Ịiḅereghi phọ aJona
2
Kꞌẹpe eekuna ologhi ọkuruḅaka egbogh ena phọ kụ ẹdi aJona ạaḅereghi Ọmoogh-we Ẹnaan phọ ọdi:2 “Esi amukum ologhi ạmi, Ọmoogh-we, mị ụmagh ni nyịna,
kụ nạ ụphagharanaan ịmi.
Kꞌẹpe eekuna ọmar iḍim,
mị umoghi ni ịlo ẹloghonaan, kụ nạ ụnaghanan ni ịmi.
3 Nạ uroph ni ịmi asumeeny ḍigher,
kꞌẹpe ọlha-ude ọphiiny phọ,
esi dị ạrumuum mọ kụ ikoom ịmi,
kụ oomo oologh phọ ạna uughironom ghan ịmi.
4 Mị ụkar ri agbi mọ muroph ịmi ogbeph
dị kạ́miin mun Otu iigbia phọ ạna.
5 Ạmuum mọ ụminoghom ni ịmi kụ ạḅile aḍiku ịitaku ạmi;
ọphiiny phọ uukpereghiom ni ịmi ạmadan,
kụ ọphurughiom ẹmhu ạmi rọogho ọphiiny.
6 Mị ụghi ni kꞌẹpe ọlha-ude aruugum mọ,
kꞌẹpe ẹmha phọ ọkasaghi bọ rụnhu-aḍibuo phọ ọdi bịn kꞌagee-pọ.
Kụ ọlo nạ, Ọmoogh-we Ẹnaan phọ ạmi,
kụ ụsighe ịmi eye kꞌẹpe aḍigher phọ amitiom.
7 Mem dị mị ạmiin bọ mọ aghuḍum ạmi mạghorom rạḍua,
pọ kụ amem dị mị ụuḅereghi ni nyịna Ọmoogh-we phọ,
kụ sịphe Otu iigbia phọ ạna nạ ụnaghanan ni ịmi.
8 Bụphe rọoḅereghi ghan bọ ịkaaghineen ạrumugh phọ ị́moogh bọ mạar oḍighinom mọ
moghel ọḅogh aloor ạbidi ọngo ạna.
9 Kụ ọlo mị kaboom ni nyịna;
mị kạpighiron ni ẹkia ạngo nyịna
kụ aḍighi ịpe mị maguanaan bọ.
Ạpeleeny rạḍua ghan esi Ọmoogh-we phọ kụ karu!”
10 Kụ Ọmoogh-we phọ agbi ọḅeni egbogh ena phọ mọ etoka Jona ẹpe ọgbal esiḍia phọ, kụ ẹtuugh ịdipho eḍighi.