdi bịn odi, ọdi ạgba ghan ni ẹmhu oomo phọ ịdi ạḅeni bịdi.
ẠJizos ạpoomi oghim
35 Dulhe aḍio phọ ạḍiphe, kụ ạJizos ạḅeni bịdi mọ, “Itu ọḅeeny ọphiiny phọ ophun ḍịeri phọ ạḍighaagh phọ.” 36 Kụ bịdi ọwile ḍita awe phọ kụ ọghi oḍiku ologhi oghuugh phọ ạJizos ạrol bọ ọzoghiom rọki, kụ ịnon arughuugh ẹdaph aani bịdi. 37 Kụ oboom oghim aghim, kụ oologh amite, kụ ạmuum mọ maḍiku oghuugh phọ ramuza. 38 Kụ ạJizos ạmina ẹpe eti phọ aḅetenom ẹmhu ọdi rạnaani, kụ bịdi ọsumeeny nyọdi kụ ọḅeni mọ, “Ọtughemia, ḅetenu yoor rope. Ị́kigh ịyaar esi ạna?”
39 Kụ ọdi rọsuma kụ ạḅaam oghim mọ, kụ ạḅeni ọphiiny phọ mọ, “Ḅoorian asereghian!” kụ oghim mọ ạpho, kụ ọphiiny phọ aḅoorian bịn nam. 40 Kụ ọdi apuru bịdi mọ, “Eeghe kụ iḍighi kụ nyina reepuph bọ ịduon phọ? Nyina oḍuom ologhi ị́moogh ni kꞌạnyiidipho.”
41 Kụ aruugu asiph bịdi iboom, kụ oniin apuru ghan nyoniin mọ, “Esi ịphen phọ, ọphon phọ ọghen ọdo oye, dị oghim mọ rꞌọphiiny phọ kụ ẹnaghanan ni.”