Eten aruukuan
35
Ade ịisaar phọ kẹmoogh iboh,kụ ạsifalaway keenmenan ẹpe ẹdala phọ.
2 Ade ịisaar phọ kẹmoor sụor kụ ẹlo ḍịolho iboh;
kụ kẹnighe ịdipho ạraaḅaraph phọ ạLebanon,
kụ ẹmoogh ẹnuum ịdipho iizo ạKarmel rꞌaSaron.
Tọrobo oye kạmiin ni eegu Ọmoogh-we phọ,
ạmiin igbogh rꞌịikpo phọ ọdi.
3 *Ịngo ịnyaam rạghaagh dị medugh
rꞌaruukum dị repiigha kụ mẹkporokporo.
4 Ịḅeni tọrobo oye lọ ologhi maḅonyonu mọ,
“Ịkparami loor kụ kékiilaan!
Ẹnaan retu ni ọtagharan anyina,
retu ni ọliom ạbumulogh-ḍien anyina.”
5 *Awe ikpom ariḍien kọmiin ni eten
kụ ạbuḅaaghaph ḅạaghaph kọnaghan ni ḍụghum.
6 Ạrukugha kopeleghu ni ọker ịḅa
kụ arokpom ọka kọlo ḍịolho iboh.
Ạmuum arokol kakilogh ni ạḅeeny de ịisaar;
7 kụ ịghologhol ịisaar keten ighool
kụ ạruunu adir emuza de dị ẹgharaghar.
Riisi dị asuogh eḍum kụ erugh ghan;
ạroogho ọposo rꞌikpu kụ kesi.
8 Ogbogh oḅodo kụ katen sịphe,
dị oghol mọ “Eten Aruukuan.”
Oḍighinom ịkaraph kátelhe oḅodo phọ ọpo rꞌamem;
ạbuo arolologhi kọ́tol dị kookeleghi bụphe kotelhe bọ oḅodo phọ.
9 Ạnam-dịka sịphe kẹ́tol;
ilhom ịnam kételhe eten phọ ẹpe.
Bụphe Ọmoogh-we phọ mạtagharan bọ
kụ kotelhe oḅodo phọ ọpo osi otu.
10 Bịdi kosi Jeruselem rꞌiboh,
kụ ọmoor sụor ọyughuron iboh.
Bịdi kọmoogh ọḅaal ologhi kꞌagee-pọ;
kꞌagee-pọ okururu rꞌamukum ologhi kạ́tolonaan mun.