Ịiḅereghi ọsephom esi ọkpar opu.
118
*Ịngo ḍịseph Ọmoogh-we phọ loor esi dị ọdi ạnighe ni,ḅịle ẹphomoghian phọ ọdi edi ghan bịn.
2 Awe phọ Ịzirel ọḅem:
“Ẹphomoghian phọ ọdi edi ghan bịn kꞌagee-pọ.”
3 Ariil ạrikia phọ Ẹnaan ọḅem:
“Ẹphomoghian phọ ọdi edi ghan bịn kꞌagee-pọ.”
4 Oomo ạbulo rooseeny nyọdi rọḅem ghan:
“Ẹphomoghian phọ ọdi edi ghan bịn kꞌagee-pọ.”
5 Mem ịiḅaghami mị ạmagh Ọmoogh-we phọ;
ọdi ụnaghanan ịmi kụ useere ịmi ẹereegh.
6 *Ọmoogh-we phọ odianaan rꞌạmi, mị kákiilaan;
eeghe ịyaar kụ ẹdi oye kuḍighi ịmi?
7 Ọmoogh-we phọ kụ rụlhoghonaan ghan ịmi ḍịghaagh,
kụ mị kạmiin ni ḍio dị kọkpar opu bụmulogh-ḍien phọ ạmi.
8 Ẹnighe ọkpasi emooph ayira esi Ọmoogh-we phọ epu oḍuom ologhi oye.
9 Ẹnighe ọkpasi emooph ayira esi Ọmoogh-we phọ epu oḍuom ologhi buḍiemiom awe.
10 Ịbadi ạbumulogh-ḍien ukoom ịmi,
kụ ọlo mị uphiemi ni bịdi esi ịikpo Ọmoogh-we phọ.
11 Bịdi ukoom ịmi oomo ịigaany;
kụ ọlo mị uphiemi ni bịdi esi ịikpo Ọmoogh-we phọ.
12 Bịdi ụuphunogh ukoom ịmi mụdi aḍiowo,
kụ ọlo bịdi ụnuughi egina amem ịdipho ạnian esi iitoor;
esi ịikpo Ọmoogh-we phọ mị aphiemi ni bịdi.
13 Uzuom ịmi igey kụ esugha ẹnum rọkpar kupu ịmi,
kụ ọlo Ọmoogh-we phọ ụlhoghonaan ni ịmi ḍịghaagh.
14 *Ọmoogh-we phọ ụngo ịmi ịikpo rꞌịnyaam;
ọdi mụphel ịmi.
15 Ịnaghan ḍịolho iboh ọkpar-opu ologhi arugbogo awe phọ Ẹnaan:
“Iboom ịikpo Ọmoogh-we phọ meḍighi oḍighi.
16 Ịikpo phọ ọdi miruomaan iyira ọkpar opu —
iboom ịikpo phọ ọdi ghisigh ẹgham.”
17 Mị kámugh; kpạripe ghụn mị kạtol li
kụ agbeelom ịpe Ọmoogh-we phọ maḍighi.
18 Ọdi mụlhiom ịmi agey,
kụ ọlo ọdi ọ́ngo ọgel mọ mị umugh.
19 Ughughuronaan ịmi rughuugh Otu Ịiḅereghi phọ;
mị kaḍigh ologhi kụ ạngo ḍịseph Ọmoogh-we phọ.
20 Ịphen kụ arughuugh Ọmoogh-we phọ;
awe aruukuan bịn kụ koḍigh ologhi.
21 Mị aboom nyịna, Ọmoogh-we, loor esi dị nạ ụnaghanan ịmi,
loor esi dị nạ mụngo ịmi ọkpar opu.
22 **Ẹko phọ ạbuloghom ruutu phọ oghel bọ
kụ mẹḅile eḍighi ẹko ogbo.
23 Ọmoogh-we phọ kụ aḍighi ịduon phọ
kụ eḍighi ni iikia riḍien ayira.
24 Rodon kụ aḍio ọkpar opu Ọmoogh-we phọ;
itu ọmoogh iboh, olhe ẹyaal.
25 *Ụphel iyoor, Ọmoogh-we, ụphel iyoor.
Ụngo iyoor ẹnighenom, Ọmoogh-we.
26 *Ẹnaan ẹseph ni nyọon phọ ratumom bọ ḍien Ọmoogh-we phọ!
Kꞌịsiphe Otu Ọmoogh-we phọ kụ ẹdi yoor ọseph nyịna.
27 Ọmoogh-we phọ kụ Ẹnaan; ọdi muḍeenaan iyira ẹnighe.
Ịpam ịphiph ireeny rạghaagh anyina, emiigh igiri iboh
kụ egiriph erelhe eeghironom enmeny ạrikia phọ.
28 Nạ kụ Ẹnaan ạmi, kụ mị ạngo nyịna ḍịseph;
mị kagbeelom ni igbogh phọ ạna.
29 Ịngo ḍịseph Ọmoogh-we phọ loor esi dị ọdi ạnighe ni,
ḅịle ẹphomoghian phọ ọdi edi ghan bịn kꞌagee-pọ.