Ẹnaan kụ Ogbogh Ọdaam
99
*Ọmoogh-we phọ kụ ọdaam;kụ awe phọ ophiigha.
Ọtolomi nyọdi ạgada opeleghiom rụukpaany aghuḍuul phọ
kụ ade phọ ephiigha.
2 Ọmoogh-we phọ ạbugh ni ẹpe Zạyon.
Ọdi ạbugh apu oomo aḅirini phọ.
3 Tọrobo oye kaaseeny ḍigbogh aḍien eegu phọ ọdi.
Ọdi oye iigbia.
4 Ogbogh ọdaam, nạ ạpomoghian ịpe ẹnighe bọ;
nạ maseere egeny eḍighinom ịyaar ẹpe Ịzirel.
Nạ mạsighe atu dọl aruukuan rꞌegeny eḍighinom ịyaar.
5 Iboom Ẹnaan phọ ayira Ọmoogh-we phọ.
Iiseeny egbodo ạgada phọ ọdi.
Ọdi oye iigbia.
6 AMozis rꞌEeron kụ ariil ạrikia ọdi,
kụ ạSamuel oniin ọdi ạaḅereghi ghan nyọdi.
Bịdi ụmagh ni Ọmoogh-we phọ kụ ọdi ạnaghanan bịdi.
7 *Ọdi ạrol ologhi eekpoogh ọotu kụ ạḅaanaan bịdi;
bịdi uuko ni iilogh phọ rꞌịto phọ ọdi ạngo bọ bịdi.
8 Ẹnaan ạmi Ọmoogh-we, nạ ụnaghanan ni we phọ ạna;
nạ uḍeenaan ni bịdi mọ nạ Ẹnaan dị rạsar ghan kạwilenaan,
ghạlamo nạ ụliom bịdi loor ịkaraph phọ ạbidi.
9 Iboom Ẹnaan phọ ayira Ọmoogh-we phọ
kụ eeseeny sịphe eegbolom iigbia phọ ọdi.
Ẹnaan phọ ayira Ọmoogh-we phọ oye iigbia.