Ịpe iikpe phọ aJeriko emeel bọ
6
Loor oghiilaan awe phọ Ịzirel, ughughi yogh rụnhu-aḍibuo ẹmha phọ aJeriko. Oye ọ́ḍua omite, oye ọ́ḍua oḍigh. 2 Kụ Ọmoogh-we phọ ạḅeni Josua mọ, “Mị mạḅogh Jeriko rạngo nyịna, rꞌọdaam ẹmha phọ ạbidi, rꞌoomo ikakara awe phọ ọdi. Nạghan ịphen nyina keḍighi bọ. 3 Nạ rꞌoomo awe ẹgham mọ ạna kegiriph eeghironom ẹmha mem ḍio. Ịtuugh ịdipho eḍighi odiiny aḍughul-otu. 4 Oḍual ariil ạrikia oye ye ạpam ọkuodu ọphaal odughuna, bịdi kụ kọtol ghisigh Igbe Ịyo phọ. Ḍio dị kemuneniom oḍual, nạ rꞌawe ẹgham mọ ạna kegiriph eeghironom ẹmha phọ oḍual amem, kụ ariil ạrikia phọ opula ghan rụkuodu phọ. 5 Kụ bịdi opula mem ọdoonye. Nyina mẹnaghan ẹḍogh ạrukuodu phọ, bịn oomo phọ awe kọyughuron rꞌeboom ẹḍogh ọkiom ạnyu. Iikpe ẹmha phọ ạbidi kemeleghu ude, bịn nyina kenyeene ẹki eḍigh ologhi ẹmha phọ.”6 AJosua ọony phọ ạNon ạmagh bụpinyon rịkia phọ kụ ạḅeni bịdi mọ, “Ịsighe Igbe Ịyo phọ erool. Oḍual anyina, ịsighe oḍual ạrukuodu ạraphaal idughuna phọ kụ ẹghi ẹpe ghisigh Igbe Ịyo phọ Ọmoogh-we phọ.” 7 Kụ aJosua ạḅeni we phọ Ịzirel kụ omiigh ogiriph ooghironom ẹmha phọ, rꞌaḍita awe dị ọnyaaghian ịlo ẹgham dị oḍia risigh Igbe Ịyo phọ Ọmoogh-we phọ.
8-9 Ịdipho aJosua mạto bọ ạḅeni, ạbuḅel awe ẹgham mọ uḍiemiom oḍual ariil ạrikia phọ ropula bọ rụkuodu phọ; ọman ạbuen kụ ẹdi ariil ạrikia phọ orool bọ Igbe Ịyo phọ Ọmoogh-we phọ kụ ạbueri phọ awe ẹgham mọ ọdaph bịdi. Kụ ariil ạrikia phọ ropula ni rụkuodu phọ úsoph mem. 10 AJosua mạḅeni we phọ ọdi mọ rꞌoye kụ́lo, rꞌọnhu kụ́tagharan tụtu ọdi ạḅem. 11 Kụ ọdi ạḅeni ḍita awe phọ ạbuen mọ ọsighe Igbe Ịyo phọ Ọmoogh-we phọ ooghironom ẹmha phọ mem kụ bịdi oḅula sịphe arugbogo phọ kụ ọmina ẹḅaal.
12-13 AJosua aḅon aḅetenu esoph ạḍiroor, kụ esi omuneniom ịyal amem ariil ạrikia phọ rꞌawe ẹgham mọ ogiriph ooghironom ẹmha phọ iniin phọ ịpe bịdi oḍighi bọ ḍio phọ ạḍiphe eten bọ: ẹḅel phọ, aḍita dị oḍiemi; ẹdi etum, oḍual ariil ạrikia phọ dị ropula oḍual phọ ạrukuodu idughuna phọ ghisigh Igbe Ịyo phọ, kụ ekureriom mọ, aḍita eekuna ọman. Kụ ariil ạrikia phọ ropula ni rụkuodu phọ úsoph mem. 14 Ḍio phọ ạḍien emuneniom bọ ịyal phọ, bịdi ọḅile kẹn ogiriph ooghironom ẹmha phọ mem bịn, kụ bịdi oḅula ẹpe arugbogo phọ ạbidi. Bịdi uḍighi ịduon phọ odiiny aḍughul-otu.
