6
Mị mạḅiilha ạmiin mọ ọphon phọ aḅirini ịkaraph ịiruen. 2 Eeni amem Ẹnaan kẹngo oye ẹelha, eghuan rꞌaruphua, tọrobo ịyaar lọ ọdi ạwa, kụ ọlo kémeera ọdi ạghelom. Ooruen oye ghụn ni kụ kạkelom. Oopho ni bịn, kụ íḍighi elhiom. 3 Iini sịen oye ạmoogh oniin okuron ạnmuny kụ ạtol ạkpo, tọrobo ịlo ạsia phọ ọdi ẹdoony, eḍighi ịyaar dị ọdi ụ́moogh bin ọḅaal ologhi mụo ọdi, kụ amaḍi ọdi ụ́nighe, pọ mị ạḅem mọ ọbam ọony dị ọmar oseere kụ mamugh kụ ạnighe apu oye phọ. 4 Ẹekpia ílho ọmar ọony phọ ọpo loor esi dị ape bịn aḍigh ufiri dị kobula. 5 Ọ́miin ḍịḅaal aḍio ḅịle ólhegheri ḍi aghuḍum aru, kụ, tọro ịlo eḍighi, mạmoogh ni ẹboroph — 6 dị ẹnighe epu oye phọ ọpo ụ́kelom bọ ghuḍum ọdi, ghạlamo ạrol ịyal ọonir ạsia. Ghạlamo ịduon phọ bịn, ịyal phọ ạbidi rọki eniin phọ esi phọ.7 Oye rakumuan ghan ọbo ạmoogh ịyaar olhe, kụ rạ́moogh ghan ịdi ẹmanam. 8 Ika kụ ẹdi oye olegheri ịyaar apuom bọ uwelologhi? Eeghe ạsuo kụ odianaan uwekulom ọmaar ạdol ọdi? 9 Oopho ni bịn; ẹkigh ophorogh ookuugh. Ẹnighe epu dị ịlo nạ ạmoogh kẹgbaanyan nyịna rꞌọoḅaghamian aloor ọwa ghan ịnon oomo amem.
10 Tọrobo ịyaar lọ emite mogbiighi ni oseere kꞌagee-pọ, kụ oomo ayira olegheri mọ oye kátue apakian rꞌoye dị ạmoogh ịnyaam apu nyọdi. 11 Opakian ọdoonye pọ oopho ni bịn kụ nyịna rẹ́nighenaan. 12 Ika kụ ẹdi oye kalegheri bọ ịyaar dị ẹkar ẹnighenaan ọnon sịen ekulha amem oopho ạdol phọ ạḍien — ghuḍum dị raten ghan mụdi oogho? Ika kụ ẹdi oye kalegheri ịdi kemite sịen aḅirini phọ mem lọ ọdi mamugh?