24
*Mem mọ ạmuphe aJehoyakim ạda bọ, ạNebukadnezar ọdaam mọ ạBabilon azuom Juda ẹgham kụ aJehoyakim aḍighi otelhedom ọdi ịraar ạsia, kụ ọdi akiton ạmoogh oḅom ẹmhu ọ́naghanan mun nyọdi. 2 Ọmoogh-we phọ arom ḍita awe kịrokiro bụdi rozirion ghan we rạraar kọsighiogh, bụo ạBabilon rꞌạbuo ạSiria rꞌạbuo Mọab rꞌạbuo Amon mọ bịdi ọghi ozuom Juda ophiemi, ọdaph ikpo ọnhu phọ ịpe Ọmoogh-we phọ ạghaaph bọ ạḅeni butelhedom mọ ọdi riil phọ. 3 Agey ni ịpe Ọmoogh-we phọ ạghaaph bọ ịtuugh ni ịdipho phọ emitenaan Juda, ọsighe ạbidi ọgbole esomanan ọdi, loor ạsipioghom mọ ạManase, ọdaph oomo ịpe ọdi aḍighi yogh bọ, 4 rꞌaloor ẹmhu awe phọ ạbuphe mạar ụ́piom bọ kụ dị ạze bọ; ịḅaal awe dị mạar ụ́piom kụ ịdi dị azuughi amuzeḍi ẹpe Jeruselem, kụ Ọmoogh-we phọ nyọdi kạ́bilenaan.5 Oomo ịnon ịlo aJehoyakim rꞌiiḍighi phọ ịpe ọdi aḍighi yogh bọ, ọge ni sịphe ạḍinya phọ ịpe emiteghu bọ mem ạbudaam mọ aJuda. 6 Kụ aJehoyakim amugh ạtuonom bụrude phọ ọdi, kụ aJehoyasin ọony phọ ọdi ạsighe dọl phọ ọdi ạda.
7 Kụ ọdaam mọ Ijipt ọ́ḍua ghan mun sịphe ade phọ ọdi, ómite ghan mun rꞌẹnum ịdi eḍighi bọ ọdaam mọ ạBabilon mạsighiogh oomo phọ ade phọ ọdaam mọ Ijipt ạmoogh bọ, emiigh kꞌỌphiiny Ijipt ẹsighe ẹghi esiemi ẹpe Ọphiiny aYufratis.
AJehoyasin ọdaam mọ aJuda
8 AJehoyasin ạman bọ ḍioph rꞌọphaanya ạsia kụ ọdi agbi bọ ọda aJuda. Kụ ọdi ạda bọ ịraar ụnwanyu ẹpe Jeruselem. Ḍien onhiin phọ ọdi ughol mọ aNehusta ọnyani phọ Ẹlnatan ọlo aJeruselem. 9 Kụ ọdi aḍighi yogh ịdi ị́nighe risigh Ọmoogh-we phọ, ạdaph oomo ịkaraph phọ ọde phọ ọdi aḍighi yogh bọ kụ aḍighi ghan.
10 Mem ọda phọ ọdi kụ ẹdi abutelhedom ạNebukadnezar ọdaam mọ ạBabilon ọghi ozuom Jeruselem ẹgham okpobiom ẹmha phọ. 11 Mem mọ ạmuphe phọ ạNebukadnezar rꞌaloor ọdi ạghi aani ni ẹgham mọ. 12 *Kụ aJehoyasin ọdaam mọ aJuda ameel aḍigh ḍịghaagh ạBabilon, ọdi rꞌonhiin phọ ọdi rꞌabutelhedom mọ ọdi rꞌikpolom awe phọ ọdi rꞌạbuo iiḍighi phọ ọdi. Ẹman bọ ọphaanya ạsia ạNebukadnezar ạda bọ kụ ọdi asiph aJehoyasin ạlogh ikoli. 13 Kụ ạNebukadnezar ạghi aakoroghi oomo aruphua phọ ẹrol bọ sịphe Otu Ịiḅereghi phọ rꞌịsiphe otu ọdaam mọ ạsighiogh. Ịdipho Ọmoogh-we phọ ạghaaph bọ, ọdi ạkiriph oomo ạraraar phọ oḍighinom bọ gol ịpe Sọlomon Ọdaam mọ Ịzirel aḍighi bọ aseere sịphe Otu Ịiḅereghi phọ. 14 Kụ ạNebukadnezar asiphi oomo awe phọ aJeruselem, ịkpana awe phọ rꞌikpolom awe phọ ọman bọ ịyaar, bụo ạmaka rꞌạbuo ọlem mọ, awe dị ọman ḍioph ọonir, aḍighi ịdi bịdi ọḍua ọghi orugh ịnon arikpisi. Oye ósugha omuton rukulom awe rꞌighiil awe bịn kụ usugha sịphe ẹmha phọ.
15 *ẠNebukadnezar asiph Jehoyasin ạpham agheelom Bạbilon, ạḅaram onhiin ọdaam mọ rꞌạnmariir ọdaam mọ rꞌạbuo iiḍighi phọ ọdi rꞌikpolom awe ịsiphe ẹmha phọ. Ọdi asiphi bụen phọ sịphe Jeruselem ạpham agheelom Bạbilon. 16 Ạḅaram kẹn ikpolom awe phọ ọmoogh bọ ịikpo ọman bọ oḍual ọonir awe, rꞌạbuo ạmaka phọ rꞌạbuo ọlem mọ rꞌạbuphe ọmoogh bọ ịnyaam ọmanam bọ ọghi ẹgham ọman bọ oniin ọonir awe. Bụen kụ ạbudi ọdaam mọ ạBabilon asiphi bọ ạpham bọ agheelom Bạbilon.
17 *Kụ ọdaam mọ ạBabilon ạsighe Matanaya umor ọde phọ aJehoyasin aḍighi ọdaam ẹmha ạsighe dọl phọ ọdi ạda. Kụ anme ḍien ọdi kụ aghol mọ Zẹdekaya.
ẠZedekaya ọdaam mọ aJuda
18 *ẠZedekaya ạman bọ ịyaldi rꞌoniin ạsia kụ ọdi agbi bọ ọda Juda. Kụ ọdi ạda bọ ḍioph rꞌaḍiniin ạsia ẹpe Jeruselem. Ḍien onhiin phọ ọdi ughol mọ aHamutal ọnyani phọ aJerimaya ọlo aLibna. 19 Kụ ọdi aḍighi yogh ịdi ị́nighe risigh Ọmoogh-we phọ, ạdaph oomo ịkaraph phọ ịpe aJehoyakim aḍighi yogh bọ kụ aḍighi ghan. 20 *Ọmoogh-we phọ ạghagham ni ologhi iboom weye phọ aJeruselem rꞌaJuda, dị tụtu ọdi aphorogh bịdi ọḍua risigh ọdi.