Ịiḅereghi onyugheel dị odi esi ịiḅaghami.
102
Nạghan ịiḅereghi ạmi, Ọmoogh-we,ạḅile ạnaghan ịlom ọloghonaan ạḍighaagh phọ ạmi.
2 Mem dị mị odi esi ịiḅaghami,
kákiton risigh ạna esi ạmi apogh ẹnon ekpisi;
ụnaghanan ịmi elhom
mem lọ mị ạmagh.
3 Aghuḍum ạmi ramuneen ịdipho ạmughi;
aloor ạmi reemor mụdi ạnian.
4 Mụuzeghi ịmi ọkiom ude ịdipho ạtugharaghar ạroogho;
ẹephua eḍien mẹḍua loor ạmi.
5 Mị rạkonan kamitiom;
mị masugha ruzu rꞌịḅarara bịn.
6 Mị mạghigh ẹnun eḍum dị edi de ịisaar,
mụdi eekughum dị ọwile mọ ephe esi otu dị ameleghu.
7 Mị ạmina bịn mị ụ́naani;
mị odi ịdipho ẹnun dị ogina ọdi kụ ạlhel ạnyu otu.
8 Oomo aḍio phọ ạbumulogh-ḍien ụsinoghom ghan ịmi ịghor;
bụphe rụnmoghoghoom bọ ịmi ọsighe ḍien ạmi kụ rotonyonom ghan we.
9-10 Loor ophin ologhi rꞌọghagh ologhi phọ ạna,
ọoru kụ eḍien ạmi,
ḅịle izin kụ amiim ạmi.
Nạ ụkpaph ịmi aphoophe kụ aroph.
11 Aghuḍum ạmi ạkigh oogho adulhe;
mị ạkigh tụgharaghar ạroogho.
12 Kụ nạ, Ọmoogh-we, kụ ọdaam kꞌagee-pọ;
oghiil atum oghiil, oomo awe kọotughian ni nyịna.
13 Nạ kaḅetenu kụ ạnma ighirigiir Zạyon;
amem mẹteeny ọnma ighirigiir nyọdi;
phọn kụ amem dị eeleeny.
14 Abutelhedom ạna ọpomoghian nyọdi,
ghạlamo ịduon mophiemi bọ ni nyọdi;
bịdi rọnma ni nyọdi ighirigiir
ghạlamo ịduon ọdi maagulaan bọ ni.
15 Areelhe phọ kekiilaan ni Ọmoogh-we phọ;
oomo ạbudaam ịsien ade phọ kokiilaan ni ịikpo phọ ọdi.
16 Mem dị Ọmoogh-we phọ ạḅile aselemi Zạyon,
ọdi kagananami ni igbogh phọ ọdi.
17 Ọdi kạnaghanan ni we phọ ọdi oghel bọ
kụ aler rụru ịiḅereghi ạbidi.
18 Gẹ ịpe Ọmoogh-we phọ maḍighi bọ aseenaan oghiil dị ratu,
ẹrol dị awe dị kọ̋mar oboom nyọdi.
19 Ọmoogh-we phọ ạrol sịphe ạdol iigbia phọ ọdi.
Kꞌẹpe ạnyu ạke kụ ẹdi ọdi aphogh ude.
20 Ọdi ạnaghan ịkuph awe ikoli
kụ aseere ẹereegh bụphe osophonaan bọ mọ ọze phọ.
21 Loor esi ịduon phọ ḍien phọ ọdi kogbeelom ni ẹpe Zạyon
ḅịle koboom ni nyọdi ẹpe Jeruselem
22 mem dị areelhe rꞌạramar ookpomoghan
kụ ooseeny Ọmoogh-we phọ.
23 Ọmoogh-we phọ mudughe ịmi mem dị mị odi ugheel;
ọdi makpere ghuḍum ạmi.
24 Ẹnaan, kụ́sighe ịmi ạ́ḍuanam
kụ mị agbi ọkpo.
Ọmoogh-we, nạ kạtol kꞌagee-pọ.
25 *Mem dị eten dị mebia,
nạ kụ ụlhem bọ de phọ kụ ạsighe rạghaagh phọ ạna kụ ạlemom kẹ phọ.
26 Oomo phọ ạbidi kope ni ọmadan, kụ nạ kạtol li.
Bịdi kokitonu ni ịdipho igbaany arukpe.
Nạ kakiton bịdi ịdipho iinmenan
kụ ạḅitonaan bịdi.
27 Kụ ọlo, nạ kạtol li bịn,
nạ káḍighi ogbaany.
28 Ạnmuny ayira kọtol rꞌẹepho,
kụ esi ịbooghian phọ ạna
ẹemara ẹemara ạbidi kọmaar ri ọtol.