Ịiḅereghi oye dị rạmiinom
38
Ọmoogh-we, kụ́ḅaam ịmi rꞌọghagh ologhikạ́sighe ophin ologhi ạphurom rụru ạmi.
2 Ịkpina phọ ạna mịrabal ịmi ekpurion;
ạraghaagh phọ ạna kẹn miwiririom ịmi.
3 Aloor phọ ạmi mẹghola eminonom emuneen, loor ọghagh ologhi phọ ạna;
loor ịkaraph ạmi, omoon aloor ịmi úlhoonaan mun.
4 Ạsipioghom mọ ạmi mẹsiiny ẹmhu ạmi;
ẹemor adool phọ ạḍien mipel ịmi orool.
5 Ạreebephenu phọ ạmi memiteghu yogh ẹweleghian repur,
loor elologhi phọ ạmi.
6 Mị maguul aḍigh ạagia,
kụ mị odimom ghan rꞌọto oomo aḍio phọ.
7 Oomo ịgolom ọman phọ ạmi megbonyonu,
kụ mị rạarurughian.
8 Mị maphe aminonom aguul,
mị odimom ghan rꞌamukum ologhi rꞌịkum oomo aḍio phọ.
9 Ọmoogh-we, oomo ạruuphua phọ ạmi nạ alegheri ni;
ịkuph phọ ạmi ị́booghian esi ạna.
10 Ologhi ịmi úlho mun, rꞌẹnum ịnyaam ịmi ílho mun,
ariḍien phọ ạmi mẹphu.
11 Bụphe rꞌạmi ọphomoghian bọ rꞌạrighiri phọ ạmi mughel ịmi
loor esi ạroko phọ ạmi
ghạlamo asiya ạmi ịmi úḍighom mun.
12 Bụphe ruusophoghian bọ ịmi ịlo oghiigh muḍianaan ịmi ịka,
bụphe rọwa bọ oḍighi ạmi ịyaar ọpaar oogulemi ạmi
rꞌamem úsoph ogbiighiom ạmi ịkaraph.
13 Kụ mị phọ ịdipho ọḅaaghaph ḅạaghaph lọ ḍụghum rạ́naghan ghan.
Mị ịdipho ekpom ọka, ọnhu mị rạ́tagharan ghan.
14 Ii, mị ạkigh oye dị ḍụghum rạ́naghan ghan,
ḅịle ọnhu ạmi okpom, mị rạ́ḅa ghan.
15 Ọmoogh-we, igbiighi phọ ạmi edi esi ạna;
nạ kụ kụphagharanaan ịmi, Ọmoogh-we Ẹnaan ạmi.
16 Ọmoogh-we, kámeera ạbumulogh-ḍien phọ ạmi ọtuan ịminimiin phọ ạmi oboh;
kámeera bịdi ootuma ghan kụ ọḅem mọ ape nụun ni.
17 Mị mạḅile rạwa ghan okpeku,
kụ ịirurughian phọ ịmi ị́wile.
18 Mị aatuma ịkaraph phọ ạmi;
mị rạto ni esi ịkaraph phọ ạmi.
19 Ạbumulogh-ḍien phọ ạmi kụ umoon loor ọmoogh ịnyaam,
ḅịle bụphe ụlogh bọ ịmi ḍien kụ rụgbaanaan ghan bọ ịmi ọkpe aḍita ni.
20 Bụphe rụkpiom ghan bọ ịmi ịkaraph iiḅi lọ mị aḍighi rꞌạmi ụfian,
ịdi eḍighi bọ mị rạdaph ghan ịpe eru bọ ịne.
21 Ọmoogh-we, ịmi kúghel;
Ẹnaan ạmi, kạ́kel loor ạmi.
22 Ọmoogh-we, gboogborion aru ụphel ịmi. Nạ kụ ọpelia ạmi.