ADevid agbi weye phọ
24
Ọmoogh-we phọ ạḅile ni ạghagham ologhi weye phọ Ịzirel, kụ ọdi aḍighi ịdi aDevid ạsighe ịiḅaghami ạngo bịdi. Ọmoogh-we phọ ạḅeni nyọdi, “Kịa agbi weye phọ Ịzirel rꞌaJuda.” 2 Kụ aDevid ạto ạngo Joab, oḍiemiom awe ẹgham mọ, “Pạm bụo ịtooghi phọ ạna ạghimom oomo arughunughun phọ Ịzirel emiigh eniin eekuna eelhe phọ ẹghi esi ẹpheri phọ, agbi weye phọ. Mị rạwa olegheri ọnhu awe lọ odi.”3 Kụ aJoab ạphagharanaan ọdaam mọ mọ, “Nạ Ogbogh Ọdaam, Ọmoogh-we Ẹnaan phọ ạna ạbughe weye phọ Ịzirel oniin okuron amem apuemi ịphen edi bọ nyịidipho, kụ nạ tọl li eye ạmiin mem dị ọdi kaḍighi bọ ịphen phọ. Kụ eeghe kụ iḍighi kụ nạ Ogbogh Ọdaam mọ rạwa bọ oḍighi ịphen phọ?” 4 Kụ ọlo ọdaam mọ ạkpaariom ni Joab rꞌạbuo ịtooghi phọ ọdi mọ oḍighi ịto phọ ọno; kụ bịdi ọḍua sịphe egbodo phọ ọdi kụ ọghi ogbi awe phọ Ịzirel.
5 Bịdi ọḅeeny Jọdan phọ kụ odoghoḍi rugbogo ạga esoorom Aroer, ẹmha dị ẹrol sịphe ogbo eḍiiny phọ, ẹpe eelhe phọ ạGad. Bịdi ọḍua sịphe kụ ọghi ẹpe ephunom osi ẹpe Jazer. 6 Kụ ọḍua pạ ọghi Gịliad kụ ọḍua ọghi Kades ẹpe eelhe ạHitait phọ. Kụ bịdi ọghi osi Dạn, kụ ọḍua Dạn ọghi ẹpe erumuḍio phọ remeel ghan bọ ẹpe Saidon. 7 Kụ bịdi ọghi ẹpe esoorom mọ ẹpe egbogh ẹmha phọ oghoony bọ Taya, kụ ọḍua ọghi oomo ạramha awe aHivait phọ rꞌawe aKenan, kụ ekureriom mọ bịdi osi ẹpe Beersheba, ạga esoorom aJuda. 8 Mem dị esugha ụnwanyu rꞌịyaldi aḍughul-otu meten bịdi oḅula Jeruselem, mem dị bịdi morelhe eelhe phọ okitonom. 9 Bịdi ọghaaph ọḅeni ọdaam mọ ọnhu awe, lephiri ạnmuny dị kotue ni ọki ẹgham: 800,000 ẹpe Ịzirel, ḅịle ra 500,000 ẹpe Juda.
10 Kụ ọlo mem dị aDevid magbi bọ weye ạmadan, ologhi phọ ọdi amiigh ọoḅaghami ọdi kụ ọdi ạḅeni Ọmoogh-we phọ, “Mị maḍighi igbogh ịkaraph esi ịphen mị aḍighi bọ! Seseeny, sạr ụwilenaan ịmi. Mị maḍighi ịlo arolologhi.”
11-12 Kụ Ọmoogh-we phọ ạḅeni Gạd oyil Ẹnaan phọ aDevid, “Kịa ạḅeni Devid mọ mị adianaan nyọdi ịraar abin. Mị kaḍighi ịlo ọdi aphin.” Ḍịeri phọ ạḍiroor phọ, mem dị aDevid mạsuma rạlha, 13 ạGad ạghi ạteeny nyọdi kụ ạḅeni nyọdi ịpe Ọmoogh-we phọ ạḅem bọ, kụ apuru, “Ẹghen kụ kẹtol bọ? Ịraar ạsia ịgbakuro sịen ade phọ ạna mụghumo ịraar ụnwanyu osumughu esi ẹpomoghian phọ anyina mụghumo ịraar aḍughul-otu ịkaraph ạreezegh sịen ade phọ ạna? Mạar ạatughian, kụ ụḅeni ịmi ọdo ọphagharanaan lọ mị kaḅulemi ạḅeni Ọmoogh-we phọ.”
