Amem mụo ịyaar rꞌịyaar
3
Tọrobo ịyaar lọ emite sịen aḅirini phọ remite ghan mem mọ ọpo Ẹnaan ẹsaḅar bọ.2 Ọdi aseere mem ẹmaria rꞌamem aḍuugh,
mem iḅeph rꞌamem ibugha,
3 mem oghiigh rꞌamem ookonom,
mem olhereghi rꞌamem ọloghoḍi.
4 Ọdi aseere mem okururu rꞌamem iboh,
mem ọto rꞌamem ọgher ịḅa,
5 mem ọrolan esi rꞌamem ọḅatanaan,
mem oghurughi rꞌamem ọgbaranaan
6 Ọdi aseere mem ọwa ọmiin rꞌamem ophiemi
mem oseerian rꞌamem oroḅologhi,
7 mem ọphanyi rꞌamem ọkologh,
mem oḅoorian rꞌamem ọghaaph.
8 Ọdi aseere mem ọphomoghian rꞌamem ọlogh aḍien,
mem ẹgham rꞌamem ẹepho.
9 Eeghia kụ ạsuo oomo arukumuan phọ ayira? 10 Mị alegheri ni sidool ẹemor dị Ẹnaan mịleti iyira. 11 Ọdi mạsaḅar ọkar amem ẹlo ịyaar rꞌịyaar. Ọdi mụngo iyira ẹephua olegheri ịlo aghisigh kụ ụ́ngoom iyira ọgbaanyami ọkar ọnaghanan ịpe ọdi raḍighi bọ. 12 Esi ịduon phọ mị ạmiin mọ oomo ịdi yira koḍighi, ọmoogh ghan ọḅaal ologhi rꞌoḍighi ghan ịlo yira kotue sịen yira odi bọ eye phọ. 13 Ẹkpe ni dị oomo ayira kole ghan, ọpughol, ọmoogh ọḍe esi ịpe yira mokumuan bọ ọmoogh. Eḍighi ni inmo kꞌẸnaan.
14 Mị alegheri ni mọ tọrobo ịlo Ẹnaan kụ eḍighi kẹtol li kꞌagee-pọ. Nạ kátue ạḅaram ịyaar mụghumo ophoor ọsighe. Kụ eniin ịyaar dị Ẹnaan reḍighi ghan, oḍighi ịdi yira kọmoogh ghan ọlogh ọdi eegu rꞌoghiilaan. 15 Tọrobo ịyaar lọ emite ḅịle ketue emite, memite ghan ni igbaany. Ẹnaan reḍighi ghan ịdi eniin ịyaar phọ kemite kụ ẹḅile kẹn emite.
Ịkaraph ịiruen ịsien aḅirini phọ
16 Esi ọḅaram, mị ạmiin kẹn mọ sịen aḅirini phọ ẹkaraph eḍighinom ịyaar kụ edi ghan esi lọ iiḅi ịiruen rꞌarilhiom kụ ẹkpe ọrol. 17 Mị ạḅenian loor ạmi mọ, “Ẹnaan keegboonaan we aruukuan rꞌịkaraph awe phọ ịiruen dị eeleeny, loor esi dị oomo ạraraar, tọrobo eḍighinom kemite ọkar amem mọ oseenaan bọ.” 18 Esi ekureriom mị ạmiin mọ Ẹnaan redegh ghan olegheri ịlo yira ọrol, oḍeenaan ayira mọ yira ụ́nighe upu ịnam. 19 Ọmaar ophogh, oniin ọda phọ rekori ni oye rꞌẹnam. Ọphon kamugh ni ịdipho ọphori phọ. Ịyal phọ ạbidi oniin phọ ọdo ọlem mọ. Oye ọ́nighe opu ẹnam, ịdi eḍighi bọ aghuḍum ịyal phọ ạbidi ọmoogh ịdi raḍighi. 20 Ịyal phọ ạbidi rọki ni eniin esi — ophugh phọ. Ịyal phọ ạbidi ụḍua sịphe kụ oru, kụ kọḅile ni oḅula sịphe phọ. 21 Ika kụ ẹdi oye kalegheri mọ uwaloor ọno rakeel ghan ạnyu kụ uwaloor ẹnam raḍigh ghan ude? 22 Esi ịduon phọ kụ mị aloghoma mọ ọkar igey ịdi yira koḍighi ọghelom ịpe yira mokumuan bọ ọmoogh. Ẹnon ịyaar dị yira koḍighi ílho. Ịdi yira kọsighe kụ olegheriom ịdi kemite mem lọ yira momugh.