Oboomiom ịlo ọkpar-opu
21
Ọmoogh-we, ịnyaam mọ ạna rẹngo ghan ọdaam mọ ọḅaal ologhi.Ọdi raboom ni nyịna iboom loor ịdipho nạ ạphel bọ nyọdi.
2 Nạ mạngo nyọdi ịpe ịitughian ologhi phọ ọdi rẹwa bọ,
ḅịle nạ ọ́ḅitonaan ịpe ịidoronhu phọ ọdi ẹlhom bọ nyịna.
3 Nạ mạseph nyọdi ạngo igeny,
ạsighe eghoony agol azu nyọdi.
4 Ọdi ạlhom nyịna ghuḍum kụ nạ ạngo nyọdi;
ạḅaram ḍịkpo mọ ọdi ạrol abia.
5 Eghuan phọ ọdi ẹbugh ni, loor ọloghonaan ạḍighaagh phọ ạna.
Arughuenian rꞌigbogh kụ ịdi nạ ạḅaram bọ kụ ạngoom nyọdi.
6 Ạḍiseph phọ nạ ạseph bọ nyọdi kẹtolonaan ni nyọdi kꞌagee-pọ;
kụ elhor phọ ạna rẹngo ghan nyọdi ọḅaal ologhi.
7 Ọmoogh-we Egbogh Ẹnaan, ọdaam mọ aḍuom ni nyịna ologhi,
kụ loor ẹphomoghian phọ ạna rémuneen ghan bọ,
dọl phọ ọdi, nyọdi kógboton.
8 Ọdaam mọ kasiph ni oomo ạbumulogh-ḍien phọ ọdi.
Ọdi kasiph ni tọrobo ọlo ạlogh nyọdi ḍien.
9 Nạ kapiemi ni bịdi ịdipho aḍiboom ạnian,
mem dị nạ amite.
Ọmoogh-we phọ kạminogh ni bịdi rꞌọghagh ologhi,
kụ ạnian ẹmoogh bịdi.
10 Nạ kapiemi ni nmụny ạbidi sịen aḅirini phọ.
Ọdaam mọ kạze ni oomo ạbidi.
11 Bịdi rogbiighiom ghan nyịna ịkaraph, kụ rọotughian ghan oguulom ạna,
ịyaar bịdi kótue oḍighi.
12 Bịdi kosumughu ni,
mem lọ nạ ạkpami kụmugh phọ ạna kụ agbon ịkpina phọ asomoriom bịdi.
13 Ọmoogh-we, yoor roboom ni nyịna loor iboom ịnyaam mọ ạna;
yoor kọmoor ghan sụor kụ oboom ghan ịikpo phọ ạna.