3 Oomo awe phọ Ịzirel ụmeregha sịphe. Kụ ọdaam mọ akiton asoman bịdi kụ ạlom ḍịseph Ẹnaan asoorom bịdi. 4 ^*Ọdi ạḅem mọ, “Ạḍiseph ẹrolonaan Ọmoogh-we Ẹnaan phọ Ịzirel. Ọdi maḍighi amuneni ịpe ọdi aguanaan bọ Devid ọde ạmi, mem dị ọdi ạḅeni nyọdi mọ, 5 ‘Emiigh kꞌamem mọ mị ạsighe bọ we phọ ạmi ạḍuanam ẹpe Ijipt kụ ẹteeny rodon, mị ụ́saḅar ẹmha sịphe ade phọ Ịzirel kụ ạḅem mọ ịsien kụ esi dị kọlogh otu dị kuseeny ghan ịmi, kụ mị ụ́ma oye dị kaḍiemiom we phọ ạmi Ịzirel. 6 Kụ nyịidipho mị mạsaḅar Jeruselem kụ esi dị kuseeny ghan ạmi, kụ nạ Devid kụ kạda we ạmi.’”

7 Kụ ạSolomon ạḅile ạḅem: “Ịrol ghan ni ologhi aDevid ọde phọ ạmi ịlo ọlogh otu ịiḅereghi ooseeny ghan Ọmoogh-we Ẹnaan phọ Ịzirel, 8 kụ ọlo Ọmoogh-we phọ ạḅeni nyọdi mọ, ‘Nạ ọ́pioman ọotughian ịlo ọloghonaan ạmi otu ịiḅereghi, 9 kụ nạ kạ́logh. Keḍighi mọony ạna, kụ kạlogh otu ịiḅereghi ạmi.’

10 “Nyịidipho Ọmoogh-we phọ maḍighi amuneni oguan phọ ọdi: mị mamite ạsighe esi ọde phọ ạmi, ạtolom ạgada ọdaam mọ Ịzirel, kụ mị mạlhoghonaan otu ịiḅereghi ooseeny ghan Ọmoogh-we Ẹnaan phọ Ịzirel. 11 Mị maseere sịphe Otu Ịiḅereghi phọ Igbe Ịyo phọ, esi phọ ọlogh bọ ịdaabili asighiigh ịyo phọ Ọmoogh-we phọ aghiran bọ rꞌawe phọ Ịzirel.”

12 Kụ ạSolomon ạghi ạmeera ghisigh enmeny ạrikia Ọmoogh-we phọ, sịphe esomanan oomo awe ookpomoghan phọ Ịzirel, kụ aphoophe rạghaagh esi ịiḅereghi. 13 (ẠSolomon maselemi esi ọsiiny dị aḍighinom enaba kụ aseere ogiga phọ. Iḍighi 2.2 akuḅu rꞌopeel inya ịigaany phọ, 1.3 akuḅu rꞌopeel ḍiphoph. Ọdi ạsiiny ni esi phọ ẹphen kụ akpuḍian esi dị tọrobo oye kạmiin nyọdi, kụ aphoophe rạghaagh phọ ạghiom okuaḍio.) 14 Ọdi ạaḅereghi mọ, “Ọmoogh-we Ẹnaan phọ Ịzirel, ẹnon ẹmugh dị ẹghigh nyịna ílho, mꞌẹpe ạnyu ạke phọ mꞌịsien ade phọ. Nạ ạpamanam ni ịyo phọ nạ aghiran bọ rꞌawe ạna, kụ aḍeenaan bịdi ẹphomoghian ạna mem dị bịdi ọrolan nyịna rꞌoomo ologhi. 15 Nạ maḍighi oomo ịpe nạ aguanaan bọ Devid ọde phọ ạmi; rodon tọrobo ekpo ọnhu moḍighi omuneni. 16 ^*Nyịidipho, Ọmoogh-we Ẹnaan Ịzirel, mitiom ni ọphori phọ oguan phọ nạ ạmooghaan bọ rꞌọde phọ ạmi mem dị nạ ạḅeni nyọdi mọ oniin ọony ọony ọdi kaḍighi ghan ni ọdaam Ịzirel, eḍighi mạar dị bịdi omiighe loor ooko iilogh phọ ịdipho ọdi aako ghan bọ. 17 Kụ nyịidipho, Ọmoogh-we Ẹnaan Ịzirel, ḍighi ịdi oomo ạraraar phọ nạ aguanaan Devid otelhedom mọ ạna kemite.

