Awe iiḍighi phọ ạSolomon
Oyil abiil phọ: Azaria ọony phọ ạZedok
3 Ạbugeeghiom ạrinya: Elihoref rꞌAhaija, ạnmuny phọ aSisa
Ọpamam ịgeeghi: ạJehosafat ọony phọ Ahilud
4 Uw-ẹmhu awe ẹgham mọ: aBenaya ọony phọ ạJehoyada,
ariil ạrikia: ạZedok rꞌẠbayata
5 Opoghom ạbuo iiḍighi: Azaria ọony phọ aNetan
Ọyaghiri dị aroma ghan ọdaam mọ: aZabud ọony phọ aNetan
6 Opoghom abutelhedom otu phọ: Ahisar
Uw-ẹmhu ạbuo iisogh phọ: Adoniram ọony phọ Abda.
7 ẠSolomon ạmoogh bọ ḍioph rꞌịyal ikpolom awe dị ophogh ghan oomo phọ Ịzirel. Bụen phọ kụ ụngo ghan eḍien ọdaam mọ rꞌọto ọdaam mọ. Tọrobo ọnyo ạbidi ụngo ghan ọdaam mọ rꞌọto ọdi eḍien. Oye ye rạngo ghan bọ ọdaam mọ rꞌọto ọdi oniin ụnwanyu lhạ. 8 Ịphen kụ asiḍien phọ ạbidi rꞌareelhe phọ ạbidi:
Bẹn Hur: aruugum Ifraim
9 Bẹn Deker: rạmha Makaz, Saalbim, Bẹt Semes, Elon, Bẹt Hanan
10 Bẹn Hẹsed: rạmha Arubot, Soko, rꞌoomo eelhe aHefer
11 Bẹn Ạbinadab olhom aTafat ọnyani phọ ạSolomon: eelhe aDor
12 Bạana ọony Ahilud: rạmha Taanak, Megido, rꞌoomo phọ ẹpe Bẹt Sạn ẹpe etuman bọ Zaretan ẹkuan bọ Jẹzreel, ẹḍua Bẹt Sạn ẹghi esiemi ẹpe Ebel Mahola ọtol rophogh Jokmiam
13 Bẹn-Geber: ẹmha aRamot Gịliad rꞌoomo ạramha phọ aJair ọony phọ ạManase edi bọ ẹpe Gịliad, rꞌeelhe Argob phọ edi bọ ẹpe Bạsan, odiinydi igbogh ạramha dị ọḅiir, ọsighe enaba kụ oghoonyom
14 Ạhinadab ọony phọ Ido: eelhe aMahanaim
15 Ahimaaz olhom mọ aBasemat ọnyani phọ ạSolomon: eelhe ạNaftalai
16 Bạana ọony phọ aHusai: eelhe Ạser rꞌẹmha aBialot
17 ẠJehosafat ọony phọ aParua: eelhe ạIsaka
18 ASimei ọony phọ Ẹla: eelhe ạBenjamin
19 AGeber ọony Uri: eelhe ạGiliad, nyẹpe aSihon ọdaam mọ Ạmorait rꞌỌg ọdaam mọ ạBasan.
Ọdi bịn kụ oniin uwo ẹmhu iiḍighi dị ạrol ẹpe ade phọ.
Ẹeḍiom ạsia phọ ạSolomon ạda bọ
20 AJuda rꞌỊzirel kụ uḍighi ḍita oḍiza ịdipho ịisaar ọgbal ọphiiny, kụ rolhe rọphughol robo. 21 *Kụ ạSolomon ạda oomo areelhe phọ ẹḍua bọ ẹpe ọphiiny phọ ẹghi esi ẹpe ade ạbuo aFilistia phọ ẹghi esiemi ọku ạbidi rꞌIjipt. Bịdi ạanyi ghan iisogh oruom Sọlomon ooseeny ghan nyọdi oomo asiḍughul-otu aghuḍum mọ ọdi.
