5 Kụ Ọmoogh-we phọ ạto ạḅeni Mozis mọ, “Mem lọ rotuph rugbogo phọ dị kọḍua, Eeron rꞌạnmuny phọ ọdi kụ ọghi ọkatan ukpe phọ ọkpo bọ osophom igbe phọ, ọsighe ukpe phọ ookpereghiom Igbe Ịyo phọ, 6 ọsighe ozu ạtu-ọga ozuom, ọsighe ẹnu ukpe ookpereghiom, ọsighe rọko phọ ogimi.

7 “Kụ sịphe ạnyu ịdaabili eḍien phọ, bịdi ọsighe ẹnu ukpe kụ ookpereghiom, kụ ọsighe rụkpa phọ, ịkangi phọ rꞌạsimogo phọ ọḅamaghi, rꞌạraphaal ọphugholom ghan miim ạrikia phọ. Amem dị eḍien ílho sịphe ịdaabili phọ kẹ́tol. 8 Bịdi ọsighe oodor ukpe ookpereghiom, kụ ọsighe ozu ạtu-ọga ozuom, kụ ọsighe rọko phọ ogimogh.

9 “Bịdi ọsighe ẹnu ukpe ookpereghiom oreeny ịnsens phọ, rꞌịtozi phọ, ịkangi phọ, rꞌịteleleeny ạrukpa phọ, rꞌoomo ạraraar erughotu phọ edi bọ sịphe ịpe bịdi ọsighe bọ roḍighinom ghan oḍighi. 10 Bịdi ọsighe ghan oomo ạraraar erughotu phọ edi bọ sịphe, ọsighe ozu ạtu-ọga ookpereghiom kụ ọsighe ọḅam sịphe ạnyu ọgbanaghi phọ.

11 “Bịdi ọsighe ẹnu ukpe ookpereghiom renmeny ạrikia agol phọ, kụ ọsighe ozu ạtu-ọga ozuom kụ ọsighe rọko phọ oḅerenom. 12 Bịdi ọsighe oomo ạraraar iitia phọ ịpe bịdi ọsighe bọ roḍighinom oḍighi sịphe Ạdol Iigbia phọ ọsighe ẹnu ukpe ophurughiom, kụ ọsighe ozu ạtu-ọga ozuom, kụ ọsighe ọḅam sịphe ọgbanaghi phọ. 13 Bịdi ọsighiogh ọoru ịsiphe enmeny ạrikia phọ kụ ọsighe oodor ozuom ạnyu enmeny phọ. 14 Bịdi ọsighe oomo ạraraar erughotu phọ roḍighinom ghan bọ iiḍighi sịphe phọ ọḅamaghi ạnyu enmeny ạrikia: suugh phọ, ịkangi phọ, ạrusua phọ, oomo ạraraar erughotu phọ, oomo ạraraar ịsiphe enmeny phọ. Kụ bịdi ọsighe ozu ạtu-ọga ozuom kụ ọsighe rọkolom mọ oḅerenom. 15 Tọro amem lọ rotuph rugbogo phọ dị kọḍua, mem dị Eeron rꞌạnmuny phọ ọdi mookpereghi dọl iigbia phọ rꞌoomo ạraraar ọrologhom mọ edi bọ sịphe Ạdol Iigbia phọ ọmadan, pọ mẹteeny dị bụo ọto aKohat kotool ịphen phọ. Kụ bịdi kụ́ḅogh rạraar iigbia phọ, ọbo bịdi komugh ghan bọ.

“Ịphen kụ iiḍighi phọ ọto phọ aKohat koḍighi ghan bọ mem lọ awe ọḍua sịphe arugbogo Ogbogo phọ omiigh erelhe.

16 “Oḍighi phọ Ẹliazar ọony phọ Eeron oyil ạrikia phọ, ophogh ghan ạmunum mọ mụphe kọsuughiom ghan bọ ịtozi phọ, ịnsens eeḅi eḍu phọ, rꞌịyaar aghuḍum ịbiakpa phọ, rꞌạmunum-ịko phọ. Ọdi kụ kapogh ghan Ogbogo Iigbia phọ rꞌoomo ạraraar ịsiphe Ogbogo phọ, sịphe Ạdol Iigbia phọ rꞌạraraar phọ edi bọ pạ.”

17 Ọmoogh-we phọ ạḅeni Mozis rꞌEeron mọ, 18 “Ímutonaan ghan ọto phọ aKohat sịphe kꞌaLivai. 19 Ịduon kụ ịdi nyina keḍighi ọbo bịdi ọrol kúmugh. Mem lọ bịdi ọghi otuman rạraar iboom iigbia phọ, pọ Eeron rꞌạnmuny phọ ọdi ọghi oḍigh sịphe phọ, oḍereghinaan bịdi uwo oḍighi rꞌoḍighi. 20 Bịdi kụ́ki ophogh ạraraar iigbia phọ, ọbo komugh ghan bọ.”

