Omuneniom inya ạḍinya
(Ạsuor 90—106)
Ịlo Ẹnaan rꞌOye
90
Ọmoogh-we, oomo amem nạ maḍighi ghan marugh ayoor.2 Tụtu nạ kạlem bọ rạaḅaraph phọ
mụghumo omitiom aḅirini phọ,
nạ bịn kụ uḍighi Ẹnaan dị edi ghan kꞌagee-pọ
kụ kaḍighi Ẹnaan kꞌagee-pọ.
3 Nạ ạḅeni oye mọ aḅula ịpe ọdi ạrol ghan bọ;
nạ akiton nyọdi atene ịisaar,
4 *Oniin ọonir ạsia esi ạna ẹkigh ḍiniin aḍio;
ẹkigh ịdipho iḍue phọ meten bọ,
ịdipho ookpera ạwa aḍughul phọ.
5 Nạ ụsighe iyoor ạḍuanam ịdipho aḍigho;
yoor ụrol ẹnum amem bịn mụdi ạmalha.
Yoor ọkigh ọmirimiir dị asi ḍịroor,
6 dị aphoph kụ awulawula,
kụ ạgharaghar bịn amugh dulhe.
7 Ophin ologhi ạna kụ uugulemi bọ iyoor;
yoor rokiilaan ni ogbogh ọghagh-ologhi phọ ạna.
8 Nạ aseere ịkaraph ayoor ghisigh ạna,
ịkaraph ịbooghian ayoor esi dị nạ kạmiin ghan.
9 Ophin ologhi ạna masoph ghuḍum ayoor akpere;
ạsia phọ ayoor ị́man mun ịyaar ẹkigh onyam-ọḅatan bịn;
10 Oḍualdi ạsia bịn kụ ẹdi yira ọmoogh,
ọphaanyadi ạsia lọ yira ọkpar;
ghạlamo ịduon phọ, ịyaar dị kiruom iyira ịiḅaghami rꞌọto;
aghuḍum mọ óbia bịn masi eekuna, bịn yira moten.
11 Ạnhian kụ mạkar ghan aloghoma irighitiigh ophin-ologhi phọ ạna?
Ạnhian kụ alegheri oghiilaan dị ogbogh ọghagh-ologhi phọ ạna katumom?
12 Ụtughemi iyoor ịlo olegheri ịdi aghuḍum ayoor akper,
ẹrol dị yoor ọsu ologhi.
13 Kạpur aḍio kụ ẹdi ophin-ologhi phọ ạna kạtol?
Nmạ ighirigiir, Ọmoogh-we, esi abutelhedom mọ ạna.
14 Umuzeḍiom iyoor tọrobo ạḍiroor rꞌẹphomoghian ạna,
ẹrol dị yoor ọmoor ọḅile ọmoogh ọḅaal ologhi oomo aghuḍum mọ ayoor.
15 Ụngo iyoor ọḅaal ologhi dị ạmanam ịdipho ọto phọ nạ ụngo bọ iyoor
oomo ạsia ịminimiin phọ ayoor.
16 Meera yoor abutelhedom mọ ạna ọmiin ogbogh oḍighi phọ ạna;
meera ạnmuny ạnmuny ayoor ọmiin igbogh phọ ạna.
17 Ọmoogh-we Ẹnaan ayoor, meera ạḍiseph phọ ạna ẹrolan rꞌayoor;
ụngo iyoor edughom oomo ịlo yoor oḍighi.