Ẹnaan kẹliom ni Sịria rꞌỊzirel
17
*Ọmoogh-we phọ ạḅem mọ, “ẠDamaskos káḍighi mun ẹkpana ẹmha ạkiom ghisigh; ọdi kaḍighi eḅum amuphe. 2 Rạmha phọ ạSiria kọḍuaghu ni kꞌagee-pọ. Bịdi keḍighi riisi dị iyool-ịga rꞌạsinam kẹḅal ghan ịḅal, kụ oye bịdi káporogh. 3 Ịzirel kạ́moogh mun ẹkpar, kụ ạDamaskos kạ́moogh mun ophogha aloor phọ ọdi. Bụo ạSiria phọ okpetenaan bọ kọtol li dọl aroofola ịdipho awe phọ Ịzirel. Mị Ọmoogh-we Oomo Ịikpo phọ mạḅem.”4 Ọmoogh-we phọ ạḅem mọ, “Aḍio retu ni dị ạḍibugh phọ Ịzirel kesi eekuna, kụ ẹelha phọ ọdi eḍighi ekulom. 5 Ịzirel kạkigh ozo ịbiakpa dị mọku, kaḍighi ọkpagha ịdipho ozo dị odi eḍiiny aRefaim mem dị mọokpanion ọman. 6 Iikoma awe bịn kụ kọtol, kụ Ịzirel kạkigh oreeny-ọliv dị mọku ọman emuton ịyal mꞌịraar arughuuny lọ esugha kꞌẹpe eekuna ạnyu phọ mꞌẹphurukpu dị ọwile ẹphen ịla ude phọ. Mị Ọmoogh-we Ẹnaan phọ Ịzirel phọ mạḅem.”
7 Mem dị aḍio phọ ạḍiphe ẹteeny, awe kokiton ni osoman Ọlemia phọ ạbidi, Oye Aghuḍuul phọ Ịzirel, mọ ạloghonaan bụno ḍịghaagh. 8 Bịdi kóseere mun ologhi esi arenmeny phọ bịdi ọkanagh bọ rꞌạraghaagh ạbidi, rꞌesi igbudu Asera um-ạke, ḅịle rꞌesi arenmeny ọsuughi ịnsens.
9 Mem dị aḍio phọ ạḍiphe ẹteeny, aweye ịikpara ạramha kosumughu ni ịdipho ịpe ạbuo aHivait rꞌạbuo Ạmorait phọ oghinom bọ mem mọ bịdi rọḍua bọ ḍịghaagh phọ Ịzirel.
10 Ịzirel, nạ mawula Ẹnaan phọ ẹtagharan bọ nyịna, ẹḅile bọ eghoph nyịna ịdipho aḍigbogh aḍighiigh. Kpạripe ghụn nạ ạḅile rạzuph ghan iimuma roghoony iigbia ọbo nạ aaseeny ghan eeruen ẹmugh. 11 Kụ ghạlamo iḍighi mạar dị iimuma phọ esi eemanam ḍiniin ạḍiroor phọ ạḍiphe nạ ạzuph bọ, ịyaar ọku kẹ́tol li. Ịiḅaghami rꞌạḍikpara ạdol dị eekonom ílho bịn kụ kẹtol.
Ọkpar opu reelhe ẹpomoghian
12 Ịgbaragbara ịikpara areelhe ẹkigh ịdipho ḍịaḅa ọphiiny dị ratuḅuan rꞌẹgurom igbogh arookpoogh oologh. 13 Erumom dị areelhe phọ rotu bọ ẹkigh ịdipho ạmuum oologh, kụ Ẹnaan ẹkpalham ghan bịdi oḅula ọman, oporogh ọḍua ịdipho ịisaar ọogaany ẹeḅaraph, ịdipho ịpherepe ookuugh iphoroḅoor. 14 Dulhe oḍighi ịlo okpereghaan, rẹteeny ḍịroor bịdi mogheleghu. Ẹpe kụ eḍighieny ạtorobo ọlo ạphueghi ạḅile awum ruphua ade phọ ayira.