18 ^*“Kụ nạ katue ni, Ẹnaan, ạtolan sịen ade phọ ogbo alephiri rꞌạnmariir? Ghạlamo oomo ạke phọ ọ́yaghagha dị ạmanam nyịna ọrol kụ keḍighi ika kụ Otu Ịiḅereghi phọ ọphon mị ạlogh bọ ạkasian nyịna ọrol? 19 Ọmoogh-we Ẹnaan ạmi, mị otelhedom ạna. Nạghanan ịiḅereghi phọ ạmi kụ ụngo ịmi ịlom mọ mị ạlhom bọ nyịna. 20 ^*Mạar aphogh Otu Ịiḅereghi phọ ọphon ootaany rꞌaḍughul. Nạ maguanaan mọ ịsien kụ esi dị kooseeny ghan nyịna; ịduon phọ ụnaghanan ịmi mem lọ mị asoman Otu Ịiḅereghi phọ ọphon kụ ạaḅereghi. 21 Nạghan ịiḅereghi ạmi rꞌịiḅereghi awe phọ ạna Ịzirel mem lọ bịdi osoman esi phọ ịsien kụ ọoḅereghi. Ẹpe ạdol phọ ạna kꞌạke ụnaghanan iyoor kụ ạsar ụwilenaan iyoor.

22 “Mem lọ ọḅem mọ oniin ạpioman nyoniin kụ ọsighe oru sịphe enmeny ẹkia phọ ạna sịen Otu Ịiḅereghi phọ oghunya mọ ọdi ósoor ologh, 23 Ọmoogh-we, nạghan ni ẹpe kꞌạke asophonaan ọoruen butelhedom mọ ạna. Lịom ọlo ạpioman ịlo ẹkpianaan, kụ agheelemi nyọpo ụ́pioman bọ.

24 “Mem lọ ẹpomoghian ọkpar opu we phọ ạna Ịzirel loor esi dị bịdi ọpioman nyịna kụ bịdi okiton osoman nyịna kụ oru Otu Ịiḅereghi phọ ọphon rꞌosooromi aloor, kụ ọlom nyịna ọsar ọwilenaan, 25 nạghan bịdi kꞌạke. Sạr ạwilenaan ịkaraph awe ạna, kụ ạsighe bịdi aḅulemi sịphe ade phọ nạ ạngo bọ bịdi rꞌạburude ạbidi.

26 “Mem nạ ạpham ọlophia mọ kụ úlho loor esi dị awe phọ ạna ọpioman nyịna kụ bịdi okiton osoman Otu Ịiḅereghi phọ ọphon rꞌosooromi aloor kụ ọoḅereghi, 27 Ọmoogh-we, nạghanan bịdi kꞌạke. Sạr ạwilenaan ịkaraph abutelhedom ạna, we phọ Ịzirel, kụ ạtughemi bịdi oḍighi ghan ịlo ẹnighe. Kụ, Ọmoogh-we, soore ọlophia sịen ade phọ ạna, ḍịphe nạ ạngo bọ we phọ ạna mọ ọmoogh kꞌagee-pọ.

28 “Mem lọ ẹkuom eḍien esoor sịen ade phọ, mụghumo ẹkaraph ẹzegh; mụghumo ịizupha kụ iguul mem ogbogh oghim, mụghumo igurubia; mụghumo ạbumulogh-ḍien ozuom we ạna, mụghumo ịirurughian kụ ẹteeny bịdi; 29 nạghanan ịiḅereghi ạbidi. Eḍighi ịyaar dị oniin sịphe awe phọ ạna Ịzirel dị ologhi ụ́ḅaal kụ ạlhel rạghaagh ọdi asomeriom Otu Ịiḅereghi phọ ọphon, 30 pọ nạghan ịiḅereghi ọdi. Nạghanan nyọdi kꞌịsiphe ạdol phọ ạna ẹpe kꞌạke kụ ạsar ạwilenaan. Nạ bịn kụ ulegheri ịitughian ologhi oye. Poghom tọrobo oye ịlo ẹgbaanyan nyọdi, 31 ọbo awe phọ ạna oghueni nyịna, ọḅile ọnaghanan nyịna oomo amem mọ bịdi kọtol bọ sịen ade phọ ạḍiphe nạ ạngo bọ bụrude ạburude ayoor.

