Ogey ooseeny
50
Ọmoogh-we Ẹnaan Oomo Ịikpo phọ ạkaaph;ạmagh oomo areelhe aḅirini phọ emiigh kꞌẹpe erumuḍio phọ remite ghan bọ kụ esiemi ẹpe erumuḍio phọ remeel ghan bọ.
2 Ẹnaan edi ẹpe Zạyon kụ rẹmu;
ẹmha dị eseleman esi ẹnighe.
3 Ẹnaan phọ ayira retu, ọdi ráḅoorian ghan;
ạnian ọnuza edi ghisigh ọdi,
kụ oghim ako nyọdi akitonom.
4 Ọdi ạmagh kẹ phọ rꞌade phọ ạmeremi enye
mọ ọmiin ịpe ọno kaagbonaan bọ ịiruen we phọ ọno.
5 Kụ ạḅeni mọ, “Iikpomoghi we omeeraam mọ kꞌạmi,
bụphe rꞌạmi oghiran bọ ịyo phọ sịphe rọpighiron ghan bọ ẹkia phọ.”
6 Ạsike phọ egbeel mọ Ẹnaan eseleman ni,
mọ ọdi rꞌaloor kụ osophom ọoruen.
7 “Iler rụru, we ạmi,
mị kạkaaph;
mị kạgba ịkaraph anyina Ịzirel.
8 Mị ụ́tuan ịlo ạrikia phọ anyina kụ rạle bọ;
mụghumo ịlo ịphophoghineen ạrikia phọ nyina riruom ghan bọ ịmi oomo amem.
9 Mị ụ́wa ilephiri ạsinam
mꞌarekpe sịphe aḍita ịga phọ anyina.
10 Oomo ịnam mọ edi bọ ẹpe ạruukpua phọ ịlo ạmi,
rꞌạsinam mọ edi bọ ẹpe ạsimuunir aroogbolom mọ.
11 Oomo ịnun eḍum mọ ịlo ạmi,
rꞌoomo ịpe ẹmoogh bọ ghuḍum ẹpe aruuḍum mọ.
12 “Eru mạar dị ọkoony rusiph ịmi, mị inyina mípuru ẹlo olhe;
aḅirini phọ rꞌoomo ạraraar phọ edi bọ sịen aḅirini phọ ịlo ạmi.
13 Mịna rạba ghan ni iphulupul ilephiri ạsinam,
mꞌọphughol ịḅaal ạrutu-ịga ḍụghum?
14 Oboom ghan Ẹnaan phọ bịn kụ eru rịkia dị nyina kẹpinyon ghan.
Ẹḅile ẹngo ghan Egbogh Ẹnaan oomo phọ ịpe nyina eguanaan bọ.
15 Ụmagh ghan ịmi mem lọ nạ odi esi ịiḅaghami.
Mị kạphel li nyịna ạsighe
kụ nạ uboom ghan ịmi.”
16 Kụ ọlo Ọmoogh-we phọ rapuru ghan bụo ạsipioghom mọ mọ,
“Nyina ipu ghan rẹḅem ghan iilogh phọ ạmi ịlo oḍighinom eeghe?
Nyina epu ghan rẹkaaph aani ghan ịlo ịyo phọ ạmi oḍighinom eeghe?
17 Nyina ekel dị mị kiilemi inyina,
ikpo ọnhu ọghaaph phọ ạmi nyina mẹgumom ọman.
18 Nạ aḍighi ọyaghiri ạtorobo ọḅa dị nạ ạmiin;
abulhiom ẹmha rꞌạna kụ relian ghan.
19 “Ọḅemogh ghan ịkaraph bịn kụ edi ghan ọnhu ạna;
anem mọ ạna etoph ọghaaph ghan ọkpe bịn.
20 Nạ rọrol ude bịn pọ nạ kạgba ạpue umor ạna;
nạ rạgba ghan bịn kạphue mọony dị onhiin ạna kụ ạmar.
21 Nạ raḍighi yogh ghan ịphen phọ kụ mị aḅoronom ghan nyịna;
kụ nạ ragbiom ghan mọ mị ạghigh nyịna.
Kụ ọlo nyịidipho mị ạkpalham nyịna
ạḅile agananami ọghaaph phọ ạḅeni nyịna.
22 “Nyina ạbuphe mewula bọ Ẹnaan, ịnaghan ịphen phọ nyịidipho,
ọbo mị kiphiemi ghan bọ inyina
kụ oye dị kịphel inyina kạ́tol.
23 Ọngo ghan ạḍiseph kụ ẹkia dị righueni ghan ịmi.
Esi ọgba igey, mị kạpel li oomo ạbuphe ụnaghanan bọ ịmi.”