Ẹnaan kẹtagharan Jeruselem
52
*Jeruselem, kpạrami loor ạḅile aḍighi ogbogh!Ẹmha iigbia phọ Ẹnaan, kpọloghian loor ạna ạsuoma ẹnighe!
Ạbuphe Ẹnaan úlegheri bọ kóḍigh mun rụnhu-aḍibuo ạna.
2 Pighemi loor ạna akpetenaan, Jeruselem!
Ḅetenu sịphe ophugh phọ ạrolom ạgada ọdaam mọ!
Weye ạZayon dị osiphi ẹgham,
ịitoghonaan izime phọ ịkpooghiom bọ inyina!
3 Ogbogh Ọmoogh-we phọ rạḅeni ghan we phọ ọdi mọ, “Mem mọ nyina ẹrol bọ dọl ạrebene, úkol ẹmhu anyina ụ́kpe oye ikpoki; ịdipho kẹn kụ ẹdi ikpoki kọ́kpe oseere anyina ẹereegh. 4 Mem mọ nyina ẹghi bọ Ijipt ọrol ạdol aruuruen phọ, nyina iḍighi ịduon phọ rꞌophooph ologhi; kụ ọlo, bụo Asiria ịsighe ni inyina rꞌẹekpara ekpeḍien kụ úkol rụmhu anyina ọkpe rꞌịyaar. 5 *Kụ nyịidipho ẹpe Bạbilonia eniin phọ eḍighinom ịyaar phọ ni kụ imite: nyina meḍighi we dị osiphi ẹgham, kụ úkol rụmhu anyina ụkpe rꞌịyaar. Ạbudaam anyina rootuma ghan kụ kobaga kụ ịbadi amem uphogh ịmi ọḅitonaan. 6 Mem dị retu nyina keloghoma ni mọ mị kụ Ẹnaan, kụ mọ mị mịḅeni ni inyina.”
7 *Pọ eeghe ịiḍaany ọmiin
dị ọokpaany mạḍua ẹpe aruugum mọ ratu,
dị ạphamam ooḅi ọghaaph phọ, ọghaaph ẹepho!
Ọdi agbeelom ọkpar opu kụ rạḅem ghan Zạyon mọ,
“Ẹnaan anyina kụ Ọdaam!”
8 Bụphe rokori bọ ẹmha phọ rọlooghi ni,
oomo ạbidi rọlooghiom rꞌibo.
Bịdi ropogh kọmiin
erigheel Ọmoogh-we phọ sịphe Zạyon!
9 Ịlooghi ḍịolho iboh,
iikpe phọ aJeruselem mọ olhereghi bọ!
Ọmoogh-we phọ kạtagharan ni ẹmha phọ ọdi
kụ ạadereghi we ọdi.
10 Ọmoogh-we phọ kạsighe ni ịikpo iigbia phọ ọdi
ạpelom we phọ ọdi,
kụ oomo aḅirini phọ ọmiin.
11 *Ịḍua Bạbilonia,
oomo phọ ạbuphe ọphamagh bọ rạraar Otu Ịiḅereghi phọ!
Kẹ́ḅogh ịyaar lọ ogbi;
iseere siloor anyina dọl iigbia kụ ẹḍua.
12 Mem mọ ạmuen nyina kẹ́ḍuanam rꞌephirighan;
nyina kẹ́wa reten osuma.
Ọmoogh-we Ẹnaan phọ anyina kiḍiemiom ni inyina
kụ ạmaar iiko inyina ọman rꞌighisigh.
Otelhedom ịminimiin
13 Ọmoogh-we phọ rạḅem ghan mọ,
“Otelhedom mọ ạmi kaḍighi ni oḍighi phọ ạlogh ẹmhu;
kọlogh ni nyọdi eboom eghuan.
14 Ịbadi awe ukperenom ni mem dị ọmiin bọ nyọdi;
manmia bịn dị ụ́kigh mun oye.
15 *Kụ nyịidipho ịbadi areelhe kookia ni nyọdi,
kụ ạbudaam mọ kọmaghagha yogh bịn esi aḍiigu.
Bịdi kọmiin ni kụ ọnaghan
ịyaar dị kꞌekulha kőlhegheri ghan.”