Esi ịto phọ aSaagon ogbogh ọdaam mọ Asiria, uwo ẹmhu ạbuo ẹgham Asiria azuom ẹgham Ạsdod ẹmha aFilistia. 2 Esi ịraar ạsia dị meten, Ọmoogh-we phọ mạḅeni ni Azaya ọony phọ Amoz ọkporonaan arokoro ọdi rꞌịzighazigha arukpe phọ ọdi aanmenan bọ. Ọdi ạnaghanan ni kụ arelhe ghan ẹdaḅa rꞌoopho ạrada. 3 Mem mọ mọka bọ Ạsdod, Ọmoogh-we phọ ạḅem mọ, “Azaya otelhedom mọ ạmi ratelhe ghan ẹdaḅa rꞌoopho ạrada sịen ịraar ạsia. Ẹphen kụ eḍeenaan ịpe kemitenaan bọ Ijipt rꞌạSudan. 4 Ogbogh ọdaam mọ Asiria kaḍiemiom bụo ikoli ẹgham mọ ọdi asiphi bọ ọḍua rꞌẹdaḅa sịphe areelhe phọ ịphen. Ugheel rꞌabukumoor kotelhe oopho ạrada rꞌẹdaḅa, rꞌạriiniom ạbidi dị edi oopho ịlo osiphe ghan Ijipt umugholoor. 5 Bụphe mọkpasi bọ oḍuom ologhi ạbidi esi ạSudan kụ mọpa bọ ịlo Ijipt kọtol li esi ịgbaragbara, iloghi ạbidi kẹwalawala ni. 6 Amem mọ ạmuphe phọ ẹteeny, awe phọ ạbuphe orughogh bọ risiḍia phọ aFilistia kọḅem ghan mọ, ‘Ịmiin ịpe memitenaan bọ we phọ yira oḍuom bọ ologhi ọphel ayira ḍịghaagh esi ogbogh ọdaam mọ Asiria! Yira kokpetenaan bọ puraḍio?’”