Ịlo ọsephom Otu Ịiḅereghi phọ
132
Ọmoogh-we, kábula Devidrꞌoomo ạḍiikpara ạdol phọ ọdi ạkparagham bọ.
2 Tụutughian, Ọmoogh-we, ịpe ọdi aguanaan bọ,
ịyo phọ ọdi aghiran bọ rꞌạna Egbogh Ẹnaan phọ ạJekob:
3 “Mị kạ́ki ologhi otu, ḅịle mị kạ́mina;
4 mị kápooghian, ḅịle mị kạ́naani,
5 tụtu mị aḍighinaan esi Ọmoogh-we phọ,
marugh Egbogh Ẹnaan phọ ạJekob.”
6 *Ẹpe Bẹtilihem, yoor ụnaghan ịlo Igbe Ịyo phọ,
kụ yoor ọmiin ẹpe iizo aJiarim.
7 Yoor ọḅem mọ, “Iḅerenu ọghi otu Ọmoogh-we phọ;
iḅerenu ooseeny sịphe egbodo ạgada phọ ọdi.”
8 Pạm Igbe Ịyo phọ, eḍeenaan ịikpo phọ ạna, Ọmoogh-we,
arumom sịphe Otu Ịiḅereghi phọ ạna,
kụ ạrol sịen kꞌagee-pọ.
9 Ariil ạrikia phọ ạna oḍighi ghan oomo amem ịpe eḍighi bọ elhiom!
Awe phọ ạna ọlo ḍịolho iboh!
10 Nạ uguanaan ni otelhedom mọ ạna Devid;
kákel ọdaam mọ nạ ạsaḅar bọ.
11 *Nạ ughunyian kụ aguanaan Devid oguan,
oguanaan dị nạ kạ́aḅemion mọ,
“Mị kaḍighi oniin ọony ạna ọdaam,
kụ ọdi kạda mem dị nạ úlho mun.
12 Eḍighi ịyaar dị ạnmuny phọ ạna ọdaph ịyo phọ ạmi
rꞌiilogh phọ mị ạngo bọ bịdi,
pọ ạnmuny ạbidi kọda aani kẹn ni ọkiom ghisigh.”
13 Ọmoogh-we phọ mạsaḅar Zạyon;
ọdi rạwa oḍighi ịsiphe phọ ẹmha ọdi:
14 “Ịsien kụ esi dị mị kạtol kꞌagee-pọ;
ịsien kụ esi dị mị rạwa ọda.
15 Mị kamuzeḍinaan Zạyon oomo ịlo ọdi ạwa;
mị kạperemi rukulom mọ ọdi eḍien.
16 Mị kạseph oomo ịlo ariil ạrikia phọ oḍighi,
kụ awe ọdi ọmoor sụor, ọlo ḍịolho iboh.
17 *Ịsien kụ ẹdi mị kaḍighi oniin ẹemara ẹemara aDevid ogbogh ọdaam;
ịsien kụ ẹdi mị kạmaar ri aseere ạgada ọdaam ọdaam mọ mị ạsaḅar bọ.
18 Mị kasiphe bụmulogh-ḍien ọdi rꞌumugholoor,
kụ ọlo ọmar phọ ọdi kaḍum ni ạḅile apoph.”