Ịdi oye olegheri ịyaar raḍighi ghan
11
Sịghe ikpoki ạna amuulom ḍighi rꞌịnon areelhe bịn eniin aḍio nạ kạmoogh ni sụo. 2 Iiḍighi ikpoki phọ ạna ẹrologhu ịbadi arikpisi — kịrokiro arikpisi, loor esi dị nạ ólhegheri ẹdo ẹkaraph elhor dị nạ kạmoogh sịen aḅirini phọ.3 Tọrobo ạga lọ oreeny ameel ạghi, ịsiphe ameel bọ kụ ẹdi kạtol. Mem dị aḍio phọ meghire kpịkpikpi, kụ ọlophia ạloph. 4 Nạ ạrol okori mọ eghiriom aḍio phọ ẹegbenyenu ookuugh phọ aten, pọ nạ ozo káḅeph ḅịle nạ ịyaar kábugha. 5 Ẹnaan kụ ịlhem oomo ạraraar. Ịdipho nạ kátue bọ ạnaghanan ịpe akumoom aghuḍum ramiigh ghan bọ sịphe ọkuruḅaka ạnir dị odi rꞌeghun, ịdipho kẹn kụ ẹdi nạ kạ́naghanan tọrobo ịlo Ẹnaan reḍighi. 6 Ḅeph ni ozo phọ ạna ḍịroor rꞌadulhe. Nạ ólhegheri mụghumo oomo phọ ịdi kụ keḍum ni, ḅịle mọ iniin keḍum ni epu iniin.
7 Ẹnighe ọghelom ịma ạḍiḅaal ootaany phọ. 8 Kol ghan tọrobo ạlha dị nạ odi eye ạngo ḍịseph Ẹnaan. Tọrobo ọnhu ạsia lọ nạ ạrol sịen aḅirini phọ, tụutughian mọ ariiḍio ịiḅaghami kẹbugh aani kẹn ni. Ịyaar oḍuom ologhi ílho.
Oroma ạbuo ịḍoogh phọ
9 Bụo ịḍoogh, ịkelom ni mem ịḍoogh phọ anyina. Ịmoogh ọḅaal ologhi sịen nyina edi bọ ịḍoogh phọ. Iḍighi ịlo nyina rẹwa oḍighi, kụ ẹdaphan rụuphua iloghi phọ anyina. Kụ ọlo, ịitughian ni mọ Ẹnaan kesoph ni ọoruen ịngo inyina tọrobo ịlo nyina eḍighi.
10 Kémeera ịyaar ịiḅaghami inyina, ẹḅile ephin siloor anyina. Ạdol ịḍoogh phọ oopho ni bịn.