Oḍighi ọsighe ọnhu Abuan kụ ọgeom aani Ạḍinya Iigbia phọ amiigh mem dị oniin ọnyo aḅekeeny dị oghol mọ Rev. Ian Gardner rꞌAmelia ạnir ọdi kụ uḍiemiom kụ ọge Imoom Ịyo phọ (N.T.). Ịge phọ ịpe phọ, ookpomoghan dị oghol mọ The Bible Society of Nigeria kụ ụge ḍịnya phọ omitiom kụ okol mọ OOḄI ỌGHAAPH ỊLO ẠJIZOS, lhạ dị eḍighi oniin ọonir rꞌesugha okuron rꞌoḍualdi rꞌọphaanya (1978). Ạḍinya phọ ạḍien phọ edi ghan ni dị rọbal ghan.

Oḍighi ọge aani Igbaany Ịyo phọ (O.T.) ọnhu Abuan ọḅaram Imoom Ịyo (N.T.) kụ eḍighi ḍiniin ạḍinya, ẠḌINYA IIGBIA amiigh lhạ dị eḍighi ịyal ọonir rꞌinya (2004). Ọmoogh-we phọ kụ ạsaḅar aakpomoghi weye phọ oḍighi bọ oḍighi phọ kụ ạḅile aḍiemiom bịdi tụtu ọmadan esi aḍioph ạsia bịn. Ipoḍi lọ ọge ụsighe ghan ọghiomonaan Rev. Ian Gardner ẹpe ẹmha aḅekeeny kụ ọdi ạsighe aten ḍịnya. Mem dị ọge bọ ọmadan, ụḅogh ọngo bụnon awe dị Ọmoogh-we phọ ạḅile ạsaḅar kụ ọoḅeghion ophogh mụghumo ịpe ọge bọ ẹnighe ni, ḅịle kẹn mụghumo ẹdaphan ni ịpe ạbuḅel awe phọ ọge bọ geediidi phọ.

Ọkaraghi Ạḍinya Iigbia dị ọsighe bọ kụ otene bọ ọnhu Abuan phọ okol mọ Good News Bible (Today's English Version) 1979. Ịnon Ạrinya Iigbia dị ophogh aani ghan esi lọ mẹkpo, okol mọ New International Version (NIV) ḅịle ra Revised Standard Version (RSV). Ạrinya phọ ịphen ẹdaphan ni agey ịpe ạbuḅel awe phọ ọsighe bọ ọnhu aHibru phọ, rꞌọnhu Aramaik phọ, rꞌọnhu aGris kụ ọgeom bọ.

Ghạlamo ịdipho awe phọ ọge bọ ḍịnya phọ ạḍien ọdaphan bọ ni ịpe edi bọ Good News Bible phọ, bịdi ụ́loghom iniin ạrinya dị edi sịphe phọ dị oghol mọ Deuterocanonical Books mụghumo Apocrypha. Rịnya phọ iphen, oomo awe kụ ụ́meeraam mọ ẹkpe ni ọsighe ọtughemiom awe.

Esi ọlhoghonaan ạḍighaagh Ooḅi Uwaloor phọ, awe phọ ọsighe bọ Ḍịnya Iigbia phọ ọge ọnhu Abuan ụkparagha ni ọmiin mọ ạḍinya phọ ẹtuugh ni ịpe Ọmoogh-we phọ rạḅem bọ kụ ẹkaaph, ḅịle kẹn mọ mem lọ ạal, ẹdaphan ni ịpe ạbuḅel awe phọ ọge bọ, ḅịle kẹn mọ tọrotoro ekpisi lọ osiom ḍịnya phọ awe ọmiin ni mọ ẹnighe ni.

