Ịiḅereghi ọloghonaan ạḍighaagh mem ịiḅaghami
6
*Ọmoogh-we, kụ́ḅaam ịmi rꞌọghagh ologhi.Kạ́sighe ghẹlhe ạphurom rụru ạmi.
2 Mị madughogh. Ọmoogh-we, ụnma ịmi ighirigiir.
Ịḅarara ạmi rephighaphigha. Uukonom ịmi.
3 Uwaloor phọ ạmi kẹn rạmiinom ni.
Pụr amem kụ ẹdi kẹpher nyịna ọlhiom ạmi?
4 Ọmoogh-we, loor ọnma ighirigiir phọ ạna,
tue ụtagharan ịmi esi aḍuugh.
5 Ọlo mamugh nyịna rạ́atughian ghan mun.
Ọmar iḍim, ạnhian kụ kạseph nyịna?
6 Mị mạghola raminonom loor ịminimiin.
Izin rẹḅore ghan ẹmina phọ ạmi ḍughul aḍughul.
Ọḅetenom ẹmhu phọ ạmi rạḅor ghan rꞌizin.
7 Ariḍien ạmi meḅaaghaph;
mị rạ́miin ghan mun igey eten
loor ọto phọ ạbumulogh-ḍien phọ ụlhogh bọ ịmi.
8 *Ịkporion ịmi rạghaagh, nyina abuḍighinom ịkaraph.
Ọmoogh-we phọ rạnaghan ghan ni emoghi phọ ạmi.
9 Ọdi ạnaghan kẹn ni ịiḅereghi phọ ạmi,
ḅịle kụloghonaan ni ịmi ḍịghaagh.
10 Umugholoor kasiph ni oomo ạbumulogh-ḍien phọ ạmi;
kọwalalami bịdi ekperenom oḅulemi ọman.