Ạḍuor oboomiom Ẹnaan
25
Ọmoogh-we, nạ kụ Ẹnaan ạmi;Mị kaghueni nyịna kụ aboom ḍien phọ ạna.
Nạ ạkaraghi aḍighi rạraar iikia;
nạ ạkaraghi aḍighi ạman
ịpe nạ agbiighi bọ kꞌamem dị meten ebia.
2 Nạ makiton igbogh ạramha aḍighi ịzeghe
kụ apiemi riisi ẹkpar phọ ạbidi mem ẹgham.
Arigiga ạbudaam ạbumulogh-ḍien phọ ayoor ọlogh bọ
memeleghu kụ rọ́logh mun kꞌagee-pọ.
3 Awe areelhe ịikpo koboom ni nyịna;
koghiilaan nyịna sịphe ạramha ịkaraph areelhe phọ.
4 Arukulom mọ rꞌạbuphe ẹloghonaan phọ ílho bọ ạḍighaagh moghiil otu esi ạna
kụ mọmoogh pẹleeny mem ịiḅaghami.
Nạ ạngo bịdi oghoph mem oghim
rꞌuba ọrol mem oophoogh ẹghologhol.
Ạbukaraph awe rozuom ghan ịdipho oghim mem unu,
5 ịdipho ekuom ạmuum ḍịgharaghar ade.
Kụ ọlo nạ, Ọmoogh-we, makpomori ni rụnhu ạbumulogh-ḍien phọ ayoor;
nạ akpereghi ịlooghi ạbukaraph awe phọ,
ịdipho ọotu rạpoomi ghan bọ ḍio dị rẹkologhol.
Ẹnaan eekolobian ẹyaal
6 Sịen Eegum phọ ạZayon Ọmoogh-we Oomo Ịikpo phọ kaakolobian ni olhe ẹyaal ẹlo oomo areelhe aḅirini phọ — malhe ẹyaal dị eḍien phọ ẹkar emunughan rꞌọkaraghi amugey amiim. 7 Ịsien phọ kụ edi ọdi kakpoghoron ạsighe egina amem ọotu ọto phọ akoom bọ oomo areelhe phọ. 8 *Ẹnaan Oomo Ịikpo Ọmoogh-we phọ kapiemi ni ḍuugh kꞌagee-pọ! Ọdi kagbuurogh ni izin riḍien oomo awe kụ ạsighe dọl umugholoor phọ awe phọ ọdi ọrol ghan bọ sịphe oomo aḅirini phọ. Ọmoogh-we rꞌaloor mạghaaph!
9 Mem dị ịphen emite, tọrobo oye kạḅem ghan mọ, “Ọdi kụ Ẹnaan ayoor! Yoor mọkpasi oḍuom ologhi ayoor esi ọdi. Ọdi kụ Ọmoogh-we phọ. Ọdi mụtagharan iyoor kụ nyịidipho yoor mọmoogh ọḅaal ologhi rꞌiboh ịdi eḍighi bọ ọdi mụphel iyoor.”
Ẹnaan kẹliom ni Mọab
10 *Ọmoogh-we phọ kaako ni Eegum ạZayon, kụ ọlo kọozeghi ni we phọ ạMoab ịdipho rọozeghi ghan bọ ịikpo ịbiakpa meḍighi atopha esi ạraraar dị ọde ude ọngo ẹnuum de phọ. 11 Bịdi kosele ni rạghaagh ạbidi omitiom mụdi rọwa ghan ọmughi ạmughi, kụ Ẹnaan keefolomi ni bịdi, kụ ạraghaagh ạbidi keḅi ni bin ekeel. 12 Ọdi kapiemi ni riisi ẹkpar phọ ạMoab rꞌiiphopha iikpe phọ ạbidi, kụ ọkororo omeleghu osuma ọoru.