15 Rẹman oḍual aḍughul-otu kụ bịdi oḅon oḅetenu mem dị ạḍiroor rẹḅaal, kụ ogiriph ooghironom ẹmha phọ eniin eḍighinom mọ — rodon bịn kụ ẹdi bịdi ogiriph ooghironom oḍual amem. 16 Ooghironom oḍual amem mọ, mem dị ariil ạrikia phọ rọwa ophula yogh ạrukuodu phọ kụ aJosua ạto ạḅeni we phọ mọ ọyughuron kụ ạḅem mọ, “Ọmoogh-we phọ mịngo inyina ẹmha phọ! 17 Ẹmha phọ rꞌoomo ạraraar ịsiphe ẹmha phọ meḍighi ẹdi mọnyagharanaan ọngo Ọmoogh-we phọ ophiemi. Omuton Rehab oliom-ẹmha ạnir phọ rꞌoomo ạbulo odi sịphe otu phọ ọdi rꞌọdi bịn, bụnon kụ kósugha óḍum, ịdi eḍighi bọ ọdi ạaghi we phọ bụphe orom bọ ọghi oḅiligha ẹmha phọ. 18 Ọnyo anyina kụ́ḅogh rạraar phọ ịpe oruule bọ osu ọkaraph ọghor amuphe phọ, loor esi dị mem lọ nyina ẹsighe tọrobo ịyaar phọ ẹpe moruule bọ, pọ nyina meḍighi ịdi moruule rugbogo phọ Ịzirel ẹngo ịiḅaghami. 19 Kụ oomo asilva rꞌagol rꞌạraraar lọ ọlemom enaba rꞌịlo arukuron, mọnyagharanaan ọngo Ọmoogh-we phọ, kụ kọsighe oomo phọ ịdi ọlogh sịphe rooko ghan bọ rạraar phọ Ọmoogh-we phọ.”
20 *Mem dị awe phọ ọnaghan bọ rọḍogh ạrukuodu phọ ariil ạrikia phọ ropula yogh bọ, bịdi ụyughuron ni rꞌeboom ẹḍogh ọghiom ạnyu bịn iikpe ooghoony ẹmha phọ emeleghu, bịn awe phọ ọghi oḍigh sịphe ẹmha phọ. Tọrobo oye anyeene ni ạghi aḍigh ologhi ẹmha phọ, bịn bịdi ọsighe ẹmha phọ. 21 Kụ bịdi ophiemi ẹmha phọ oogulemi oomo aruphua ịsiphe ẹmha phọ, lephiri rꞌạnmariir, ugheel rꞌikumoor awe, sịnam rꞌiyool-ịga rꞌịnam adool; ọsighe ghan ẹdume elhool ẹgham mọ kụ ophiemiom bịdi.
22 Kụ aJosua ạḅeni ịyal phọ awe phọ dị arom bọ ọghi oḅiligha ẹmha phọ mọ, “Ịki kꞌoliom-ẹmha ạnir phọ ẹsighe ạnir phọ rꞌạbulo odi rꞌọdi ẹpham erumom, ịdipho nyina eghunya bọ rꞌọdi.” 23 Kụ ịyal phọ awe phọ ọghi bọ oḅiligha ẹmha phọ ọghi ọsighe Rehab, ọde phọ ọdi, onhiin phọ ọdi, bumor phọ ọdi rꞌoomo asiya phọ ọdi, ọsighe ọpham ọghi osiemi esi dị etuman rugbogo phọ Ịzirel kụ oseere bịdi. 24 Kụ ọsu nịan ẹmha phọ, ọḅaram oomo aruphua ịsiphe ẹmha phọ, omuton silva rꞌagol rꞌạraraar ịpe ọlhemom bọ enaba rꞌịlo arukuron. Bịdi ọsighe ịphen phọ ọghi ọlogh sịphe rooko ghan bọ rạraar sịphe otu phọ Ọmoogh-we phọ. 25 *Kụ aJosua ạwile óghiigh Rehab oliom-ẹmha phọ ạsighe, rꞌoomo ọto ọde phọ ọdi, rꞌoomo asiya phọ ọdi, ịdi eḍighi bọ ạnir phọ ạaghi we phọ ọdi arom bọ ọghi oḅiligha ẹmha phọ aJeriko. (Bụo ẹemara ọdi otugh ẹpe Ịzirel kꞌarodon.)
26 *Kụ aJosua ạphur rụru mem mọ ạmuphe mọ, “Itulughian ẹrolonaan risigh Ọmoogh-we phọ tọrobo oye phọ ọpo kaḅetenu bọ ạḅile ạki ọlogh ẹmha phọ aJeriko. Ọkpana ọony ọdi kụ ọdi dị kạsighe apighiom, esoony ọony ọdi kụ ọdi dị kạsighe ạmeremiom ọnhu-aḍibuo oghoony ẹmha phọ.”
27 Kụ Ọmoogh-we phọ ạrolonaan Josua kụ aḍien ọdi eeleghaan oomo eelhe phọ.