ẠManase ọdaam mọ aJuda
21
ẠManase ạman bọ ḍioph rꞌịyal ạsia kụ amiigh ọda aJuda, kụ ọdi ạda ẹpe Jeruselem ooghdi rꞌoogh ạsia. Ḍien onhiin phọ ọdi ughol mọ aHefziba. 2 *Kụ ọdi aḍighi yogh ịkaraph risigh Ọmoogh-we phọ, ạdaph oomo ạsiḅaphanya ạbuo aruru phọ bụphe Ọmoogh-we phọ aphorogh bọ ạsighe esomanan awe phọ Ịzirel. 3 Ọdi ạḅile aselemi riisi ooseeny aruru phọ ịpe ạHezekaya ọde phọ ọdi maphiemi bọ, adoghoḍinaan Baal renmeny ạrikia, ạḅologh igbudu um-ạke Asera ịdipho Ehab ọdaam mọ Ịzirel ạḅologh bọ kụ ạaḅereghi ghan oomo ọdo kịrokiro ạraanaan, aaseeny ghan bịdi. 4 *Kụ adoghoḍi renmeny ạrikia sịphe Otu Ịiḅereghi phọ, sịphe Ọmoogh-we phọ ạḅem bọ mọ ịsiphe Jeruselem kụ ẹdi aḍien phọ ọno kẹtol bọ. 5 Kụ ọdi adoghoḍinaan renmeny ạrikia oomo ọdo kịrokiro ạraanaan, sịphe ịyal phọ aroghoony phọ ịsiphe Otu Ịiḅereghi phọ. 6 Aḍighi kẹn ịdi ọony ọdi arelhe ologhi ạnian aten, aako yogh ghan siḍio, aḍighi yogh ghan ịiḍaany, aḍighan rꞌịkaraph aruwaloor rꞌạruuḅaghama. Ạsipioghom mọ ọdi ịphughan ni risigh Ọmoogh-we phọ, kụ ẹghagh ologhi ọdi. 7 *Kụ ọdi aseere igbudu um-ạke Asera ạsighe ạmeremi sịphe Otu Ịiḅereghi phọ, esi phọ Ọmoogh-we phọ ẹḅeni bọ Devid rꞌạSolomon ọony phọ ọdi mọ, “Sịen Jeruselem, sịen Otu Ịiḅereghi phọ ọphon, kụ esi dị mị mạsaḅar ạsighe sịphe oomo arughunughun phọ Ịzirel, esi dị kuuseeny ghan ịmi. 8 Kụ eḍighi ịyaar dị awe phọ Ịzirel kọnaghanan oomo ịtooghi phọ ạmi kụ ooko oomo Ologh phọ otelhedom ạmi Mozis ạngo bọ bịdi, bịn mị kámeera mọ ophorogh bịdi ọsighe sịphe ade phọ mị ạngo bọ bụrude ạburude ạbidi.” 9 Kụ ọlo bịdi ụ́naghanan. ẠManase ạphue ni bịdi bịn royeela yogh bịn koḍighi yogh ịkaraph dị epu ịpe ạramha phọ ịpe Ọmoogh-we phọ aphiemi bọ esomanan awe phọ Ịzirel.10 Kụ Ọmoogh-we phọ ạghaaph ạḅeni butelhedom mọ ọdi ariil phọ mọ, 11 “ẠManase ọdaam mọ aJuda maḍighi yogh sịḅaphanya phọ ịphen phọ, aḍighi yogh ịkaraph dị ẹphughan epu ịpe awe aKenan oḍighi yogh ghan bọ. Aruru phọ ọdi meḍighi ịdi aJuda oḍighi yogh ịkaraph. 12 Kụ iḍighi Ọmoogh-we Ẹnaan phọ Ịzirel ạḅem mọ, ‘Mị kạsighe ọdo ịkaraph dị tọrobo oye lọ ạnaghan, areḅeri ọdi kepula yogh ni ạsighe atu ẹpe Jeruselem rꞌaJuda. 13 Mị kạliom ni Jeruselem ịdipho mị ạliom bọ Sameria, ịdipho mị aḍighi bọ Ehab ọdaam mọ Ịzirel rꞌawe phọ ọdi. Mị kaḅeer weye ẹmha phọ aJeruselem ạsighiogh, ẹmha phọ ẹḅaal ịdipho ẹkpa lọ ootol kụ ozuemi. 14 Kụ mị akel ịyal-ikpo ạbuphe osugha bọ kụ mị ạḅogh bịdi ạlogh ḍịghaagh ạbumulogh-ḍien phọ ạbidi. Bịdi kọkigh ịdipho ạraraar dị ọpham ẹgham kụ orighelom esi ạbumulogh-ḍien phọ ạbidi. 15 Mị kaḍighi ni ịphen phọ we phọ ạmi ịdi eḍighi bọ bịdi moḍighi yogh ịdi rẹkagh ologhi ạmi, emiigh kꞌaḍio phọ ạḍiphe ạburude phọ ạbidi ọḍua bọ ẹpe Ijipt eru ẹteeny kꞌarodon.’”
16 Bịle kẹn, ạManase ạze ịminighan awe dị ịyaar ụ́piom tụtu ịḅaal phọ ekil oomo phọ areten phọ aJeruselem. Ịkaraph phọ ọdi eḍighi ịdi aJuda oḍighi yogh ịkaraph; oḍighi yogh ịdi ị́nighe risigh Ọmoogh-we phọ.
17 Oomo ịnon ịlo ạManase rꞌiiḍighi phọ ọdi rꞌạsipioghom mọ ọdi, ọge ni sịphe ạḍinya phọ ịpe emiteghu bọ mem ạbudaam mọ aJuda. 18 ẠManase amugh ạtuonom bụrude phọ ọdi, kụ oḍi nyọdi sịphe oghoony phọ Uza atumeniom bọ otu phọ ọdi. Kụ Ạmon ọony phọ ọdi ạsighe dọl phọ ọdi ạda.
Amon ọdaam mọ aJuda
19 Ạmon ạman bọ ịyaldi rꞌịyal ạsia kụ amem dị ọdi amiigh ọda. Kụ ọdi ạda bọ ịyal ạsia ẹpe Jeruselem. Ḍien onhiin ọdi ughol mọ Mesulemet, ọnyani phọ aHaruz ọlo aJotba. 20 Ọdi aḍighi yogh ịdi ị́nighe risigh Ọmoogh-we phọ, ịdipho ạManase ọde phọ ọdi aḍighi yogh bọ. 21 Ọdi ạdaph reten eḍighinom ạraraar ọde phọ ọdi, kụ aaseeny ghan ruru ịpe ọde phọ ọdi aaseeny ghan bọ ạaḅereghi. 22 Ọdi aghel Ọmoogh-we Ẹnaan ạburude phọ ọdi, kụ óoko ghan iilogh phọ ọdi.
23 Abutelhedom mọ Ạmon omitenom nyọdi ẹkaraph ezue kụ oghiigh ọdaam mọ sịphe otu phọ ọdi. 24 Kụ awe ịsiphe ade phọ ọze oomo ạbuphe omitenom bọ Ọdaam Ạmon ẹkaraph ezue phọ kụ oghiigh bọ, kụ awe ịsiphe ade phọ ọsighe Josaya ọony phọ ọdi oḍighi ọdaam, ọsighe esi phọ ọdi ọda.