Ạḍuor oboom Ẹnaan
135
Iboom Ọmoogh-we phọ!Iboom ḍien phọ ọdi, nyina abutelhedom Ọmoogh-we phọ,
2 bụphe ọmeera bọ sịphe otu Ọmoogh-we phọ,
sịphe Otu Ịiḅereghi Ẹnaan phọ ayira.
3 Iboom Ọmoogh-we phọ, ịdi eḍighi bọ ọdi ạnighe ni;
ịmoor sụor ẹsephom ḍien phọ ọdi, loor esi dị ọdi ạmoogh ọnma ighirigiir.
4 Ọdi ạsaḅar Jẹkob oḍighi ọlo aloor ọdi,
we phọ Ịzirel oḍighi ạbuo ọdi.
5 Mị alegheri ni mọ Ọmoogh-we phọ ayira ạbugh ni iboom,
ạbugh apu oomo ạrumugh.
6 Ọdi raḍighi ghan tọrobo ịlo ẹḅeeraan nyọdi
ẹpe kꞌạke phọ rꞌịsien ade phọ,
sịphe ạriphiiny phọ rꞌude ạriphiiny phọ.
7 Ọdi ạmagh oghim ọotu mọ ạḍua ruukuna ade phọ amite;
ọdi aḍighi ịdi aḍio ẹmeephian kụ ẹdaphan oghim mọ,
kụ ọdi ạsighe oghim sịphe osoph phọ ọdi osereghi ạraraar kụ amitiom.
8 Ẹpe Ijipt ọdi ạze oomo ịkpana ạnmuny,
nmụny awe rꞌạnmuny ịnam.
9 Ịsiphe kụ ẹdi ọdi aḍighi ịiḍaany rꞌareḍeenaan
ịlo ọlhiom ọdaam mọ rꞌoomo awe iiḍighi ạbidi.
10 Ọdi aphiemi ịbadi areelhe
kụ ạze rạalha dị ọmoogh ịikpo:
11 Sihon, ọdaam Ạmorait;
Ọg, ọdaam ạBasan;
rꞌoomo ạraalha ẹpe Kenan.
12 Ọdi ạngo rere phọ ạbidi we phọ ọdi,
rere phọ ạbidi we phọ Ịzirel.
13 Ọmoogh-we, kogbeelom nyịna oomo amem mọ nạ Ẹnaan;
oghiil atum oghiil kọotughian ni nyịna.
14 Ọmoogh-we phọ kabianaan ni we phọ ọdi;
ọdi kạnma ni ighirigiir butelhedom mọ ọdi.
15 *Ruru areelhe phọ oḍighinom silva rꞌagol;
awe kụ ịkaaghi bịdi.
16 Bịdi ọmoogh ịnhu kụ kétue ẹḅa;
ḅịle rꞌariiḍien kụ kétue ẹ́miin.
17 Bịdi ẹmoogh reḅeri kụ kétue ẹnaghan;
ḅịle rꞌizon kụ kétue kẹn epooghu.
18 Eḍighi ịdi oomo ạbuphe ọkaaghi bọ bịdi kụ ọkpasaghi emooph esi ạbidi
kọkigh ịkaaghineen ạraraar phọ bịdi ọkaaghi bọ!
19 Iboom Ọmoogh-we phọ, nyina awe Ịzirel;
iboom nyọdi, nyina ariil ạrikia phọ Ẹnaan.
20 Iboom Ọmoogh-we phọ, nyina awe aLivait;
iboom nyọdi, oomo anyina phọ rooseeny bọ nyọdi.
21 Iboom Ọmoogh-we phọ ẹpe Zạyon,
ẹpe Jeruselem, ẹmha phọ ọdi.
Iboom Ọmoogh-we phọ!