Ẹephua Otu Ẹnaan
84
Otu phọ ạna ụḅeeraan ni ịmi iboom, Ẹnaan Oomo Ịikpo Ọmoogh-we.2 Rịphu ni ịmi ọrol ịsiphe.
Mị ạmoogh ni ẹephua ọrol ịsiphe Otu Ọmoogh-we phọ.
Rꞌoomo aloor ạmi mị ạmoor sụor iboh ạngo Ẹnaan phọ ẹpe edi ghan bọ bịn.
3 Ghạlamo asimutia bịn medoghoḍi ruutu ạbidi,
ạsimugeem mẹmoogh riisi ọrol;
bịdi esereghi nmụny ạbidi etumeniom renmeny ịyaar aghuḍum mọ ạna.
Ọmoogh-we Oomo Ịikpo, ọdaam ạmi rꞌẸnaan ạmi.
4 Pọ eeghe ọḅaal ologhi kụ ẹdi bụphe odi bọ sịphe Otu Ịiḅereghi phọ ạna ọmoogh.
Oomo amem bịdi rọmoor ghan sụor oboom ạna.
5 Oboom ọḅaal ologhi odianaan bụphe ịnyaam ạbidi rẹḍua ghan bọ esi ạna,
bụphe ọmoogh bọ ḍịḅeeraan ọghi erelhe kꞌẸnaan osi Eegum ạZayon.
6 Ịdipho bịdi rọḅeeny bọ ẹgharaghar Eḍiiny aBaka,
bịn ekitonu eḍighi esi asikol,
ọlophia unu phọ amuzeḍi mụum.
7 Bịdi rọki, rọmoogh ịnyaam;
bịdi kọmiin Ẹnaan phọ ẹbugh bọ epu oomo ạranaan sịphe Zạyon.
8 Nạghan ịiḅereghi ạmi, Ọmoogh-we Ẹnaan Oomo Ịikpo.
Nạghan Ẹnaan ạJekob.
9 Ngọ ḍịseph ạna, Ẹnaan,
ọdaam mọ nạ mạsaḅar bọ.
10 Ọrol ịsiphe Otu Ịiḅereghi phọ ạna eniin aḍio bịn
kụ ịnighe epu ọrol ẹnon ekpisi oniin ọonir asiḍughul-otu.
Ịnighenaan ịmi ọmeera ịsiphe ọnhu-aḍibuo otu Ẹnaan phọ ạmi
rꞌorugh iloghi aruutu ạbukaraph awe.
11 Ọmoogh-we kụ ọsuaram ayoor, ọkpoghoron eegu ayoor
dị ụsephom ghan iyoor rꞌọnma ighirigiir rꞌeegu.
Ọdi rákel ghan ịyaar lọ ẹnighe
esi ạbuphe roḍighi bọ igey.
12 Ẹnaan Oomo Ịikpo, oboom ọḅaal ologhi odianaan bụphe oseere bọ ologhi esi ạna.