22 Kụ isogh phọ bịdi oruom ghan bọ Sọlomon ịlo eniin aḍio ẹman ghan bọ oogh ọonir aruuku ịgbieneen ịbiakpa, rꞌiḍioph aruuku ighumeneeny ịbiakpa, 23 ḍioph ạsinam dị ookonom oghoony kụ ẹnuum, ịyaldi ạsinam dị ọsighe ẹpe ịḅal phọ, oniin okuron iyool-ịga ụ́ḅal ịnuen rꞌizoogh rꞌinyaa rꞌạsikenegh dị ẹnuum.
24 Ọdi kụ ạtooghi ghan rạraar ạngo oomo areelhe phọ ịpe edi bọ ẹḅeenyom Ọphiiny aYufratis ẹḍua Tifsa ẹghi ẹpe erumuḍio phọ remeel ghan bọ esi Gaza. Kụ ọdi ạmoogh ni mụḅoph esi oomo ạbudaam mọ odi bọ ạga phọ ẹphen Ọphiiny aYufratis, esi ạbuphe orugh bọ okoom nyọdi. 25 Kụ aJuda rꞌỊzirel orughan rꞌoḍuom ologhi: tọrobo oye ạrol ghan iizin avain rꞌạfig ọdi, ẹḍua Dạn ẹghi esi Beersheba, oomo asuḍughul-otu phọ ạSolomon.
26 *ẠSolomon ạmoogh bọ inyadi ọonir aruutu ịlo ạrusu ịnam mọ ọdi rꞌịlo arughuugh-ude phọ ọdi, rꞌiḍioph rꞌịyal ọonir awe dị oghiilom ghan rụsu phọ ọdi. 27 Kụ aḍioph rꞌịyal ạbuo ạrumhu iiḍighi phọ ọdi kụ ụngo ghan Sọlomon ọdaam mọ eḍien rꞌoomo ạbuphe rꞌọdi olhian ghan bọ; oye ye oniin ụnwanyu lhạ, ịyaar íku ghan sịphe phọ. 28 Bịdi ụsighe ghan ịbiakpa abali rꞌạroogho phọ oseere sịphe aruutu ariḍien ịnam mọ; tọrobo oye ạtuugh ghan ịpe ọḅeni bọ nyọdi kụ ạsighe aru.
29 Kụ Ẹnaan ẹngo Sọlomon olegheri-ịyaar rꞌọnaghan ạḍughum dị ạphughan rꞌophooph ologhi ịdipho ịisaar ọgbal ọphiiny. 30 Kụ olegheri-ịyaar ọlo ạSolomon apu olegheri-ịyaar ọlo oomo awe ạramha phọ edi bọ ẹpe erumuḍio phọ remite ghan bọ, rꞌoomo olegheri-ịyaar ọlo awe phọ Ijipt. 31 *Kụ olegheri-ịyaar ọlo ọdi apu ọlo oomo awe; apu nyọpo Etan ọlo Ezrait phọ, apu ọlo aHeman rꞌaKalkol rꞌaDada, ạnmuny phọ aMahol; kụ aḍien ọdi emite eeleghaan oomo areelhe phọ ekoom bọ nyọdi ekitonom. 32 *Ọdi adogh ịraar ọonir asidogh, rꞌoniin ọonir rꞌoogh ạsuor. 33 Kụ ọdi ạghaaph ịlo ireeny; ịlo ịsaga phọ edi bọ ẹpe Lẹbanon, rꞌịlo aghuudia phọ ịpe resiighi ghan bọ loor iikpe. Ọdi ạghaaph ịlo ịnam rꞌịnun rꞌịlo oomo ạraraar phọ ịpe rekuura bọ ude, rꞌịlo ina. 34 Kụ oomo awe phọ oru ghan ọnaghan olegheri-ịyaar phọ ạSolomon; oomo ạbudaam areelhe ịsien aḅirini phọ, bụphe mọnaghan bọ ịlo olegheri-ịyaar phọ ọdi.