14 Kụ aDevid ạphagharanaan, “Mị odi ẹkaraph esi dị ịlo okpetenaan ílho! Kụ ọlo mị ụ́wa mọ awe kụ ụliom ịmi. Ọmoogh-we phọ rꞌaloor ọdi kụ ụliom iyoor, loor esi dị ọdi oye ọnma ighirigiir.” 15 Kụ iḍighi kụ Ọmoogh-we phọ ạngo Ịzirel ịkaraph ạreezegh, dị ẹrol ḍịroor phọ ạḍiphe phọ tụtu ẹteeny mem mọ ọpo ọdi mạsaḅar bọ. Emiigh eniin eekuna eelhe phọ kụ ẹghi esi ẹpheri phọ oḍualdi ọonir awe Ịzirel kụ umugh. 16 Mem dị ọokpaany kꞌỌmoogh-we phọ rạwa bọ oogulemi aJeruselem, Ọmoogh-we phọ anme ni ologhi ọdi esi ọliom awe phọ kụ ạḅeni ọokpaany phọ rạze bọ bịdi, “Mẹkasian ni! Kụl ḍịghaagh ạna.” Ọokpaany phọ masi sịphe Arauna ọlo aJebus phọ rạtol ghan bọ kạponyon ịbiakpa phọ.
17 ADevid ạmiin ni ọokpaany phọ ọpo rạze ghan bọ weye phọ kụ ọdi ạḅeni Ọmoogh-we phọ, “Mị kụ ụpiom. Mị kụ uḍighi ịpe ị́nighe bọ. Ọphon awe phọ uḍighi aani eeghe? Ụlhiom ịmi rꞌeghunotu phọ ạmi.”
18 Ḍio ḍio phọ ạḍiphe phọ, Ẹnaan ịghi ni ẹteeny Devid kụ ẹḅeni nyọdi, “Kịa sịphe Arauna rạtol ghan bọ kạponyon ịbiakpa phọ ạkan enmeny ạngo Ọmoogh-we phọ.” 19 ADevid ạnaghanan ni ịto Ọmoogh-we phọ kụ ạghi ịdipho ạGad mạḅeni bọ nyọdi. 20 Arauna aphogh ni kụ ạmiin ọdaam mọ rꞌawe ịtooghi phọ ọdi dị rotu ọteeny ọdi. Kụ ọdi ạngo rughuenian Devid, azumeri risigh ọdi ude, 21 kụ apuru, “Nạ Ogbogh Ọdaam mọ, eeghe kụ nạ aru bọ sịen?”
ADevid ạphagharanaan, “Mị uru ogho esi phọ nạ rạtol ghan bọ kạponyon ịbiakpa phọ, rꞌọkan enmeny ọngo Ọmoogh-we phọ, pịdi ẹkaraph ẹzegh phọ ekeel.”
22 “Sịghe bịn, Ogbogh Ọdaam mọ,” Arauna ạḅem, “ạsighe ạngo Ọmoogh-we phọ tọro ịyaar lọ ẹḅeeraan nyịna. Pọrono ạsinam oḍighinom ịyaar aghuḍum sịphe enmeny phọ; pọrono ịraar ọfeguma rꞌọkpooghi phọ ọpo rọponyonom ghan bọ ịbiakpa phọ, sịghe aḍighi ịpe.” 23 Arauna ạngo ni oomo phọ ịdi ọdaam mọ kụ ạḅeniom nyọdi, “Ọmoogh-we Ẹnaan phọ ạna ẹsighe ni ẹkia phọ ạna.”
24 Kụ ọlo ọdaam mọ ómeera mọ, “Eeye, mị kạkpe ni nyịna kụ agbi ọsighe. Mị kạ́ngo Ọmoogh-we Ẹnaan phọ ạmi ẹkia dị ị́man mạar.” Kụ ọdi agho esi phọ rọtol ghan bọ kọponyon ịbiakpa phọ rꞌịnam adool phọ ikpoki dị ẹman ooghdi ipoḍi asilva. 25 Kụ ọdi ạkan enmeny phọ ạngo Ọmoogh-we phọ kụ ọdi ạphighiron ẹkia oguom ạnian rꞌịyaar aghuḍum ẹboroph. Ọmoogh-we phọ ạnaghan ni ịiḅereghi phọ ọdi, kụ ẹkaraph ẹzegh phọ ẹrol bọ Ịzirel ekunughian.