21 Ọmoogh-we phọ ạghaaph ạḅeni Mozis mọ, 22 “Kịa agbi ọto phọ aGerson sịphe eghun phọ aLivai, ọto rꞌọto kꞌạburude phọ ạbidi, ạgeeghi siḍien phọ ạbidi, 23 emiigh bụlo mọman ịraardi ạsia osiemi bụlo mọman ooghdi ạsia, oomo ạbulo kotue ni oḍighi oḍighi sịphe Ogbogo Ạdol Ọmoogh-we phọ. 24 Iḍighi dị ọto phọ aGerson koḍighi, ịphen. 25 Bịdi kụ kotool ghan rukpe phọ ịpe ọkpooghi bọ sịphe Ogbogo phọ, rꞌoomo ạraraar phọ ịpe rookpereghiom ghan bọ, ruzu ạsier phọ, ịpe kookpereghiom ghan bọ ạnyu phọ, rꞌarukpe phọ rọkpooghi bọ sịphe arughuugh Ogbogo phọ; 26 rukpe ịpe ọkpooghi bọ sịphe oghoony phọ, rꞌarukpe phọ ịpe ọkpooghi bọ ịnhu-aḍibuo oghoony phọ, rꞌịpe ọkpooghi bọ okoom Ogbogo phọ rꞌenmeny ạrikia phọ, rꞌịkereneen arukpe phọ, rꞌoomo ạraraar phọ ịpe bịdi ọsighe bọ roḍighinom iiḍighi. Kụ bịdi oḍighi ghan oomo ịpe esi bọ bịdi oḍighi, bịdi ọtuugh ghan ịpe phọ kụ oḍighi. 27 Oomo arukumuan phọ ọto phọ aGerson kokumuan bọ, Eeron rꞌạnmuny phọ ọdi kụ kọḅeni ghan bịdi ịpe bịdi koḍighi bọ. Kụ nạ kụ kạma oye dị kapogh ghan oomo iiḍighi phọ ạbidi. 28 Ịphen kụ iiḍighi phọ ọto phọ aGerson koḍighi ghan bọ sịphe Ogbogo phọ. Kụ Itamar ọony phọ Eeron oyil ạrikia phọ kụ kaḍighi uwo ẹmhu ạbidi.”

29 Ọmoogh-we phọ ạghaaph ạḅeni Mozis mọ, “Kịa agbi ọto phọ aMerari sịphe eghun phọ aLivai, ọto rꞌọto kꞌạburude phọ ạbidi, 30 ạgeeghi siḍien phọ ạbidi, emiigh bụlo mọman ịraardi ạsia osiemi bụlo mọman ooghdi ạsia, oomo ạbulo kotue ni oḍighi oḍighi sịphe Ogbogo Ạdol Ọmoogh-we phọ. 31 Oomo iiḍighi ịlo ạbidi sịphe Ogbogo phọ, orool ghan ịḅaghaghaam ịsiphe Ogbogo phọ, rꞌạrokolom mọ edi bọ sịphe phọ, rꞌaruwol phọ, rꞌịkasiom mọ, rꞌạroko phọ, rꞌaruwol phọ, 32 rọko phọ ịpe ogim bọ okitonom oghoony phọ, aruwol phọ, ịkomom mọ, ịkireneen arukpe phọ rꞌoomo ạraraar phọ roḍighinom ghan bọ oḍighi sịphe. 33 Ịphen kụ iiḍighi phọ ọto phọ aMerari koḍighi ghan bọ sịphe Ogbogo phọ. Kụ Itamar ọony phọ Eeron oyil ạrikia phọ kụ kaḍighi uwo ẹmhu ạbidi.”

34-48 Ịdipho Ọmoogh-we phọ ạto ạḅeni bịdi, aMozis rꞌEeron rꞌạbuo ạrumhu awe phọ ogbi bọ ịraar phọ aropolo sịphe eghun phọ aLivai, ọto phọ Kohat rꞌopolo phọ aGerson rꞌopolo phọ aMerari, ọto rꞌọto kꞌạburude phọ ạbidi, ọgeeghi siḍien phọ ạbidi, emiigh bụlo mọman ịraardi ạsia osiemi bụlo mọman ooghdi ạsia, oomo ạbulo kotue ni oḍighi oḍighi sịphe Ogbogo Ạdol Ọmoogh-we phọ.