Abeeph phọ oye
36
*Ịkaraph eḍigh ologhi ọkaraph oye phọ;ọdi ọ́moogh oghiilaan Ẹnaan rꞌọlogh ọdi eegu,
2 ịdi eḍighi bọ ọdi rạatughian ghan mọ, “Oboom mọ ạmina;
Ẹnaan rẹ́miin sịpioghom mọ ạmi.”
3 Ọghaaph ọdi, ọghaaph iigbegheḍiom rꞌọkpe bịn,
ọdi maghel olegheri ịyaar rꞌoḍighan ịlo ẹnighe.
4 Ịkaraph igbiighi bịn kụ ịitughian ọdi mem lọ ọdi ạmina;
aseerian loor phọ ọdi ịkaraph igbiighi,
óghel sịpioghom.
Ẹphomoghian phọ Ẹnaan
5 Ọmoogh-we, ẹphomoghian phọ ạna rémuneen ghan bọ edi ẹpe kꞌạke;
oḍuom-ologhi phọ ạna asi ni ẹpe okuaḍio phọ.
6 Aruukuan phọ ạna epoph ịdipho aruugum,
ḅịle ịiruen phọ ạna ẹkel ịdipho eḍiiny ọphiiny.
Nạ kụ raako ghan ịnam rꞌawe.
7 Ẹnaan, pọ eeghia ịdi ẹphomoghian phọ ạna rémuneen ghan bọ ẹnighe,
Awe rọbooghian ghan sịphe uba araphaaph phọ ạna.
8 Yoor role ghan eḍien phọ ẹpe nạ ụngo bọ iyoor amuzeḍi
ḅịle yoor rọpughol ghan mụum ọphiiny ẹnighe phọ ạna.
9 Oomo ịnhu aghuḍum mọ ayoor edi ghan esi ạna;
ạḍiḅaal phọ ạna kụ ẹdi yoor rọmiinom ghan eten.
10 Ẹphomoghian ọnma ighirigiir phọ ạna esi ạbuphe olhegheri bọ nyịna kíkunughian;
ạpeleeny phọ ạna ạrolonaan ni bụphe ọmoogh bọ igeny iloghi.
11 Kámeera awe oobaga ugbekian ịmi;
kámeera kẹn ạḍighaagh oye ạsipioghom mọ igboton ịmi dọl.
12 Monyuughi bụkaraph awe olereghi.
Bịdi momeleghu, ịlo oḅetenu bịdi ílho mun.