Ịdi Ọmoogh-we phọ ạphomoghian Ịzirel
54
*Jeruselem, nạ mạrol mụdi ẹ́mar ạnir,kụ nyịidipho nạ kạmoor sụor, ạlho ḍịolho iboh.
Nyịidipho nạ kạmoogh ịbadi ạnmuny
dị opu bụo ạnir dị odi ghan kꞌolhom!
2 Bụghe ogbogo amarugh phọ ạna,
ạdoonye iḍigh phọ ạkparamiom sịkan phọ!
3 Nạ kạteghe rụuku phọ ạna akoom;
awe ạna kọḅile ni ọsighe de phọ ạḍiphe
ịpheri phọ areelhe phọ odiighi bọ.
Rạmha lọ osumughu ọḍuaghu, awe kọḅile omuza.
4 Kạ́moogh oghiilaan — nyịna kóofolomi mun;
nyịna kósooromi mun.
Nạ kabula ni olhe ẹmha ạna ịdipho esina ạnir ilhom,
rꞌoku otu orugh ịdipho ekpukele ạnir.
5 Ọlemia phọ ạna kaḍighi ịdipho olhom esi ạna —
Ọmoogh-we oomo ịikpo phọ kụ aḍien ọdi.
Ẹnaan Iigbia phọ Ịzirel kẹphel li nyịna —
ọdi kụ ạda bọ oomo aḅirini phọ.
6 Ịzirel, nạ ạkigh ọbam ạnir ilhom,
dị olhom ọdi ạwile ạḍua kụ akururu.
Kụ Ọmoogh-we phọ rạmagh ghan nyịna kaḅulemi kụ rạḅem ghan mọ:
7 “Ọony ẹkpor amem mọ mị ạwile bọ nyịna;
rꞌegey ẹphomoghian kụ mị ạḅile ni ạmagh nyịna aḅulemi.
8 Mị ukiton ạḍua rꞌophin ologhi ẹnum amem,
kụ mị kaḍeenaan nyịna ẹphomoghian ạmi kꞌagee-pọ.”
Ịphen kụ ịdi Ọmoogh-we phọ rạphel ghan bọ nyịna ạḅem.
9 *“Mem mọ aNoa mị uguanaan
mọ aḍigho képun mun de phọ.
Nyịidipho mị aguanaan mọ mị kạ́ghagham mun nyịna ologhi;
mị kạ́kpalham mun nyịna ḅịle mꞌọlhiom ạna.
10 Ghạlamo aruugum mọ rꞌạraaḅaraph phọ keetughuḍian ni,
ẹphomoghian ạmi esi ạna kékunughian;
Mị kạpamanam kꞌagee-pọ oguanaan ẹepho phọ ạmi.”
Ịduon kụ ẹdi Ọmoogh-we phọ ạphomoghian bọ nyịna rạḅem ghan.
Ịlo arisigh aJeruselem
11 *Ọmoogh-we phọ rạḅem ghan mọ,
“Nạ aJeruselem ẹmha ịminimiin dị ẹloghonaan ụ́moogh,
dị rꞌoye ọodereghi ạna kụ úlho,
mị kạḅile ni ạsighe ịbekulari kụ apighiom ephighiom mọ ạna.
12 Mị kạloghom ruutu ẹeghelemi phọ ạna rubi
rụnhu-aḍibuo phọ ạna rꞌasighiigh dị kẹtaphan ịdipho ạnian,
kụ iikpe phọ ekoom bọ rꞌịbekulari.
13 *“Mị rꞌaloor kạtughemi we phọ ạna,
kụ ạngo bịdi ẹepho rꞌedughom.
14 Apum rꞌakeel ịiruen kẹngo nyịna ịnyaam.
Ịkpiloghom rꞌaḍiigu kẹ́teeny nyịna.
15 Oye lọ azuom nyịna ẹgham,
pọ yoor kụ úupuruan.
Tọrobo oye lọ ạwa nyịna sighiton kameel li.
16 “Mị kụ ụlhem bọ osughom ikah phọ
rạlem ghan bọ rẹenema phọ.
Mị kẹn kụ ụlhem bọ oye ẹgham mọ
rạsighe ghan bọ reenema phọ kạziom we.
17 Kụ ẹenema ílho dị keḍighi nyịna ịyaar;
nạ kạmoogh ni ọphagharanaan esi oomo ạbulo ọgbaanaan nyịna ịkaraph ạsiagba.
Mị kabianaan ni butelhedom ạmi
ạngo bịdi ọkpar opu.”
Ọmoogh-we phọ kụ ạḅem.