Kụ Ọmoogh-we phọ ạphagharanaan mọ, “Ii.”

Kụ aDevid apuru mọ, “Ẹghen?”

Kụ ọdi ạḅeni nyọdi, “Hẹbron.” 2 ^*Kụ iḍighi kụ aDevid ạghi ẹpe Hẹbron. Ọdi ạphamam ni ịyal phọ ạnmariir phọ ọdi, Ahinoam ọlo ẹpe Jẹzreel, ḅịle rꞌAbigel ekpukele ạnir phọ aNebal ọlo ẹpe Kạrmel. 3 Ọdi ạphamam kẹn ni weye phọ ọdi rꞌạnmariir rꞌạnmuny ạbidi, kụ bịdi orughogh rạmha phọ ịpe ekitonom bọ Hẹbron. 4 ^*Kụ awe phọ aJuda oru ẹpe Hẹbron kụ ọsighe mụnum-ịko ọsagharan ẹmhu Devid oḍighi nyọdi ọdaam aJuda.

Mem dị aDevid ạnaghan bọ mọ awe phọ aJabes ẹpe Gịliad mokughuḍi Sọl, 5 ọdi arom buniin awe mọ ọghi ẹpe phọ rꞌadom mọ ạḍien: “Ọmoogh-we phọ ịseph inyina ịduon nyina eḍeenaan bọ ẹphomoghian phọ anyina esi ọdaam mọ anyina kụ eḍi bọ nyọdi. 6 Kụ nyịidipho phọ Ọmoogh-we phọ ạmoogh ghụsan esi anyina ḅịle inyina kíbi! Mị phọ kẹn kịpham ni inyina ịdi ẹnighe loor esi ịphen phọ nyina meḍighi bọ. 7 Ịmaar ẹkpar ẹḅile ẹmoogh ạkpo ologhi! ẠSol ọdaam mọ anyina mamugh, kụ awe phọ aJuda mụsighe ịmi oḍighi ọdaam mọ ạbidi.”

8 Ạbner ọony phọ ạNer, uwo ẹmhu awe ẹgham mọ ạSol, mạdaph Isboset ọony phọ ạSol bịn asuma ạḅeeny ọphiiny phọ ạJodan akeel ẹpe Mahanaim; 9 Ẹpe phọ Ạbner ạsighe Isboset aḍighi ọdaam areelhe phọ ạGiliad, Ạsa, Jẹzreel, Ifraim, Bẹnjamin ḅịle rꞌoomo Ịzirel. 10 Ọdi ạman inyadi ạsia kụ ogbi bọ oḍighi ọdaam mọ Ịzirel kụ ọdi ạda bọ ịyal ạsia.

Kụ ọlo eghun phọ aJuda ụphomoghian ọnaghanan Devid, 11 kụ ọdi ạrol ghan ẹpe Hẹbron kụ ạda aJuda oḍual ạsia rꞌạpakiri.

12 Ạbner rꞌạbuo ịtooghi phọ Isboset ụḍua ni ẹpe Mahanaim ọghi ẹpe ẹmha phọ ạGibion. 13 AJoab, ọpo onhiin phọ ọdi ughol bọ mọ aZeruya, ḅịle rꞌạbueri phọ ạbuo ịtooghi phọ aDevid ụteeny bịdi ẹpe ọodu phọ, dị ọrologhu ude, buniin ọtol ḍiniin ạḍighaagh ạbunon ọtol ḍịeri phọ ạḍighaagh ọodu phọ. 14 Kụ Ạbner ạḅeni Joab mọ, “Ọson ugheel ạnmuny ịyal phọ ạga phọ kụ bịdi eeghi ẹgham mọ ịdipho ẹmha rꞌẹmha rọgba ghan bọ ịnugh.”

Kụ aJoab ạphagharanaan mọ, “Ẹnighe ni.”

15 Kụ iḍighi kụ ḍioph rꞌịyal awe ọḍua ḍịghaagh Isboset rꞌeghun phọ ạBenjamin omite, kụ eenan rꞌawe phọ aDevid. 16 Kụ awe phọ oniin ạpham ghan ẹmhu oniin, ạḅile agim ghan elhool ẹgham mọ ịkpurugaany oniin, bịn kụ eḍighi ịdi oomo phọ 24 phọ ạbidi omeleghu bịn omuughu. Kụ iḍighi kụ esi phọ sịphe phọ ẹpe Gịbion okol mọ “Ade arolhool ẹgham.”

