ẠHezekaya ạarurughian kụ ookonom aḍum
38
Riiḍio phọ ịpe phọ, ạHezekaya ọdaam mọ ạarurughian dị ạwa ni omugh. Kụ oyil Azaya, ọony phọ Amoz, ạghi ạteeny nyọdi kụ ạḅeni mọ, “Ọmoogh-we phọ ạḅeni nyịna mọ mạar asereghi rạraar ạna, ịdi eḍighi bọ nạ káḍum. Kookolobian ḍuugh.”2 Kụ ạHezekaya akiton risigh ọdi asomori iikpe kụ ạaḅereghi: 3 “Ọmoogh-we, seseeny, tụutughian nyịidipho mọ mị makumuan ni nyịna rꞌoomo ologhi ạmi kụ ạkparagha oḍighi ghan ịdi eseleman risigh ạna.” Kụ ọdi amiigh omoghi yogh.
4 Kụ Ọmoogh-we phọ ạto ạḅeni Azaya 5 mọ aḅula ạghi ạteeny Hẹzekaya ạḅeni nyọdi mọ, “Mị Ọmoogh-we Ẹnaan phọ aDevid ọde ọde phọ ạna mạnaghan ni ịiḅereghi phọ ạna ạḅile ạmiin izin phọ ạna; mị kạdoonye siḍughul-otu phọ ạna ạḅaram ḍioph rꞌoogh ạsia. 6 Mị kạatoghion ni nyịna rꞌẹmha phọ aJeruselem mọ ẹphen ạsighe ḍịghaagh ogbogh ọdaam mọ Asiria, kụ mị ạmaar ghan aako ẹmha phọ.”
7 Azaya ạphagharanaan mọ, “Ọmoogh-we phọ kamitiom ni eḍeenaan mọ ọno kaḍighi ni ịpe ọno aguanaan bọ. 8 Sịphe eedanien phọ Ehaz ọdaam mọ ạlhogh bọ, Ọmoogh-we phọ kaḍighi ni ịdi oogho kaḅula ọman ḍioph ạrada.” Kụ oogho phọ aḅula ni ọman ḍioph ạrada.
9 Mem dị ạHezekaya amoon bọ esi ẹzegh phọ, ọdi ạge ḍụor ọsephom mọ ạḍien:
10 Mị ugbi mọ mị mạkpo eloogh
kụ rakeel ọmar iḍim,
mọ aghuḍum ịmi úlho mun.
11 Mị ugbi mọ sịen eye phọ
mị kạ́miin mun Ọmoogh-we phọ
ḅịle mꞌoye dị odi eye.
12 Usoph ghuḍum ạmi ọsighe bịn okureri,
dị ẹrol mụdi ogbogo dị ogborion,
mụdi ukpe dị osoph sịphe rolho bọ.
Mị ugbi mọ Ẹnaan rekureri ghuḍum ạmi.
13 Oomo aḍughul mị umoghiom eephina,
mụdi ạnam-dịka kụ rabunughi ịḅarara ạmi.
Mị ugbi mọ Ẹnaan rekureri ghuḍum ạmi.
14 Ẹḍogh ạmi mepiiphian kụ edugh,
kụ mị ạkuph ịdipho ọkurughozo.
Ariḍien ạmi edugh ophogh ghan ạnyu ạke.
Ọmoogh-we, ụtagharan ịmi esi oomo ịminimiin phọ ịphen.
15 Mị kạkaaph eeghe? Ọmoogh-we phọ kụ aḍighi ịphen phọ.
Ologhi ạmi rakiḍim, kụ mị kátue ạnaani.
16 Ọmoogh-we, mị kạrolonaan nyịna, nyịna bịn;
Uukonom ịmi mị ụtol.
17 Eghiḍim ologhi ạmi meten ẹepho.
Nạ ụphel ghuḍum ạmi ạsighe esi oḍighima ịyaar;
nạ ạsar oomo ịkaraph ạmi ạwile.
18 Oye ólho dị kạtol ọmar iḍim kụ aaseeny nyịna;
oye lọ mamugh kạ́kpasi mun emooph ọdi dọl aghuḍuul phọ ạna.
19 Bụphe odi bọ kụ rooseeny nyịna ịduon mị raaseeny bọ nyịna.
Ạburude rọḅeni ghan nmụny ạbidi ịdi nạ aḍighi oye aghuḍuul.
20 Ọmoogh-we, nạ muukonom ịmi.
Yoor kopegh ọne kụ ọmoor sụor ooseeny,
ọmoor oboom sịphe Otu Ịiḅereghi phọ ạna sịen yoor odi bọ.