Eegu Ẹnaan rꞌeghuan oye
8
Ọmoogh-we, Ọmoogh-we phọ ayoor,aḍigbogh aḍien phọ ạna eepaany ni oomo aḅirini phọ.
Igbogh phọ ạna esi ni ạnyu ạke.
2 *Nạ kụ ụto bọ ni mọ ạnmuny rꞌạbuphe rọmaam ghan bọ mạmaam ọmoor sụor oghueniom nyịna.
Ịyaar nyịna ị́kan.
Nạ rakikima ghan bụlo ọlhogh nyịna ḍien.
3 Mem lọ mị aphogh ạnyu ạke phọ ọpo nạ ạlhem bọ,
ạmiin ụnwanyu phọ rꞌạraanaan phọ ịpe nạ asereghi bọ riisi kịrokiro phọ ạbidi,
4 *oye phọ pọ eeghe kụ nạ aseerian bọ nyọdi ologhi,
oopho phọ oye kụ ọdi nạ rapogh ghan!
5 Ghạlamo ịduon ni nạ ạlhem nyọdi asooromi ẹphurukpu apuemi rụukpaany phọ ạna bịn,
nạ azu nyọdi eghoony eegu rꞌeghuan.
6 *Nạ ạdaami nyọdi mọ aphogh ghan oomo ạraraar phọ nạ ạlhem bọ.
Nạ ạḅogh oomo ạraraar ạlogh ḍịghaagh ọdi,
7 oomo iyool-ịga rꞌạsinam mọ, rꞌilhom ịnam mọ kẹn,
8 ịnun okuaḍio phọ rꞌina ọphiiny phọ,
rꞌoomo ịpe edi bọ ologhi ạrumuum mọ.
9 Ọmoogh-we, Ọmoogh-we phọ ayoor,
igbogh phọ ạna eepaany ni oomo aḅirini phọ.