17 Kụ egbogh ẹgham emite, kụ aDevid rꞌawe phọ ọdi ọkpar opu ạbner rꞌawe phọ Ịzirel. 18 Kụ ịraar phọ ạnmuny phọ aZeruya ụrol li ẹpe phọ: aJoab rꞌAbisai rꞌẠsahel. Aruwol Ạsahel ikem ghan ịdipho ịlo ọoroogh. 19 Kụ ọdi amiigh ophorogh Ạbner, mꞌophorogh rꞌọteeny ọdi. 20 Kụ Ạbner aphogh ọman kụ ạḅem mọ, “Ọpo ạna phọ ni Ạsahel?”

Kụ ọdi ạphagharanaan mọ, “Ii.”

21 Ạbner ạḅem mọ, “Ịmi kúphorogh mun. Porogh oniin oye ẹgham mọ, kụ aziton ịyaar lọ ọdi ạpham.” Kụ ọlo Ạsahel aphorogh ni nyọdi ạkpaariom. 22 Kụ Ạbner ạḅile ạḅeni nyọdi mọ, “Ịmi kụ́daph mun. Gbạani dị ạna. Uḍighi ika kụ nạ rụkpuughiom bọ ịmi oghiigh ạna? Mịna kạmeera bọ ika risigh umor phọ ạna, Joab?” 23 Kụ ọlo Ạsahel ómeera ọ́wile; ẹpe kụ esi dị Ạbner ạsighe ẹdume ọsoph phọ ọdi agim ọkuruḅaka Ạsahel akputon ọman ọdi. Kụ Ạsahel ameel ude amugh, kụ tọrotoro oye lọ ạghi asi esi phọ ọdi ameel bọ ạmeera ghan ni.

24 Kụ ọlo aJoab rꞌAbisai umiigh ni ophorogh Ạbner, kụ erumuḍio remeel ighool bịn bịdi ọghi osi eegbolom phọ Ama, ẹmha dị edi ḍịghaagh phọ ạḍiphe erumuḍio phọ rẹḍua ghan bọ kemite etuman Gia ẹpe eten ẹdala phọ ạGibion. 25 Awe eghun phọ ạBenjamin ụḅile kẹn ni ookpomoghan okitonom Ạbner kụ ọmeregha riisi phọ ạbidi sịphe eegbolom mọ. 26 Kụ Ạbner ạlho ạmagh Joab mọ, “Yira kobe ni ịduon phọ bịn kꞌagee-pọ ḍụghum? Oomo ayira ạbuo eniin eelhe. Kꞌạpur amem kụ ẹdi nạ kạḅeni weye phọ ạna mọ ọwile ophorogh ayoor?”

27 Kụ aJoab ạphagharanaan mọ, “Mị akunya rꞌaḍien Ẹnaan phọ ẹpe edi ghan bọ bịn mọ mụghumo nạ mụ́ḅa bọ awe phọ ạmi muphorogh ni nyịna tụtu kꞌạḍiroor iḍueneen.” 28 Kụ aJoab aphula ọkuodu phọ ạngo eḍeenaan mọ awe phọ ọno kúporogh mun weye Ịzirel phọ; kụ elephiri phọ emuneen.

29 Ạbner rꞌawe phọ ọdi orelhe ẹpe eḍiiny phọ ạJodan oomo aḍughul phọ. Bịdi ọḅeeny ọphiiny phọ Jọdan kụ bịdi rọḅile rorelhe oomo phọ ạḍieri phọ ạḍiroor phọ kụ bịdi ọghi Mahanaim.

30 Mem mọ aJoab ạwile bọ ophorogh awe phọ, ọdi aakpomoghi ni oomo awe phọ ọdi kụ ạmiin mọ ḍioph rꞌesugha ạbidi mophe, ọḅaram Ạsahel. 31 Awe phọ aDevid mọze 360 awe phọ Ạbner dị ọḍua eghun phọ ạBenjamin. 32 AJoab rꞌawe phọ ọdi ọsighe ḍizu phọ Ạsahel ọghi oḍi ẹpe oḍi eghun phọ ạbidi ẹpe Bẹtilihem. Kụ bịdi orelhe oomo phọ aḍughul phọ kụ rekpoghoronu bịn ọḅile osi Hẹbron.