Iniin ạraraar dị ooghologh sịphe Igbaany Ịyo phọ pạkiri aḅirini phọ ẹphen ayira ólho. Ọdo phọ ạraraar phọ ịpe phọ yira úlegheri ịpe ịyaar phọ ẹrol bọ, kụ esugha ọmoogh aḍien. Ọdo phọ ariisi phọ ịpe phọ, awe phọ ọge bọ ḍịnya phọ ạḍien ụwaaghi ghan ni ọmiin oomo ịlo ịyaar phọ ẹrol kụ ogbi oghol aḍien ịyaar phọ. Ạrinya dị ẹloghonaan ghan ḍịghaagh ọogelion ạraraar phọ ịphen eḍighi Unger's Bible Dictionary, the Interpreter's One Volume Commentary on the Bible, Oxford Advanced Learner's Dictionary. Iniin ạraraar phọ kẹn ụkaraghi ghan kụ ọghi opuru ikumoor awe.

Ịpe rogbi ghan bọ rạraar, ịpe rọtooghi ghan bọ rạraar lọ eḍighi mụum, rꞌịlo eḍighi ẹemor, ḅịle rꞌaḍizu ạraraar, awe phọ ọsighe bọ ḍịnya iigbia phọ otene ọnhu Abuan phọ ọngooghi ni siḍien dị ẹdaphan ni ịpe Abuan rọḅa ghan bọ ḅịle ịpe ịyaar ẹmeera bọ.

Ookpomoghan phọ oḍighi bọ oḍighi phọ ọphon phọ ụsighe ni buniin awe phọ ạbidi ọghi esi dị oghol mọ NIGERIA BIBLE TRANSLATION TRUST ẹpe Jos Nigeria. Awe phọ ụghi ni ịbadi amem kụ ọtuugha ọmaar ịpe rọsighe ghan bọ Ḍịnya Iigbia phọ kotene ọnhu kịrokiro phọ. Iniin ịtuugha dị ọtuugha bọ okol ọnhu aḅekeeny mọ Introductory Course in Translation Principles (ICTP). Ẹpe phọ kẹn kụ ẹdi ọmiin aani ịnon ạraraar dị ooghologh sịphe Ạḍinya Iigbia phọ dị ẹphen ayira ílho kụ ọsighe bọ oḍighinom oḍighi phọ.

Ọḅel oye dị aromoghiom ghan ịpe koḍighi bọ kụ ẹnighe, Dr. Steve Berneking. Ọdi roromoghiom rosi ogboku eten kụ ọḅile ọḅogh oḍighi phọ ọlogh ḍịghaagh ọnon oye dị oghol mọ Mr. Joseph Itumo. Oye phọ ọphon kụ aromoghiom ghan bọ ịlo koḍighi kụ ẹnighe tụtu ọmadan bọ oḍighi phọ.

Oḍighi yogh ni rịikpigh ḍịnya iigbia phọ. Ẹkpigh ẹkpigh ẹmoogh ni ẹmhu ọghaaph ẹlo ọdi. Iniin ariisi ọloghom kẹn ni ịnon ạriikpigh Ạḍinya Iigbia phọ dị ọdo phọ ọghaaph phọ ọpo pho odi aani. Aroogho ịnon ạraraar edi ni iniin ariisi dị keḍeenaan oye lọ rạbal ọdo phọ ịyaar phọ ẹpe rokol bọ mụghumo ẹdo phọ esi phọ rokol bọ.

Ọmoogh-we Ẹnaan Oomo Ịikpo phọ ạngo bọ ịitughian oḍighi phọ ọphon, kụ ạḅile bọ ạlhoghonaan ḍịghaagh tụtu ọmadan, amuzeḍinaan ḍịseph phọ ọdi rꞌOoḅi Uwaloor phọ ọdi tọrotoro oye lọ ạal mụghumo ạnaghan dị rọbal ḍịnya phọ ạḍien. Ikpo ọnhu Ọmoogh-we phọ edi bọ sịen ạḍinya phọ ạḍien ẹngo ni we ọphel-otene, ẹngo ọtagharan, ẹḅile ẹngo ghuḍum kꞌagee-pọ esi aḍien phọ ạJizos Kraist. Ẹrol li ịdipho.

Ạbuphe oḍighi bọ oḍighi phọ ọphon.