32 “Ịdipho kẹn, mem lọ ooruen dị útu ọlo kꞌawe phọ ạna Ịzirel, ạḍua ekpisi dị ẹkel kụ aru rạaḅereghi sịen Otu Ịiḅereghi phọ ọphon ịdi eḍighi bọ ọdi mạnaghan mọ nạ ạbugh kụ mọ nạ ạnya oomo amem oḍighi ịikia, 33 nạghanan ịiḅereghi ọdi. Kꞌạke, ẹpe nạ odi ghan bọ, nạghanan nyọdi kụ aḍighi ịlo ọdi ạlom nyịna, ẹrol dị oomo areelhe aḅirini phọ olegheri nyịna, ọḅile ọnaghanan nyịna ịdipho awe phọ ạna Ịzirel roḍighi ghan bọ. Pọ kụ amem dị bịdi kolegheri mọ Otu Ịiḅereghi phọ ọphon mị mạlhogh bọ kụ esi dị kooseeny ghan nyịna.

34 “Mem lọ nạ ạto mọ awe phọ ạna ọghi eenom ẹgham rꞌạbumulogh-ḍien ạbidi kụ bịdi ọoḅereghi nyịna, tọrobo ạga lọ bịdi ọrol, ropogh ghan ẹmha phọ ẹphen nạ mạsaḅar bọ rꞌOtu Ịiḅereghi phọ ọphon mị mạlhoghonaan bọ nyịna, 35 nạghanan ịiḅereghi ạbidi. Tọl kꞌạke ạnaghanan bịdi kụ ạngo bịdi ọkpar opu.

36 “Mem lọ awe phọ ạna ọpioman nyịna kụ oye ólho dị rạ́pioman ghan kụ nạ ạghagham bịdi ologhi kụ ạḅogh bịdi ạngo bụmulogh-ḍien phọ ạbidi osiphi bịdi ọpham ọghimom ḍịnon ade, ghạlamo ade dị ẹkel iboom, 37 nạghanan ịiḅereghi awe phọ ạna. Eḍighi ịyaar dị ẹpe ade phọ ạḍiphe bịdi okiton kụ ọoḅereghi nyịna, ọghaaph omitiom ịkaraph ạbidi rꞌịdi bịdi eeph, pọ nạghanan ịiḅereghi ạbidi, Ọmoogh-we. 38 Eḍighi ịyaar dị ẹpe ade phọ ạḍiphe bịdi ọkar ri okiton rꞌoomo ologhi kụ ọoḅereghi nyịna ịdipho bịdi ropogh bọ de phọ ạḍien nạ ạngo bọ bụrude ạburude ayoor, ẹmha phọ ẹphen nạ mạsaḅar bọ rꞌOtu Ịiḅereghi phọ ọphon mị mạlhoghonaan bọ nyịna, 39 pọ nạghanan ịiḅereghi ạbidi. Kꞌạke, ẹpe nạ odi ghan bọ, nạghanan bịdi kụ ạmoogh ighirigiir ạbidi kụ ạsar oomo ịkaraph awe phọ ạna ạwilenaan.

40 “Nyịidipho, Ẹnaan ạmi, uphogh iyoor kụ ạnaghan ịpe yoor rọoḅereghi ghan bọ nyịna esi phọ ịsien. 41 ^*Ḅetenu nyịidipho, Ọmoogh-we Ẹnaan, rꞌIgbe Ịyo phọ, eḍeenaan ịikpo phọ ạna, ḍigh Otu Ịiḅereghi phọ ạrol sịen kꞌagee-pọ. Sẹph riil ạrikia ạna oomo ịlo bịdi oḍighi, kụ oomo awe ạna ọmoogh ọḅaal ologhi loor ẹmhu ạghusan ạna. 42 Ọmoogh-we Ẹnaan, kákel ọdaam mọ nạ mạsaḅar bọ. Tụutughian ẹphomoghian phọ ạna esi aDevid otelhedom mọ ạna.”